តាមប្រភពព័ត៌មាន Soccer Laduma បានឱ្យដឹងថា មហាសេដ្ឋីម្នាក់ក្នុងចំណោមមហាសេដ្ឋីដែលមានជាងគេបំផុតនៅទ្វីបអាហ្វ្រិក អាចនឹងចូលប្រឡូកក្នុងពិភពបាល់ទាត់នាពេលឆាប់ៗនេះ បន្ទាប់ពីបានបញ្ជាក់ម្តងទៀតថាគាត់ចង់ទិញក្លិបកាំភ្លើងធំ Arsenal។
អ្នកជំនួញជនជាតិនីហ្សេរីយ៉ា Aliko Dangote ដែលត្រូវបានគេជឿជាក់ថាជាអ្នកមានបំផុតនៅទ្វីបអាហ្វ្រិក បានបើកចំហពីគោលបំណងស្រឡាញ់ក្លិបកាំភ្លើងធំ Arsenal។ មហាសេដ្ឋីវ័យ ៦២ឆ្នាំរូបនេះ ដែលជាប់នៅលំដាប់លេខរៀងទី១៣៦ ក្នុងតារាងអ្នកមានជាងគេលើ Forbes បានគូសបញ្ជាក់ជាថ្មីម្តងទៀតអំពីផែនការរបស់គាត់ក្នុងការទិញយកក្លិប Arsenal ដែលស្ថិតនៅ Premier League។
លោកបានប្រាប់ក្នុងកម្មវិធី The David Rubenstein Show ដែលត្រូវបានដកស្រង់សម្តីដោយសារព័ត៌មាន Football Londonថា៖«វាគឺជាក្រុមដែលខ្ញុំចង់ទិញនៅថ្ងៃណាមួយ ប៉ុន្តែអ្វីដែលខ្ញុំនិយាយគឺយើងមានគម្រោងដែលមានតម្លៃ ២០ពាន់លានដុល្លារ ហើយនោះជាអ្វីដែលខ្ញុំពិតជាចង់ផ្តោតអារម្មណ៍»។
លោកបានបន្តថា៖«ខ្ញុំកំពុងព្យាយាមបង្ហោយដៃនៅក្នុងការស្ថាបនាក្រុមហ៊ុន និង ក្រោយពីរួចដៃហើយ ប្រហែលជាយើងអាចចាត់ការនៅក្នុងឆ្នាំ២០២១ នៅក្នុងរឿងនេះ។ ខ្ញុំមិនទាន់ទិញ Arsenal នាពេលនេះទេ។ ខ្ញុំនឹងទិញ Arsenal ពេលខ្ញុំបញ្ចប់គម្រោងទាំងអស់នេះ ព្រោះខ្ញុំកំពុងព្យាយាមឱ្យក្រុមហ៊ុនសម្រេចដល់កម្រិតមួយទៀត»។
គួរបញ្ជាក់ផងដែរថា នេះមិនមែនជាលើកទីមួយទេដែលលោក Dangote បាននិយាយអំពីផែនការរបស់គាត់សម្រាប់ក្រុម Arsenal ដោយបានបង្ហាញរួចហើយនៅឆ្នាំ ២០១៨ ថាគាត់ចង់ទិញក្លិបនេះ៕
ចែករំលែកព័តមាននេះ