រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា មានការភ្ញាក់ផ្អើលមិនតិចនោះទេ បន្ទាប់ពីមានការប្រកាសថា ខ្សែប្រយុទ្ធជើងចាស់របស់បឹងកេត លោក ឃួន ឡាបូរ៉ាវី សម្រេចចិត្តដើរចេញពីវិស័យបាល់ទាត់ ខណៈដែលហ្វេនគាំទ្រលោកមិនតិចនោះទេ បានសម្ដែងអារម្មណ៍សោកស្ដាយយ៉ាងខ្លាំង។
នៅមិនទាន់មានការបញ្ជាក់លម្អិតពីមូលហេតុ ដែលនាំឱ្យកីឡាករដែលធ្លាប់សាងឈ្មោះល្បីល្បាញរូបនេះ សម្រេចចិត្តលាចេញពីអាជីព ទាំងទីផ្សារនៅឈានឡើងនោះទេ ប៉ុន្តែវត្តមានដើរចេញរបស់លោកមានប្រភពខ្លះលើកឡើងថា កើតពីការអន់ចិត្ត បើទោះជាសាមីខ្លួនប្រកាសថា ជាប់ភារៈកិច្ច។ ការប្រកាសពីការលាឈប់នេះ គឺស្ថិតក្នុងវ័យ៣១ឆ្នាំ ដែលមានន័យថា ជាវ័យពេញកម្លាំងរបស់ ឃួន ឡាបូរ៉ាវី និងមិនមែនជាវ័យដែលគួរតែចូលនិវត្តន៍។
យោងតាមទំព័រហ្វេសប៊ុកផ្លូវការរបស់ក្លិបបាល់ទាត់បឹងកេត បានប្រកាសនាប៉ុន្មានមុនថា កីឡាកររូបនេះ ពិតជាសម្រេចចិត្តលាឈប់មិនបកក្រោយមែន ដោយមិនមែនគ្រាន់តែដើរចេញពីក្លិប ហើយស្រវារកក្លិបផ្សេងដើម្បីជ្រកកោននោះឡើយ។ ការប្រកាសនេះ បានធ្វើឡើងតាំងពីថ្ងៃទី៩ មករា ឆ្នាំ២០២០ ខណៈដែលដំណឹងនេះ នៅតែមានការចាប់អារម្មណ៍នៅឡើយ។
ភាគីសាមីខ្លួននៅតែគ្មានចេតនាបកស្រាយពីការប្រកាសនេះឱ្យទូលំទូលាយនោះទេ ដែលហាក់ដូចជាលោកចង់ដើរចេញឱ្យស្ងប់ស្ងាត់ ឬអាចមកពីលោកមានរឿងក្នុងចិត្ត ហើយមិនចង់លាឈប់ដោយវែងឆ្ងាយ។
ការប្រកាសរបស់ក្លិប គឺផ្ទុយស្រលះពីអ្វីដែល ឃួន ឡាបូរ៉ាវី ធ្លាប់ប្រកាសនាពេលកន្លងមក។ មានការជឿជាក់ថា កីឡាករមកពីខេត្តកំពង់ចាម ដែលប្រកបអាជីពបាល់ទាត់តាំងពីឆ្នាំ២០០៨រូបនេះ ទំនងជាមិនចាកឆ្ងាយពីវិស័យកីឡាបាល់ទាត់នោះទេ ព្រោះកន្លងមក ឡាបូរ៉ាវី គេបានទាំងអះអាងថា បើទោះជាវ័យរបស់ខ្លួន នឹងលែងក្លាយជាកីឡាករដែលមានសក្ដានុពល ក៏លោកនឹងបន្តធ្វើជាគ្រូបង្វឹក ដើម្បីចែករំលែកបទពិសោធន៍ដែលខ្លួនមានទៅដល់អ្នកជំនាន់ក្រោយ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ