លោកមហាសេដ្ឋី យ៉ាសាគូ ម៉ាអេហ្សាវ៉ា (Yasaku Maezawa) ដែលជាជនជាតិជប៉ុនមួយរូបបានកក់សំបុត្រគ្រប់កៅអីនៅលើយានរបស់ SpaceX ដំបូងដែលអាចនាំអ្នកដំណើរទៅអវកាស និងជុំវិញព្រះច័ន្ទ ។ តែក្នុងពេលថ្មីៗនេះលោកបានប្រកាសជាសាធារណៈ ថាលោកកំពុងតែស្វែងរកដៃគូស្រីម្នាក់ដើម្បីទៅជាមួយលោក ។ ហើយដំណើរការក្នុងការរកនារីដ៏មានសំណាងនេះនឹងត្រូវបានថតចូលក្នុងកម្មវិធីមួយឈ្មោះថា Full Moon Lovers ដែលនឹងត្រូវបានផ្សាយនៅលើ AbemaTV ។
យោងទៅតាមគេហទំព័រ Full Moon Lovers បានឲ្យដឹងថា មហាសេដ្ឋីអាយុ ៤៤ឆ្នាំខាងលើកំពុងតែរកនារីម្នាក់ដែលមានអាយុចាប់ពី ២០ឆ្នាំឡើងទៅដែលនៅលីវ តែនារីម្នាក់នោះត្រូវតែមានចរិតរួសរាយ និងតែងតែវិជ្ជមានជានិច្ច ។ លើសពីនេះទៅទៀត នារីនោះត្រូវតែមានចំណាប់អារម្មណ៍ចង់ទៅអវកាស ស្រលាញ់ជីវិត និងជាមនុស្សដែលចង់ឲ្យមានសន្តិភាពលើពិភពលោក ។
គួរបញ្ជាក់ផងដែរថា លោក អេហ្សាវ៉ា ធ្លាប់ជាអ្នកលេងស្គរមួយរូបដែលបានបង្កើតគេហទំព័រលក់សម្លៀកបំពាក់ Zozotown ដែលបានកសាងទ្រព្យសម្បត្តិរបស់លោក ។ នៅឆ្នាំ ២០១៨ លោកបានសម្រេចចិត្តថាលោកចង់ទៅព្រះច័ន្ទ ហើយក៏ទិញសំបុត្រសម្រាប់កៅអីទាំង ៨ របស់ SpaceX Starship ដែលនឹងហោះហើរនៅឆ្នាំ ២០២៣ ។
ជាដំបូងលោកចង់នាំសិល្បករទៅជាមួយលោក ប៉ុន្តែលោកបានផ្លាស់ប្តូរគំនិតក្នុងពេលថ្មីៗនេះ និងបានបកស្រាយថា «ខ្ញុំបានចាប់ផ្តើមគិតថាវាជាឱកាសល្អមួយក្នុងការប្រឈមមុខនឹងការស្រលាញ់តែមនុស្សស្រីម្នាក់ដែលខ្ញុំអាចមើលឃើញបានស្រពិចស្រពិល ។ ខ្ញុំបានសម្រេចចិត្តចូលរួមកម្មវិធីនេះ ។ ខ្ញុំចង់រកដៃគូជីវិតមួយរូប ។ ហើយជាមួយនឹងដៃគូនាថ្ងៃអនាគតម្នាក់នេះ ខ្ញុំចង់ស្រែកពីក្តីស្រលាញ់របស់ពួកយើង និងសន្តិភាពពិភពលោកពីអវកាសមក» ។
នារីៗដែលចាប់អារម្មណ៍អាចចុះឈ្មោះសម្រាប់កម្មវិធីនេះបានរហូតដល់ថ្ងៃទី ១៧ខែមករា ហើយពួកគេនឹងត្រូវបានជ្រើសរើសនៅថ្ងៃទី ២៦ខែមករា ដើម្បីចូលរួមកម្មវិធីនៅពាក់កណ្តាលខែកុម្ភៈ ។ នៅចុងខែមីនា លោក អេហ្សាវ៉ា នឹងសម្រេចចិត្តលើនារីម្នាក់ដែលលោកនឹងនាំទៅកាន់ព្រះច័ន្ទ ៕ កែសម្រួលដោយ ៖ សុឃាក់
ចែករំលែកព័តមាននេះ