ថ្ងៃនេះ បើកសវនាការសំណុំរឿង កឹម សុខា
- ភ្នំពេញ
រាជធានីភ្នំពេញ ៖ ថ្ងៃនេះ ១៥ មករា ២០២០ សាលាដំបូងរាជធានីភ្នំពេញ បានបើកសវនាការលើសំណុំរឿងលោក កឹម សុខា…
រាជធានីភ្នំពេញ ៖ ថ្ងៃនេះ ១៥ មករា ២០២០ សាលាដំបូងរាជធានីភ្នំពេញ បានបើកសវនាការលើសំណុំរឿងលោក កឹម សុខា អតីតប្រធានគណបក្សសង្គ្រោះជាតិពាក់ព័ន្ធនឹងបទល្មើស«សន្ទិដ្ឋិភាពជាមួយបរទេស»ដែលស្មើនឹងទោសក្បត់ជាតិ តាមក្រមព្រហ្មទណ្ឌនៃព្រះរាជាណាចក្រកម្ពុជា ។ ទោះជាយ៉ាងណាក្តីសម្រាប់ការចូលរូមសវនាការនេះ ត្រូវបានតុលា ការកំណត់អនុញ្ញាតឲ្យចូលតែ៣០នាក់ប៉ុណ្ណោះពោលគឺមិនអាចលើសពីនេះបានទេ ដែលមកដល់ពេលនេះចំនួនកំណត់នោះបានពេញហើយ។
លោក អ៊ូ ច័ន្ទរ័ត្ន អតីតមន្ត្រីជាន់ខ្ពស់គណបក្សសង្គ្រោះជាតិ បានប្រាប់កោះសន្តិភាពនៅថ្ងៃទី១៤ខែមករា ឆ្នាំ២០២០ថា លោកមិនបានចូលរួមស្តាប់សវនាការលើសំណុំរឿងលោក កឹម សុខានោះទេ ព្រោះថាមកដល់ពេលនេះចំនួនបានពេញហើយ បើតាមខាងតុលាការប្រាប់ទៅក្រុមការងាររបស់លោក ។ លោក អ៊ូ ច័ន្ទរ័ត្ន បានបញ្ជាក់ថា ៖ «ខ្ញុំបានទទួលដំណឹងពីសាលាដំបូងពីម្សិលមិញហើយថាបន្ទប់សវនាការលោក កឹម សុខា ពេញហើយកាលពីថ្ងៃទី១៣ ខែមករា ចំនួន៣០នាក់ ។ ដូច្នេះខ្ញុំមិនអាចស្នើបានទេ អីុចឹងខ្ញុំមិនចូលរួមសវនាការនេះទេ»។ លោកបានឲ្យដឹងថា បើតាមការរៀបចំរបស់ខុទ្ទល័យលោកកឹម សុខា ឬមេធាវីរបស់លោកនោះ មានអតីតមន្ត្រីជាន់ខ្ពស់គណបក្សសង្គ្រោះជាតិជិត១០នាក់ ក្នុងនោះក៏មានលោក ប៉ុល ហំមផងដែរ ។
ទាក់ទិនននឹងសវនាការលើសំណុំរឿងលោក កឹម សុខា នេះដែរ ត្រូវបានលោក អ៊ូ ច័ន្ទរ័ត្ន លើកឡើងថា មានសេណារីយ៉ូមួយចំនួនដូចជាការផ្តល់យុត្តិធម៌ចំពោះលោក កឹម សុខា ដោយមានការបន្ធូរបន្ថយនិងផ្តល់សេរីភាព នោះរឿងប្រព័ន្ធអនុគ្រោះពន្ធ(EBA)ពីសហភាពអឺរ៉ុបមកកម្ពុជា នឹងអាចយកទៅពិភាក្សាសាជាថ្មីផងដែរ ។
ពេលនោះប្រពលរដ្ឋដែលប៉ះពាល់ពីប្រព័ន្ធអនុគ្រោះពន្ធនឹងលែងប៉ះពាល់ ដោយទទួលបានភាពវិជ្ជមានវិញ ហើយវិបត្តិសង្គមនឹងធូរស្រាល ។ ជាងនេះទៀត បញ្ហានយោបាយក៏ធូរស្រាលមកវិញដែរ។អតីតមន្ត្រីគណបក្សប្រឆាំងរូបនេះ លើកឡើងថា ក្នុងករណីដែលលោក កឹម សុខា មិនត្រូវបានលើកលែងឲ្យមានសេរីភាពវិញទេ នោះប្រព័ន្ធអនុគ្រោះពន្ធ(EBA)នឹងត្រូវបានផ្តាច់ ហើយលោក កឹមសុខា នឹងទទួលភាពអយុត្តិធម៌ ប្រជាពលរដ្ឋនឹងរងគ្រោះ សង្គមនឹងមានវិបត្តិ ហើយប្រជាធិបតេយ្យក៏មិនអាចងាយស្តារឡើងវិញដែរ។
ទោះជាយ៉ាងណាក្តី លោក អូ៊ ច័ន្ទរ័តុ្ន បានសម្តែងសុទិដ្ឋិនិយមថា អ្វីៗនឹងប្រសើរឡើងវិញជាងការគិតរបស់លោកផងដែរ ។ លោកថ្លែងថា ៖ «ខ្ញុំគិតថា លោកនឹងអាចត្រូវតុលាការបន្ធូរបន្ថយឲ្យនៅក្រៅឃុំ ឬអាចកាត់ទោសរួចហើយ នឹងមានការលើកលែងទោសដោយព្រះមហាក្សត្រ ផងដែរ» ។ ចំពោះដំណើរសវនាការលើសំណុំរឿងលោក កឹម សុខា នេះ លោក អ៊ូ ច័ន្ទរ័ត្ន អះអាងថាលោកមិនទៅឃ្លាំងមើលសវនាការនោះទេ ដោយសារការរារាំងពីសមត្ថកិច្ច ហើយការរារាំង(របាំង)នេះនៅឆ្ងាយពីតុលាការ ។ ជាងនេះទៀត បើសិនមានការជួបជុំណាមួយអាចនឹងមានការចោទប្រកាន់ពីអាជ្ញាធរ និងមិនចង់មានការប្រឈមជាមួយអ្នកជ្រុលនិយមមួយចំនួនដែលចោទប្រកាន់ថាលោកក្បត់បក្សឬក្បត់មេជាដើម ។
សូមជម្រាបថា សាលាដំបូងរាជធានីភ្នំពេញសម្រេចបើកសវនាការដំបូងលើសំណុំរឿងលោក កឹម សុខា រយៈពេល២ថ្ងៃគឺនៅថ្ងៃទី១៥ និង១៦ខែមករា ឆ្នាំ២០២០ ហើយប្រសិនបើសំណុំរឿងនេះស្មុគស្មាញច្រើន ដំណើរការសវនាការលើរឿងក្តីនេះ នឹងមានរយៈពេលរហូតដល់៣ខែ។ពាក់ព័ន្ធនឹងសំណុំរឿងរបស់លោក កឹម សុខានេះធ្លាប់ត្រូវបានក្រុមមេធាវីរបស់លោកឲ្យដឹងថា បានត្រៀមខ្លួនរួចជាស្រេចហើយក្នុងការតតាំងក្តីលើសំណុំរឿងនេះ និងនៅតែទទូចឲ្យមានការទម្លាក់បទចោទប្រកាន់លើលោក កឹម សុខា ដដែល ។ជាមួយគ្នានេះ ក្រុមមេធាវីរបស់លោកបានអះអាងថា សំណុំរឿងលោក កឹម សុខា គឺជារឿងរបស់អ្នកនយោបាយតែប៉ុណ្ណោះ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងនាពេលកន្លងមកថា ចំពោះសំណុំរឿងលោក កឹម សុខា ការសម្រេចយ៉ាងណាគឺជាឆន្ទានុសិទ្ធិរបស់តុលាការ មិនអាចអ្នកណាម្នាក់លូកដៃចូលក្នុងកិច្ចតុលាការបានទេ ។ គួររំឭកថា លោក កឹម សុខា បានត្រូវសមត្ថកិច្ចចាប់ខ្លួនកាលពីវេលារំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២០១៧ ។
ក្រោយពីជាប់ឃុំអស់រយៈពេលជាង១ឆ្នាំនៅពន្ធនាគារត្រពាំងផ្លុងក្នុងខេត្តត្បូងឃ្មុំ មកដល់ថ្ងៃទី១០ ខែវិច្ឆិកា ឆ្នាំ២០១៩ សាលាដំបូងរាជធានីភ្នំពេញ សម្រេចឲ្យលោក កឹម សុខា មកនៅគេហដ្ឋានរបស់លោកវិញ ប៉ុន្តែមិនឲ្យធ្វើសកម្មភាពទាក់ទងនឹងនយោ បាយឡើយ ។តុលាការបានអះអាងថា ការសម្រេចឲ្យមកនៅគេហដ្ឋានវិញ ដោយសារតែលោក កឹម សុខា បានគោរពត្រឹមត្រូវតាមកាតព្វកិច្ចនៃការដាក់ឱ្យស្ថិតក្រោមការត្រួតពិនិត្យតាមផ្លូវតុលាការ និងមានកិច្ចសហការល្អក្នុងដំណើរការនីតិវិធីរបស់តុលាការ ។
កាតព្វកិច្ចនៃការត្រួតពិនិត្យថ្មីតាមផ្លូវតុលាការ ដែលលោក កឹម សុខា ត្រូវអនុវត្តចាប់ពីពេលនេះ មាន៣ចំណុចគឺ ៖ ទី១-មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា ទី២-មិនត្រូវធ្វើសកម្មភាពនយោបាយ និង ទី៣-ត្រូវឆ្លើយតបនឹងការកោះហៅពីគ្រប់សមត្ថកិច្ច ។តាមការអះអាងរបស់លោក អ៊ូ ច័ន្ទរ័ត្ន បានឲ្យដឹងថា ដំបូងនេះតុលាការបើកសវានការលើសំណុំរឿងលោក កឹម សុខា អតីតប្រធានគណបក្សសង្គ្រោះជាតិរយៈពេល២ថ្ងៃ គឺថ្ងៃទី១៥និង១៦ ខែមករា ឆ្នាំ២០២០ ប៉ុន្តែបើសំណុំរឿងនេះស្មុគស្មាញខ្លាំង ដំណើរការសវនាការរឿងក្តីនេះនឹងមានរយៈពេលរហូតដល់៣ខែ ។
ក្នុងកិច្ចសម្ភាសន៍មួយជាមួយកោះសន្តិភាព នាព្រឹកថ្ងៃទី១៤ ខែមករា ឆ្នាំ២០២០ តាមទូរស័ព្ទដែលបានសាកសួរថា បើលោក កឹម សុខា មានសេរីភាព តើរូបលោកអាចនឹងវិលចូលទៅ គណបក្សសិទ្ធិមនុស្សវិញឬទ ? លោក អ៊ូ ច័ន្ទរ័ត្នលើកឡើងថា លោកកំពុងតែគិតថា បើសិនមិនអាចស្តារលទ្ធិប្រជាធិបតេយ្យឲ្យងើបឡើងវិញទេ នោះលោកនឹងសម្រាកពីឆាកនយោបាយមួយរយៈពេល ដោយមិនចូលរួមក្នុងបញ្ហានយោបាយទាំងអស់។
លោកបានឲ្យដឹងថា ការសម្រាកនេះមិនទាន់សម្រេចថានៅពេលណាទេ ប៉ុន្តែលោកនៅចាំមើលលទ្ធផលនៃសវនាការលោក កឹម សុខា សិន ។ទោះជាយ៉ាងណាក្តី លោក អ៊ូ ច័ន្ទរ័ត្ន បានបង្ហាញជំហរថា លោកចង់ឲ្យអ្នកប្រជាធិបតេយ្យរួមរួមគ្នា បើមិនដូច្នេះទេមិនអាចយកឈ្នះគណបក្សប្រជាជនកម្ពុជា ដែលជាគណបក្សកាន់អំណាចអស់រយៈពេលជាច្រើនឆ្នាំមកហើយនោះទេ។
លោកបានលើកឡើងថា ទោះបីជាលោក កឹមសុខា មានសេរីភាពឡើងវិញក៏ដោយ ក៏ការស្តារលទ្ធិប្រជាធិបតេយ្យនៅកម្ពុជាតែដើរយឹតដដែល បើសិនលោក កឹម សុខា ចេញមកដឹកនាំគណបក្សនយោបាយណាមួយ ។ លោក អូ៊ ច័ន្ទរ័ត្ន បានបញ្ជាក់ថា ៖ «ខ្ញុំជឿថានឹងមានការពិបាក ដោយសារប្រជាពលរដ្ឋច្បាស់មើលឃើញលោក កឹម សុខា ស្ថិតនៅក្រោមគណបក្សកាន់អំណាចរួចហើយ ។ ជាងនេះទៀត ក្រុមសម រង្ស៊ី និយមនឹងវាយប្រហារលើលោក កឹម សុខា ជាមិនខាន ។ ដូច្នេះ ការងើបឡើងវិញនៃគណបក្សប្រឆាំងណាមួយ ដែលដឹកនាំដោយលោក កឹម សុខា ក៏នឹងជួបឧបសគ្គច្រើន ហើយការស្តារលទ្ធិប្រជាធិបតេយ្យពិបាក»។
ទោះបីជាយ៉ាងណាក្តី លោក អ៊ូ ច័ន្ទរ័ត្ន បានលើកឡើងថា នៅពេលលោកកឹម សុខា មាន សេរីភាព ប្រពលរដ្ឋនឹងមិនប៉ះពាល់ក្នុងជីវភាពរស់នៅនោះទេ ។ លោកគូសបញ្ជាក់ថា ៖ «តែខ្ញុំសូមជម្រាបថា ទោះបីលោក កឹម សុខា មានសេរីភាពវិញក្តី ក៏លទ្ធិប្រជាធិបតេយ្យមិនអាចស្តារឡើងវិញនោះទេ ហើយទោះបីជាលោកបំពេញតួនាទី ជាអ្នកនយោបាយវិញក៏ដោយ»។
ការលើកឡើងនេះ គឺបន្ទាប់ពីលោក អ៊ូ ច័ន្ទរ័ត្ន បានជួបពិភាក្សាជាមួយសមាជិកគណបក្សប្រជាធិបតេយ្យមូលដ្ឋាន កាលពីពេលកន្លងមក ប៉ុន្តែលោកប្រកាសជំហរថាមិនចូលរួមជាមួយគណបក្សប្រជាធិបតេយ្យមូលដ្ឋាននោះទេ។ លោកថ្លែងថា ៖ «ខ្ញុំមិនចូលជាមួយគណបក្សប្រជាធិបតេយ្យមូលដ្ឋាន ឬគណបក្សណាមួយទេ ។ ប៉ុន្តែខ្ញុំមានបំណងបង្រួបបង្រួមអ្នកប្រជាធិបតេយ្យ ឬអ្នកដែលមាននិន្នការក្រៅពីគណ បក្សក្នុងរាជរដ្ឋាភិបាល ។ ខ្ញុំគិតថា អ្នកដែលបែកបាក់តូចទៅៗ រួមទាំងគណបក្សសង្គ្រោះជាតិផង មិនអាចធ្វើដៃគូប្រកួតជាមួយគណបក្សកាន់អំណាចបានទេ» ។
លោក អូ៊ ច័ន្ទរ័ត្ន បន្តថា បើគណបក្សប្រឆាំងនៅតែបែកបាក់តូចទៅៗ នោះប្រទេសកម្ពុជានឹងធ្លាក់ក្នុងការដឹកនាំប្រទេសដោយគណបក្សកាន់អំណាចរយៈពេលយូរអង្វែង ក្នុងការគ្រប់គ្រងប្រព័ន្ធនយោបាយ ដែលករណីនេះនឹងធ្វើឲ្យប្រទេសនេះមិនជឿនលឿននោះទេ ។លោកបានលើកឡើងថា ចំពោះជំនួបនោះលោកបានលើកពីទស្សនៈថា មានតែការរួបរួមគ្នារវាងអ្នកនៅក្រៅរាជរដ្ឋាភិបាលទេ ទើបធ្វើឲ្យទៅជាកម្លាំងមួយដែលអាចប្រកូតប្រជែងជាមួយគណបក្សកាន់អំណាចបាន ។ ជាមួយគ្នានេះ លោកក៏បានបង្ហាញឆន្ទៈថា
លោកចង់ឲ្យមានការជួបជាមួយគណបក្សកាន់អំណាច ដើម្បីធ្វើការសម្រួលសម្រួលពីបញ្ហាប្រជាធិបតេយ្យនៅពេលអនាគតផងដែរ ។
មេធាវីលោក កឹម សុខា ថាមិនបានទទួលព័ត៌មានគ្រោងសវនាការលោកកឹម សុខា រយៈពេល3ខែ
មេធាវីលោក កឹម សុខា បានអះអាងថា លោកមិនទាន់ទទួលបានព័ត៌មានពីការបើកសវនាការលើសំណុំរឿងកូនក្តីរបស់លោករយៈ ពេល៣ខែនោះទេ ។ការបញ្ជាក់របស់លោកមេធាវីនេះ គឺបន្ទាប់ពីលោក តាំង ស៊ុនឡាយ ប្រធានសាលាដំបូងរាជ ធានីភ្នំពេញឲ្យដឹងថា សវនាការជំនុំជម្រះលើសំណុំរឿងលោក កឹម សុខា អតីតមេដឹកនាំគណបក្សសង្គ្រោះជាតិ អាចប្រើរយៈពេលទៅដល់៣ខែ ។
លោក ចាន់ ចេន សហមេធាវីលោក កឹម សុខា បានប្រាប់កោះសន្តិភាពនារសៀលថ្ងៃទី១៤ខែមករា ឆ្នាំ២០២០ថា៖ «ខ្ញុំមិនទាន់ទទួលបាន ព័ត៌មានពីសវនាការរយៈពេល៣ខែ ឬលើសពីនេះទេ ប៉ុន្តែយើងដឹងតែថា តុលាការចេញកាលបរិច្ឆេទបើកសវនាការរយៈពេល២ថ្ងៃ គឺថ្ងៃទី១៥ និង១៦ ខែមករា តែប៉ុណ្ណោះ» ។ លោក ចាន់ ចេន បានឲ្យដឹងថា សម្រាប់សវនាការរយៈពេល២ថ្ងៃនេះ ក្រុមមេធាវីលោកចំនួន៤រូបនឹងចូលការពារក្តី ប៉ុន្តែលោកមិនទាន់ធ្វើអត្ថាធិប្បាយចំពោះដំណើររឿងក្តីនោះទេ ដោយសារថាមិនទាន់ចូលស្តាប់ក្នុងសវនាការនៅឡើយ ។
ទោះជាយ៉ាងណា លោកមេធាវីបានអះអាងថា ក្រុមមេធាវីរបស់លោកមានក្តីសង្ឃឹមក្នុងការតតាំងនៅក្នុងអង្គសវនាការនៅថ្ងៃទី១៥ និង១៦ ខែមករានេះ ។ ទាក់ទិននឹងការលើកឡើងរបស់លោកមេធាវីនេះ គឺបន្ទាប់ពីវិទ្យុសំឡេងសហរដ្ឋអាមេរិកបានស្រង់សម្តីលោក តាំង ស៊ុនឡាយ ផ្សាយនាព្រឹកថ្ងៃទី១៤ ខែមករាថា ៖ «ដោយសាររឿងធំប្រហែលជាយើងគ្រោង៣ខែ ។ យើងគ្រោង៣ខែបានចប់» ។ លោកបន្ថែមថា តុលាការគ្រោងយកថ្ងៃពុធនិងថ្ងៃព្រហស្បតិ៍រៀងរាល់សប្តាហ៍ដើម្បីដំណើរការ សវនាការនេះ ។
បើតាមប្រភពដដែលបានឲ្យដឹងថា លោក តាំង សុ៊នឡាយ ក៏បានបញ្ជាក់ថា បន្ទប់សវនាការអាចដាក់មនុស្សបានតែ៣០នាក់ប៉ុណ្ណោះ ហើយភាគច្រើនកន្លែងនេះត្រូវផ្តល់ដល់មន្ត្រីទូតនិងមន្ត្រីសិទ្ធិមនុស្ស មិនមែនសម្រាប់អ្នកសារព័ត៌មាននោះទេ ។ លោកថ្លែងថា «ពីព្រោះថាយើងអត់មានជម្រើសល្អជាងហ្នឹងទេ គ្រាន់តែខាងទូតចូលរួមហ្នឹងចូលជិត២០នាក់បាត់ហើយ ។ អាហ្នឹងសុំអធ្យាស្រ័យ ។ មិនមែនថា យើងត្បិតត្បៀតមិនឲ្យអ្នកសារព័ត៌មានចូលទេ ប៉ុន្តែជម្រើសវាអត់មានអុីចឹង» ៕
ចែករំលែកព័តមាននេះ