ស្ទើរតែមនុស្សគ្រប់គ្នាហើយដែលចង់បោះបង់ការងារ និងដើរកម្សាន្តជុំវិញពិភពលោក ប៉ុន្តែសម្រាប់មនុស្សមួយចំនួនវាមិនមែនជាក្តីសុបិនដែលមិនអាចកើតមានឡើងបានទេ ។ ផ្ទុយមកវិញ ពួកគេបានធ្វើឲ្យការធ្វើដំណើរជុំវិញពិភពលោកក្លាយជាអាជីវកម្មមួយដែលជួយឲ្យពួកគេរកលុយទៅវិញ ។ អ្នកទាំងនេះធ្វើដំណើរទៅកាន់ទីក្រុងខុសៗគ្នា សាកល្បងស្នាក់នៅសណ្ឋាគារ បរភោគអាហារនៅភោជនីយដ្ឋានផ្សេងៗ និងទៅកម្សាន្តរមណីយដ្ឋានផ្សេងៗ ដើម្បីចែករំលែកវាជាមួយអ្នកដទៃលើ Instagram ជាការស្រេច ។
ប្រាកដណាស់ ការកសាង និងរក្សាក្រុមអ្នកគាំទ្រលើ Instagram មិនមែនជារឿងងាយដែលមនុស្សគ្រប់គ្នាអាចធ្វើបានទេ ហើយវាអាស្រ័យទៅនឹងសមត្ថភាពរបស់អ្នកក្នុងការចែករំលែកអ្វីដែលអ្នកដទៃចូលចិត្តដើម្បីអាចរកអ្នកឧបត្ថម្ភ និងដៃគូសហការសម្រាប់អាជីវកម្មអ្នកបាន ។
យ៉ាងណាក្តី យោងទៅតាមអ្នកជំនាញ Instagram គឺអ្នកស្រី អេលីស ដាម៉ា (Elise Darma) បានឲ្យដឹងថា ប្រាក់ចំណូលរបស់អ្នកទាំងនេះអាស្រ័យលើកត្តាពីរយ៉ាងគឺចំនួនមនុស្សដែល Follow ពួកគេ និងអត្រានៃមនុស្សដែលទំនាក់ទំនងជាមួយនឹងពួកគេលើ Instagram ។
យោងទៅតាមសារព័ត៌មាន Financial Times បានឲ្យដឹងថា ប្រសិនបើអ្នកមានអ្នក Follow ប្រមាណ ១០០,០០០នាក់នោះ អ្នកអាចទាមទារប្រមាណ ២,៧០០ដុល្លារឯណោះសម្រាប់រាល់ការផ្សព្វផ្សាយឲ្យអតិថិជនលើ Instagram របស់អ្នកម្តង ។ លើសពីនេះទៅទៀត អ្នកដែលមានអ្នក Follow ពី ៤ ទៅ ២០លាននាក់អាចរកបានពី ៦ពាន់ដុល្លារទៅ ១៧,៥០០ដុល្លារសម្រាប់រាល់ការផ្សព្វផ្សាយម្តងផងដែរ ។
តើអ្នកត្រូវការបទពិសោធន៍អ្វីខ្លះដើម្បីប្រកបការងារនេះ?ក្រៅពីជាមនុស្សដែលស្រលាញ់ និងមានសមត្ថភាពក្នុងការធ្វើដំណើរជុំវិញពិភពលោកហើយ អ្នកត្រូវមានស្មាតហ្វូន ជំនាញថតរូបគួរសម និងជំនាញក្នុងការទាក់ទងទៅកាន់ក្រុមហ៊ុនដែលចង់ផ្សព្វផ្សាយពាណិជ្ជកម្ម ។
ពេលដែលអ្នកចាប់ផ្តើមដំបូង អ្នកប្រហែលជាត្រូវផ្ញើអ៊ីមែល និង Direct Message ទៅកាន់ក្រុមហ៊ុនរាប់ពាន់ក្រុមហ៊ុនមុននឹងអាចទទួលបានការសហការមួយក្នុងចំណោមនោះ ។ លើសពីនេះទៅទៀត អ្នកប្រហែលជាត្រូវចេញមុខដោយខ្លួនអ្នកផ្ទាល់ក្នុងការវាយតម្លៃលើផលិតផល ឬសេវាកម្មពួកគេផ្ទាល់ផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ