ខេត្តប៉ៃលិន ៖ ការប្រកួតកីឡាវាយសីដណ្ដើមពានរង្វាន់៧មករាលើកទី២០ចាប់ ពីថ្ងៃទី១១ដល់១២ មករា ឆ្នាំ២០២០ បានបញ្ចប់ដោយជោគជ័យ ។ ជាលទ្ធផលក្រុមម្ចាស់ផ្ទះខេត្តប៉ៃលិនដណ្ដើមបានមេដាយច្រើនជាងគេដែលមានរហូតដល់ទៅ១២គ្រឿងក្នុងនោះមេដាយមាស៣គ្រឿង មេដាយប្រាក់១គ្រឿង…
ខេត្តប៉ៃលិន ៖ ការប្រកួតកីឡាវាយសីដណ្ដើមពានរង្វាន់៧មករាលើកទី២០ចាប់ ពីថ្ងៃទី១១ដល់១២ មករា ឆ្នាំ២០២០ បានបញ្ចប់ដោយជោគជ័យ ។ ជាលទ្ធផលក្រុមម្ចាស់ផ្ទះខេត្តប៉ៃលិនដណ្ដើមបានមេដាយច្រើនជាងគេដែលមានរហូតដល់ទៅ១២គ្រឿងក្នុងនោះមេដាយមាស៣គ្រឿង មេដាយប្រាក់១គ្រឿង និងមេដាយសំរឹទ្ធ៨គ្រឿង។
លោក ជាម សុភា អគ្គលេខាធិការស្ដីទីសហព័ន្ធកីឡាវាយសីកម្ពុជាបានឱ្យដឹងនៅក្នុងពិធីបិទការប្រកួតថា សម្រាប់ការប្រកួតឆ្នាំនេះមានក្លិបនិងអត្តពលិកចូលរួមប្រកួតកើនឡើងជាងបណ្ដាឆ្នាំកន្លងទៅ ដែលមានក្លិបចំនួន១៤ អត្តពលិក១៦៤នាក់ក្នុងនោះកីឡាការិនី១៨នាក់ ។ លោកថា ការប្រកួតដំណើរការទៅដោយរលូនតាំងពីដើមដល់ចប់ដោយសារតែបានការជួយឧបត្ថម្ភការស្នាក់នៅ ហូបចុកទាំងស្រុងពីសំណាក់ម្ចាស់ផ្ទះខេត្តប៉ៃលិន។
លោក ជាម សុភា បន្តថា ការប្រកួតដណ្ដើមពានរង្វាន់៧មករាដែលបានធ្វើឡើងជារៀងរាល់ឆ្នាំនេះមិនត្រឹមតែដើម្បីអបអរថ្ងៃជ័យជម្នះ៧មករាប៉ុណ្ណោះនោះទេ គោលបំណងសំខាន់គឺដើម្បីស្វែងរកអត្តពលិកវ័យក្មេងដែលមានស្នាដៃនិងទេពកោសល្យយកមកប្រមូលផ្ដុំ និងបណ្ដុះបណ្ដាលឱ្យកា្លយជាកីឡាករជម្រើសជាតិសម្រាប់ត្រៀមប្រកួតនៅលើឆាកអន្តរជាតិក៏ដូចជាឆ្ពោះទៅដណ្ដើមមេដាយការប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាធ្វើជាម្ចាស់ផ្ទះជាលើកដំបូង។
ចំពោះលទ្ធផលបច្ចេកទេសដែលបានមកពីការប្រកួតរយៈពេល២ថ្ងៃកន្លងមកនេះ ក្រុមម្ចាស់ផ្ទះខេត្តប៉ៃលិនឈរនៅលេខរៀងទី១ដោយដណ្ដើមបានមេដាយច្រើនជាងគេ ។ ចំណាត់ថ្នាក់លេខ២បានទៅលើខេត្តកំពង់ឆ្នាំងដណ្ដើមបានមេដាយ៤គ្រឿងក្នុងនោះមេដាយ មាស២គ្រឿង មេដាយប្រាក់១គ្រឿង និងមេដាយ សំរឹទ្ធ១គ្រឿង ។ ខេត្តមណ្ឌលគិរីឈរនៅក្នុងចំណាត់ថ្នាក់លេខ៣ ដណ្ដើមបានមេដាយ៣ គ្រឿងក្នុងនោះមេដាយមាស១គ្រឿង និងមេដាយ ប្រាក់២គ្រឿង ៕ (កែសម្រួលដោយ ៖ បុប្ផា)
ចែករំលែកព័តមាននេះ