ខេត្តស្វាយរៀង ៖ ស្ត្រីមានផ្ទៃពោះគ្រប់ខែម្នាក់ឈ្មោះ ហ៊ាន សារ៉ាន អាយុ២៩ឆ្នាំ ជាកសិកររស់នៅក្នុង
ភូមិកណ្ដាល សង្កាត់ប្រាសាទ ក្រុងបាវិត នៅពេលឈឺពោះឆ្លងទន្លេក៏បានដើរតែម្នាក់ឯងទៅកាន់មណ្ឌលសុខភាព ក៏ប៉ុន្តែខណៈកំពុងដើរតាមដងផ្លូវ ស្រាប់តែឈឺពោះឆ្លងទន្លេនៅតាមផ្លូវម្នាក់ឯង ។ នៅពេលនោះ អ្នកធ្វើដំណើរឃើញក៏នាំទៅសម្រាកនៅសំយាបផ្ទះអ្នកស្រុក ហើយទូរសព្ទ័ទៅហៅពេទ្យឆ្មបមណ្ឌលសុខភាពមេសរថ្ងកឲ្យមកជួយសង្គ្រោះ និងបង្កើតកូនឲ្យ ក៏ប៉ុន្តែក្រុមគ្រូពេទ្យមកមិនទាន់ ស្ត្រីរូបនេះក៏បានសម្រាលកូនម្នាក់ឯង ។
ស្ថិតក្នុងស្ថានភាពបែបនេះ អ្នកភូមិបានរត់ទៅរាយការណ៍ជូនលោកស្រី ចិន មុំ សមាជិកាក្រុមប្រឹក្សាសង្កាត់ប្រាសាទឲ្យមកជួយ ហើយលោក ស្រីក៏រត់ទៅទិញស្រោមដៃនិងសម្ភារពេទ្យមកជួយសម្អាតទារកបានដោយជោគជ័យនិងសុវត្ថិភាព បន្តិចក្រោយមកទើបឆ្មបមកដល់ជួយចងទងផ្ចិតឲ្យទារិកា ។ ករណីនេះ បានកើតឡើងកាលពីវេលាម៉ោងប្រមាណ៦និង៣០នាទីព្រឹក ថ្ងៃទី១៤ ខែមករា ឆ្នាំ២០២០ នៅភូមិកណ្តាល សង្កាត់ប្រាសាទ ក្រុងបាវិត ។
បើតាមលោកស្រី ចិន មុំ សមាជិកាក្រុមប្រឹក្សាសង្កាត់ប្រាសាទ បានឲ្យដឹងថា ស្ត្រីដែលឆ្លងទន្លេតាមផ្លូវនេះ មានប្តីឈ្មោះ អ៊ុយ សៅ អាយុ៣៤ឆ្នាំ បានបោះបង់ប្រពន្ធនិងកូន៤នាក់ (ស្រី១នាក់) ឲ្យរស់នៅយ៉ាងលំបាកវេទនា ។ក្រោយមកដោយជីវភាពក្រលំបាកពេក ក៏បានឲ្យកូនប្រុសម្នាក់ទៅគេចិញ្ចឹមធ្វើជាកូនសុំ ព្រោះគ្មានលទ្ធភាពចិញ្ចឹម ដូច្នេះគាត់នៅកូន៣នាក់ក្នុងបន្ទុក ក្នុងនោះស្រីម្នាក់ ។
លោកស្រីបន្តថា ក្រោយមកទៀតប្តីក៏មកសុំ ជានានឹងប្រពន្ធវិញ តែពេលប្រពន្ធមានផ្ទៃពោះក៏ចុះចោលផ្ទះម្តងទៀត ទុកឲ្យប្រពន្ធនិងកូនរស់នៅក្នុងខ្ទមយ៉ាងវេទនា រកព្រឹកខ្វះល្ងាចរកល្ងាចខ្វះព្រឹក ហើយពេលឆ្លងទន្លេលើកនេះបានកូនស្រីម្នាក់ទៀត គឺមានសុខភាពល្អធម្មតា ចំណែកប្តីមិនដឹងទៅឯណាទេ ។ លោកស្រីសមាជិកាក្រុមប្រឹក្សាសង្កាត់ប្រាសាទ បានអំពាវនាវដល់សប្បុរសជន សូមជួយឧបត្ថម្ភដល់ស្ត្រីក្រីក្ររងគ្រោះនេះផង តាមទូរស័ព្ទលោកស្រីលេខ ០៧១ ៦២ ៨២ ៩៦១ ៕
ចែករំលែកព័តមាននេះ