រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន នាល្ងាចថ្ងៃ
ទី១៤ ខែមករា បានជួបជាមួយក្រុមអ្នកសារព័ត៌មានជាតិជាង៥ពាន់នាក់ នៅមជ្ឈមណ្ឌលសន្និបាតនិងពិព័រណ៍កោះពេជ្រ ។ នេះជាជំនួបប្រចាំឆ្នាំលើកទី៤ហើយ រវាងប្រមុខរាជរដ្ឋាភិបាលជាមួយអ្នកសារព័ត៌មានជាតិ ។
ជំនួបរវាងប្រមុខរាជរដ្ឋាភិបាលជាមួយអ្នកសារព័ត៌មានជាតិនេះ ត្រូវបានវាយតម្លៃថាបានផ្ដល់អត្ថប្រយោជន៍ជាច្រើន ក្នុងការលើកកម្ពស់វិស័យព័ត៌មាន ដូចជាការជំរុញឲ្យក្រសួងព័ត៌មានធ្វើវិសោធនកម្មច្បាប់ស្តីពីរបបសារព័ត៌មាន ។ជំនួបមួយឆ្នាំម្ដងនេះ គឺធ្វើឲ្យមានការយល់គ្នាកាន់តែច្បាស់រវាងអ្នកសារព័ត៌មាននិងរាជរដ្ឋាភិបាល ឬអាចនិយាយបានថាមានការយល់គ្នាកាន់តែច្រើនរវាងតួនាទីអ្នកសារព័ត៌មានជាមួយនឹងមុខងារនីតិប្រតិបត្តិ ក្នុងន័យអភិវឌ្ឍសង្គមឲ្យរីកចម្រើន ។
នៅម៉ោងប្រមាណ៥ល្ងាចថ្ងៃទី១៤ ខែមករា ឆ្នាំ២០២០ សម្តេចតេជោនាយករដ្ឋមន្ត្រី ហ៊ុន សែន បានអញ្ជើញជាអធិបតីដ៏ខ្ពង់ខ្ពស់នៅក្នុងពិធីសំណេះសំណាលនិងទទួលទានអាហារសាមគ្គីជាមួយអ្នកសារព័ត៌មានជាង៥ពាន់នាក់ នៅមជ្ឈមណ្ឌលសន្និបាតនិងពិព័រណ៍កោះពេជ្រ ដែលរៀបចំឡើងដោយក្រសួងព័ត៌មាន ។ ក្រៅពីស្ថាប័នអ្នកសារព័ត៌មាន ក្រុមមន្ត្រីអ្នកនាំពាក្យតាមស្ថាប័ន ឧត្ដមក្រុមប្រឹក្សាពិគ្រោះនិងផ្ដល់យោបល់ និងមន្ត្រីជាន់ខ្ពស់នៃរាជរដ្ឋាភិបាល ក៏បានចូលរួមដែរ ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងសុន្ទរកថាដោយរំឭកពីការដឹកនាំដ៏ឆ្លាតវៃរបស់សម្តេចតេជោ ហ៊ុន សែន «បាននាំប្រទេសកម្ពុជាឲ្យរីកចម្រើន អ្នកជំងឺនៅអាស៊ី ក្លាយជាតារាឯកនៅអាស៊ី»។ សុន្ទរកថារបស់លោករដ្ឋមន្ត្រីបានរំឭកថា សម្តេចតេជោ ហ៊ុន សែន បានជួបជាមួយអ្នកសារព័ត៌មានជាង១.០០០នាក់ ជាជំនួបលើកដំបូង កាលពីថ្ងៃទី១៤ ខែមករា ឆ្នាំ២០១៧ នៅសណ្ឋាគារ សុខាភ្នំពេញ នៅជ្រោយចង្វា ។ លើកទី២ នៅថ្ងៃទី២១ ខែមករា ឆ្នាំ២០១៨ នៅកោះពេជ្រ និងលើកទី៣ នៅថ្ងៃទី១១ ខែមករា ឆ្នាំ២០១៩ នៅកោះពេជ្រ ។
ជំនួបរវាងសម្តេចតេជោនាយករដ្ឋមន្ត្រី និងអ្នកសារព័ត៌មាន៣លើកកន្លងមក ត្រូវបានចាត់ទុកថា ជាថ្ងៃប្រវត្តិសាស្ត្រមួយនៅក្នុងវិស័យសារព័ត៌មានកម្ពុជា ដែលជាឱកាសឲ្យអ្នកសារព័ត៌មានក្នុងស្រុក បានជួបជុំជាមួយអ្នកសារព័ត៌មានដូចគ្នាមកពីបណ្តាខេត្ត និងក្នុងរាជធានីភ្នំពេញ បានជជែកពិភាក្សាគ្នា និងចែករំលែកបទពិសោធន៍ឲ្យគ្នាទៅវិញទៅមក ។ថ្លែងក្នុងពិធីនេះ សម្ដេចតេជោ ហ៊ុន សែនមានប្រសាសន៍ថា ការជួបជុំរបស់យើងថ្ងៃនេះសំដៅពង្រឹងការងារពាក់ព័ន្ធនឹងវិស័យសារព័ត៌មានដើម្បីអភិវឌ្ឍន៍កម្ពុជា ។
សម្តេចតេជោ ហ៊ុន សែន បានកោតសរសើរក្រសួងព័ត៌មានដែលបានរៀបចំឲ្យមានជំនួបរវាងអ្នកសារព័ត៌មានជាមួយសម្ដេចតាំងពីឆ្នាំទី១ដល់ឆ្នាំទី៤ ។ សម្តេចតេជោ ក៏ថ្លែងអំណរគុណចំពោះការជូនពរសម្ដេច ក្នុងឱកាសខួប៣៥ឆ្នាំនៃការឡើងកាន់តំណែងជានាយករដ្ឋមន្ត្រីរបស់សម្ដេច នាថ្ងៃទី១៤ មករា (ឆ្នាំ១៩៨៥-ឆ្នាំ២០២០) ។ សម្តេចតេជោ ហ៊ុន សែន ថ្លែងថា ជំនួបជាមួយអ្នកសារព័ត៍មានដែលធ្វើឡើងនៅថ្ងៃនេះជារឿងចៃដន្យ មិនមែនជាការរៀបចំដើម្បីអបអរខួបឡើងកាន់តំណែងជានាយករដ្ឋមន្ត្រីខួប ៣៥ ឆ្នាំរបស់សម្តេចនោះទេ ។ ខែមករានេះ គឺមានព្រឹត្តិការពាក់ព័ន្ធនឹងសម្ដេចផ្ទាល់ចំនួន៨ ។ សូមអ្នកវិភាគទាំងឡាយផ្តល់សុភនិច្ឆ័យ ហើយកុំទាញយកប្រធានបទនេះឲ្យក្លាយជាបញ្ហារបស់កម្ពុជា ។
សម្តេចតេជោបានវាយតម្លៃថា ប្រសិនបើកម្ពុជាគ្មានការរីកចម្រើនផ្នែកសេដ្ឋកិច្ចទេ ស្ថាប័នសារព័ត៌មានដែលបានកកើតឡើងនឹងរលាយបាត់ទៅវិញដោយឯកឯង ។ សូមអរគុណដល់បណ្ដាក្រុមហ៊ុនឯកជន ដែលរួមចំណែកធ្វើឲ្យមានការរស់រានមានជីវិតនៃប្រព័ន្ធផ្សព្វផ្សាយ ដោយរួមចំណែកគាំទ្រដល់ស្ថាប័ន និងទូរទស្សន៍ដែលផ្តោតលើការផ្សាយព័ត៌មាន ។សម្តេចបានមើលឃើញថា ការផ្សព្វផ្សាយព័ត៌មានមានសារៈសំខាន់ណាស់ដល់ការអភិវឌ្ឍប្រទេស និងលើកកម្ពស់ចំណេះដឹងរបស់ប្រជាជន ។ មានតែស្ថានីយទូរទស្សន៍៣ប៉ុណ្ណោះ ដែលបានចូលរួមផ្សព្វផ្សាយហេតុការណ៍រលំបាក់អគារនៅខេត្តកែប រួមមានទូរទស្សន៍ជាតិកម្ពុជា BTV និង CNC ។ ការចូលរួមរបស់ស្ថាប័នព័ត៌មានទាំងរដ្ឋនិងឯកជន បានរួមចំណែកដល់ការរក្សាសន្តិភាព ស្ថិរភាពនយោបាយនិងម៉ាក្រូសេដ្ឋកិច្ច ។
ព្រឹត្តិការណ៍សំខាន់ៗទាំង៨ចំណុចនោះមាន ៖
ទី១-ថ្ងៃទី៧ ខែមករា ឆ្នាំ១៩៧៩ ថ្ងៃជ័យជម្នះផ្តួលរំលំខ្មែរក្រហម
ទី២-ថ្ងៃទី៨ ខែមករា ឆ្នាំ១៩៧៩ សម្តេចក្លាយជារដ្ឋមន្ត្រីការបរទេសវ័យក្មេងបំផុតលើពិភពលោក
ទី៣-ខួបលើកទី៣៥ឆ្នាំ នៃការក្លាយខ្លួនជានាយករដ្ឋមន្ត្រីក្នុងវ័យ៣២ឆ្នាំ នៅថ្ងៃទី១៤ ខែមករា ឆ្នាំ១៩៨៥
ទី៤-ខួប៣២ឆ្នាំ នៃការចរចារវាងសម្តេចព្រះនរោត្តម សីហនុ និងសម្តេច លើកទី២ នៅថ្ងៃទី២០-២១ ខែមករា ឆ្នាំ១៩៨៨ នៅសាំងហ្សែ៊រម៉ាំង នៅប្រទេសបារាំង
ទី៥-ខួបលើកទី២៤ឆ្នាំ នៃការចាប់ផ្តើមអនុវត្តនយោបាយឈ្នះ ឈ្នះ ដោយចាប់ផ្តើមនៅតំបន់ឱរ៉ាល់ ដឹកនាំដោយលោក កែ ពង្ស នៅខែមករា ឆ្នាំ១៩៩៦
ទី៦-ខួបលើកទី៤៤ឆ្នាំ នៃការប្រែក្លាយពីខ្លួនកំលោះទៅជាអ្នកមានភរិយា គឺថ្ងៃរៀបការរបស់ខ្ញុំនៅថ្ងៃទី៥ ខែមករា ឆ្នាំ១៩៧៦
ទី៧-ខួបលើកទី២០ ដែលបានក្លាយជាជីតារបស់ចៅស្រីលើកដំបូង ។ ពីមុនប្រែក្លាយពីកំលោះទៅជាអ្នកមានភរិយា ហើយក្រោយមកនៅថ្ងៃទី២៨ ខែមករា ឆ្នាំ២០០០ សម្តេចបានក្លាយជាជីតារបស់ចៅស្រីលើកដំបូង និងទី៨-កូនប្រុសស្រីរបស់សម្តេច៤នាក់ បានរៀបការនៅក្នុងខែមករា ។
សម្តេចតេជោ ក៏បានដាក់ចេញនូវពាក្យស្លោកជូនអ្នកសារព័ត៌មានថា «កុំបំពានសិទ្ធិអ្នកដទៃ កុំបំភ្លៃការពិត» ។ ពាក្យស្លោករបស់សម្តេចតេជោនេះ មិនបានដើរឆ្ងាយពីការឱ្យអ្នកសារព័ត៌មានប្រកាន់ក្រមសីលធម៌វិជ្ជាជីវៈជាអ្នកសារព័ត៌មាននោះឡើយ ៕
ចែករំលែកព័តមាននេះ