សម្តេចតេជោ រដ្ឋមន្ត្រីទាំងអស់ និងឧត្តមក្រុមប្រឹក្សាពិគ្រោះ និងផ្តល់យោបល់ដែលរួមមាន សមាជិកជាគណបក្សទាំងអស់ដែលបានចូលរួមការបោះឆ្នោតកាលពីឆ្នាំ២០១៨ នឹងជួបអ្នកសារព័ត៌មានទូទាំងប្រទេស នៅល្ងាចថ្ងៃទី១៤ ខែមករានេះ។
នេះជាលើកដំបូង ដែលមានការចូលរួមពីរដ្ឋមន្ត្រីទាំងអស់ រួមជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលមានសមាជិកជាគណបក្សនយោបាយដែលចូលរួមការបោះឆ្នោតកាលពីឆ្នាំ២០១៨ ក្នុងជំនួបជាមួយអ្នកសារព័ត៌មានក្រោមគំនិតផ្តួចផ្តើមរបស់សម្តេចតេជោ ហ៊ុន សែន ដែលទទួលស្គាល់តួនាទីដ៏មានសារសំខាន់របស់សារព័ត៌មានៅក្នុងសង្គមប្រជាធិបតេយ្យ។
ដូច្នេះវានឹងក្លាយជាឱកាសដ៏កម្រមួយ ដើម្បីធ្វើយ៉ាងណាអោយមានការយល់គ្នាកាន់តែច្បាស់រវាងអ្នកសារព័ត៌មាន មន្ត្រីរដ្ឋាភិបាល និងគណបក្សនយោបាយ។
ទាំងអ្នកសារព័ត៌មាន រដ្ឋាភិបាល និងគណបក្សនយោបាយ មានបេសកកម្មរួមគ្នាមួយគឺបម្រើផលប្រយោជន៍ជាតិ និងប្រជាជន។
ប៉ុន្តែទោះបីជាយ៉ាងណាក៏ដោយចុះ គេមានភារកិច្ច និងការទទួលខុសត្រូវផ្សេងៗគ្នា។ ក្នុងការបំពេញ ភារកិច្ចផ្សេងៗគ្នានេះ ពេលខ្លះក៏នាំអោយមានការយល់ច្រឡំ ឬក៏ការមិនសប្បាយចិត្តទៅលើគ្នាទៅវិញទៅមក។ អ្នកសារព័ត៌មានពេលខ្លះត្រូវបន្ទោសថា ចូលចិត្តផ្សាយតែព័ត៌មាន អវិជ្ជមាន ជាជាងវិជ្ជមាន ខណៈដែលអ្នកសារព័ត៌មានរអ៊ូអំពីភាពស្ទាក់ស្ទើរ និងយឺតយ៉ាវរបស់មន្ត្រី និងអ្នកនយោបាយនៅក្នុងការផ្តល់ព័ត៌មាន។
ខណៈដែលរដ្ឋាភិបាល និងអ្នកនយោបាយមានភារកិច្ចដឹកនាំប្រទេសឱ្យមានសន្តិភាព ការអភិវឌ្ឍន៍ យុត្តិធម៌សង្គមជាដើម ដោយធ្វើយ៉ាងណាអោយប្រទេសជាតិស្ថិតនៅលើផ្លូវដ៏ត្រឹមត្រូវមួយ តាមរយៈការរៀបចំកម្មវិធីនយោបាយ និងអនុវត្តន៍កម្មវិធីនយោបាយយ៉ាងមានប្រសិទ្ធភាពនោះ អ្នកសារព័ត៌មានមានតួនាទីឃ្លាំមើល និងធ្វើសេចក្តីរាយការណ៍ព័ត៌មានជូនដល់ប្រជាជន ដើម្បីអោយធ្វើការសម្រេចចិត្តជ្រើសរើសមេដឹកនាំរបស់ពួកគេតាមរយៈការបោះឆ្នោត។
អ្នកបោះឆ្នោតដែលមានព័ត៌មានគ្រប់គ្រាន់ គឺជាកត្តាដ៏ចាំបាច់នៅក្នុងសង្គមប្រជាធិបតេយ្យ។
ក្នងនាមជាអ្នកសារព័ត៌មាន យើងគ្រប់គ្នាសប្បាយចិត្ត និងគាំទ្រដល់គ្រប់កិច្ចប្រឹងប្រែងដើម្បីធ្វើអោយមានលំហូរសេរីព័ត៌មានដែលមានសារសំខាន់បំផុតនៅក្នុងសង្គមប្រជាធិបតេយ្យ។
រដ្ឋធម្មនុញ្ញប្រទេសកម្ពុជា បានចែងថា កម្ពុជាកាន់លទ្ធិប្រជាធិបតេយ្យ ហើយសេរីភាពសារព័ត៌មាន និងសេរីភាពពាក់ព័ន្ធផ្សេងទៀតត្រូវបានធានា។
ការវិវត្តន៍នយោបាយចាប់តាំងពីឆ្នាំ២០១៧ មកនាំអោយមានការិះគន់អំពីដំណើរថយក្រោយនៃលទ្ធិប្រជាធិបតេយ្យនៅកម្ពុជា។ ប៉ុន្តែខាងរដ្ឋាភិបាលកម្ពុជា នៅតែអះអាងថាកម្ពុជា ធ្វើដំណើរលើផ្លូវ ប្រជាធិបតេយ្យដ៏រឹងមាំមូយ។
ការជួបជុំនៅថ្ងៃទី១៤ ខែមករា ជាភស្តុតាងនៃការយកចិត្តទុកដាក់របស់សម្តេចតេជោនិងរដ្ឋាភិបាល ដើម្បីពង្រឹងសេរីភាពសារព័ត៌មាននៅកម្ពុជា ព្រមទាំងលទ្ធិប្រជាធិបតេយ្យ។
ប៉ុន្តែទោះបីជាយ៉ាងណាក៏ដោយចុះ លំហូរសេរីនៃព័ត៌មានពាក់ព័ន្ធនឹងកត្តាជាច្រើន។ សម្តេចតេជោ បានបង្ហាញអំពីឆន្ទៈនយោបាយរបស់ថ្នាក់ដឹកនាំនៅក្នុងការលើកស្ទួយសេរីភាពសារព័ត៌មាននៅប្រទេសកម្ពុជា។ ប៉ុន្តែសេរីភាពសារព័ត៌មានរឹងមាំ ឬទន់ខ្សោយក៏ទាក់ទងផងដែរ ទៅលើវិជ្ជាជីវ:របស់អ្នកសារព័ត៌មានទាក់ទងទៅនឹងទំនាក់ទំនងរវាងអ្នកសារព័ត៌មាន និងអ្នកនាំពាក្យ ឬក៏មនុស្សទទួលខុសត្រូវផ្នែកព័ត៌មាននៅក្នុងស្ថាប័នរដ្ឋ ព្រមទាំងកត្តាផ្សេងៗមួយចំនួនទៀត។
សេរីភាពសារព័ត៌មាននឹងកាន់តែបើកជើងមេឃរបស់វាកាន់តែទូលំទូលាយ កាលបើអ្នកសារព័ត៌មាន មានសមត្ថភាពគួបផ្សំនឹងសេរីភាពដែលគេមាន។ នៅក្នុងន័យនេះ វាមានសារសំខាន់ខ្លាំងណាស់ ដល់ការចូលរួមចំណែកនៅក្នុងការបណ្តុះបណ្តាលអ្នកសារព័ត៌មានអោយមានចំណេះដឹងខ្ពង់ខ្ពស់ និងមានសីលធម៌ ព្រមទាំងមានឆន្ទៈខ្ពស់នៅក្នុងការលើកកម្ពស់បេសកកម្មបម្រើផលប្រយោជន៍របស់មហាជនទូទៅដែលជាបេសកកម្មធំបំផុតរបស់សារព័ត៌មាន។
ភាពក្លាហានរបស់អ្នកសារព័ត៌មានក៏មានសារសំខាន់ខ្លាំងណាស់ដែរ។ អ្នកសារព័ត៌មានដែលមានចំណេះដឹងខ្ពង់ខ្ពស់តែខ្វះភាពក្លាហាន ប្រៀបដូចជា «ដាវមុត ដែលមិនដកចេញពីស្រោម»។ ក្នុងន័យនេះ អ្នកសារព័ត៌មានត្រូវហ៊ាននិយាយពិត និយាយត្រង់ រាល់គ្រប់បញ្ហាទាំងអស់នៅក្នុងសង្គម មិនថា ព័ត៌មាន វិជ្ជមាន ឬអវិជ្ជមានឡើយ។
ការសរសេរអំពីព័ត៌មាន វិជ្ជមាន ពិតប្រាកដនឹងក្លាយជាការលើកទឹកចិត្តដល់រដ្ឋាភិបាល ដើម្បីបន្តការងារ សកម្មរបស់ខ្លួនសម្រាប់ប្រជាជន និងប្រទេសជាតិ។ សំខាន់ដូចគ្នានេះព័ត៌មានអំពីបញ្ហាសង្គមដែលមិនទាន់ដោះស្រាយរួចដូចជា បញ្ហាភាពក្រីក្រនៅតំបន់ដាច់ស្រយាល ការខ្វះខាតសាលារៀន ឬក៏មណ្ឌលសុខភាពជាដើម នឹងជួយអោយរដ្ឋាភិបាលយល់ដឹងកាន់តែច្បាស់អំពីបញ្ហានៅក្នុងសង្គម ហើយចាត់វិធានការដោះស្រាយបញ្ហាទាំងនោះជូនដល់ប្រជាជនដែលជាម្ចាស់ឆ្នោតនៅក្នុងប្រទេសលទ្ធិប្រជាធិបតេយ្យ។
ទំនាក់ទំនងរវាងអ្នកសារព័ត៌មាន និងអ្នកនាំពាក្យរបស់ស្ថាប័នរដ្ឋក៏ជាកត្តាចាំបាច់មួយទៀតនៅក្នុងការលើកកម្ពស់សេរីភាពសារព័ត៌មាន និងលទ្ធិប្រជាធិបតេយ្យនៅកម្ពុជា។ ពេលខ្លះ អ្នកសារព័ត៌មាន បានត្អូញត្អែរអំពីការខ្វះកិច្ចសហការល្អពីស្ថាប័នរដ្ឋនៅពេលដែលពួកគេសាកសួរព័ត៌មានបន្ថែម ដើម្បីផ្ទៀងផ្ទាត់ការពិត ឬក៏ធ្វើអោយព័ត៌មានមានតុល្យភាព។ ក្នុងន័យនេះ ការពង្រឹងសមត្ថភាព មន្ត្រីអ្នកនាំពាក្យ របស់ស្ថាប័នរដ្ឋក៏ជារឿងមួយដែលត្រូវធ្វើ។
មិនតែប៉ុណ្ណោះ អ្នកនាំពាក្យក៏ចាំបាច់ត្រូវមានសិទ្ធិអំណាច គ្រប់គ្រាន់នៅក្នុងការផ្តល់ព័ត៌មានជូនដល់អ្នកសារព័ត៌មានផងដែរ។ ដូច្នេះអ្នកនាំពាក្យគួរយល់ដឹងច្បាស់ រាល់គ្រប់កិច្ចការរបស់ស្ថាប័នដែលខ្លួនធ្វើការអោយ។ ទន្ទឹមនោះ ពួកគេគួរមានសិទ្ធិអាច ទំនាក់ទំនងផ្ទាល់គ្រប់ពេលវេលាជាមួយនឹងមេដឹកនាំស្ថាប័ន ដើម្បីអាចឆ្លងយោបល់អំពីព័ត៌មានដែលគួរផ្តល់អោយដល់អ្នកសារព័ត៌មាន។
អ្នកនាំពាក្យដ៏មានសមត្ថភាពមិនត្រឹមតែជួយធ្វើអោយមានលំហូរសេរីព័ត៌មានប៉ុណ្ណោះទេ ប៉ុន្តែវាក៏នឹងអាចជួយលើកមុខមាត់របស់រដ្ឋាភិបាលផងដែរ ដោយបានផ្តល់ព័ត៌មានស្តីពីសមិទ្ធផលនានាដែលរដ្ឋាភិបាលសម្រេចបាន។
ក្នុងន័យនេះអ្នកសារព័ត៌មាន និងអ្នកនាំពាក្យ គឺប្រៀបដូចជា ផ្នែកទាំងសងខាង នៃ « កាក់ប្រជាធិបតេយ្យមួយ» ដែលមិនអាចអត់ខាងណាបានឡើយ។ នៅពេលដែលទាំងអ្នកសារព័ត៌មាន និងអ្នកនាំពាក្យបានយល់ដឹងច្បាស់អំពី ទំនាក់ទំនងរបស់ពួកគេ និងបំពេញការងារតាមការទទួលខុសត្រូវរៀងៗខ្លួនបាននោះ សេរីភាព សារព័ត៌មាននៅកម្ពុជា នឹងកាន់តែលើកកម្ពស់បន្ថែមទៀត ហើយប្រទេសជាតិនឹងកាន់តែរីកចម្រើនទៅមុខ។
ជាចុងក្រោយ ការចេញច្បាប់ស្តីពីសិទ្ធិទទួលព័ត៌មានដែលគេរង់ចាំជាយូរណាស់មកហើយនោះក៏ជាកត្តាចាំបាច់មួយទៀត ដើម្បីធ្វើអោយសេរីភាពសារព័ត៌មាននៅកម្ពស់កាន់តែរីកលូតលាស់ខ្លាំងឡើង។
នៅពេលដែលកត្តានយោបាយ កត្តាមនុស្ស និងកត្តាច្បាប់ ត្រូវបានធានាសម្រាប់ សេរីភាពសារព័ត៌មាននោះ ប្រទេសកម្ពុជានឹងកាន់តែមានមុខមាត់ខ្ពស់ក្នុងនាមជាប្រទេសប្រជាធិបតេយ្យ ដែលផ្តល់ការធានាយ៉ាងពេញលេញដល់សេរីភាពសារព័ត៌មាន។
សូមអោយការជួបគ្នារវាងរដ្ឋាភិបាល ឧត្តមក្រុមប្រឹក្សាពិគ្រោះ និងផ្តល់យោបល់ និង អ្នកសារព័ត៌មាន ក្លាយទៅជាកម្លាំងចលករដែលមិនចេះនឿយហត់ ដើម្បីបុព្វហេតុសេរីភាពសារព័ត៌មាន សន្តិភាព ការអភិវឌ្ឍន៍ និងប្រជាធិបតេយ្យនៅក្នុងប្រទេសកម្ពុជា៕
ចែករំលែកព័តមាននេះ