ខេត្តកំពង់ស្ពឺ ៖ បន្ទាប់ពីកោះសន្តិភាពបានចុះផ្សាយពីជីវិតពិការរបស់បុរសម្នាក់ដែលអង្គុយតែលើរទេះរុញអស់រយៈពេលជាច្រើនឆ្នាំមកហើយ ធ្វើអោយសប្បុរសជនដែលមានចិត្តអាណិតអាសូរបានចំណាយធនធានផ្ទាល់ខ្លួន ដើម្បីចែករំលែកជូនដល់បុរសពិការខាងលើសម្រាប់ទុកដោះស្រាយក្នុងជីវភាពប្រចាំថ្ងៃ ។ ថ្វីត្បិតតែអំណោយទាំងនេះហាក់តិចតួចក៏ពិតមែន តែស្តែងអោយឃើញនូវមនោសញ្ចេតនាអាណិតអាសូរចំពោះបុរសពិការជាអ្នកក្រខ្សត់ពីសំណាក់ម្ចាស់ទានជាអនេក។
កាលពីរសៀលថ្ងៃទី១២ ខែមករា ឆ្នាំ២០២០ អ្នកយកព័ត៌មានកោះសន្តិភាពបាននាំយកអំណោយរបស់សប្បុរសជនទៅជូនបុរសពិការខាងលើដោយផ្ទាល់ដៃនៅភូមិនរាយណ៍ ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ។
ម្ចាស់អំណោយទាំងអស់ខាងលើ រួមមាន ១-ព្រះសុមេធវង្សបណ្ឌិត សុខ ប៊ុនធឿន មន្ត្រីសង្ឃជាន់ខ្ពស់នៃគណៈសង្ឃនាយក នៃព្រះរាជាណាចក្រកម្ពុជា ផ្តល់អំណោយរួមមានអង្ករ៥០គីឡូក្រាម, មី១កេស, ទឹកស៊ីអ៊ីវនិងទឹកត្រី១យួរ ២-លោកសុខ ប៊ុនវិរៈ មន្ត្រីអធិការកិច្ចក្រសួងការងារ ផ្តល់ថវិកាចំនួន៥០.០០០រៀល ៣-លោកស្រីនួន បុគ្គលិកមណ្ឌលកំសាន្តឌឹឃ្វីន ផ្តល់ថវិកាចំនួន៤០.០០០រៀល និង៤-អ្នកយកព័ត៌មានកោះសន្តិភាពប្រចាំខេត្តកំពង់ស្ពឺ ផ្តល់ថវិកាចំនួន៦០.០០០រៀល។
បន្ទាប់ពីទទួលបានអំណោយរបស់សប្បុរសជនខាងលើរួចមក បុរសពិការឈ្មោះឆិល សាក់ បានថ្លែងអំណរគុណយ៉ាងជ្រាលជ្រៅចំពោះម្ចាស់ទានដែលបានចែករំលែកធនធានផ្ទាល់ខ្លួនជូនដល់គាត់ និងក្រុមគ្រួសារ ។ ជាចុងក្រោយ លោកឆិល សាក់ បានបួងសួងដល់វត្ថុស័ក្តិសិទ្ឋិ សូមជួយតាមបីបាច់និងថែររក្សាម្ចាស់ទានទាំងអស់ជួបប្រទះតែសេចក្តីសុខគ្រប់ពេលវេលា។
សូមរំលឹកថា លោក ឆិល សាក់ ជាជនពិការ រស់នៅភូមិនរាយណ៍ ឃុំពោធិ៍អង្គ្រង ស្រុកបរសេដ្ឋ ខេត្តកំពង់ស្ពឺ ជារៀងរាល់ថ្ងៃគាត់មិនអាចប្រកបកិច្ចការអ្វីក្រៅពីអង្គុយលើរទេះរុញសុំទានគេនោះទេ ជួនកាលថ្ងៃខ្លះសុំបាន ហើយជួនកាលថ្ងៃខ្លះក៏សុំមិនបាន។
បុរសពិការខាងលើរៀបរាប់ថា គាត់ពិតជាអាណិតប្រពន្ធនិងកូនខ្លាំងណាស់ ជាពិសេសគឺកូនស្រីម្នាក់ដែលសតិមិនគ្រប់ ។ រាល់ថ្ងៃគាត់ចេញទៅសុំទានបានលុយបន្តិចបន្តួចយកមកឲ្យប្រពន្ធ ដើម្បីទិញម្ហូបហូបជាមួយកូនស្រី ។ គាត់មិនអាចធ្វើអ្វីបានទេក្រៅពីសុំទានគេនិងអង្គុយក្រោមកំដៅថ្ងៃក្តៅហែង ជួនកាលថ្ងៃខ្លះសុំបាន ជួនកាលថ្ងៃខ្លះក៏សុំមិនបាន តែបើជួបអ្នកចិត្តបុណ្យគេក៏ហុច១ពាន់ទៅ២ពាន់រៀលក៏មាន ប៉ុន្តែថ្ងៃខ្លះបើមិនបានជួបជាមួយអ្នកចិត្តបុណ្យទេ គឺគាត់ក៏គ្មានប្រាក់ដែរ។
បុរសពិការខាងលើបានរៀបរាប់បន្តថា រាល់ថ្ងៃ ប្រពន្ធរបស់គាត់ស៊ីឈ្នួលមើលថែកូនតូចឱ្យគេបានប្រាក់កម្រៃតិចតួចដែរ។ គាត់ក្រខ្សត់ខ្លាំងណាស់ សូម្បីតែដំបូលនិងជញ្ជាំងផ្ទះក៏ត្រូវបានអ្នកជិតខាងឱ្យស័ង្កសីយកមកបិទបាំងដែរ ព្រោះគាត់គ្មានលទ្ធភាពរកលុយទិញនោះទេ ។ រាល់ថ្ងៃគ្រួសាររបស់គាត់រស់អាស្រ័យលើការសុំទាន និងប្រាក់កម្រៃរបស់ប្រពន្ធស៊ីឈ្នួលមើលកូនតូចឲ្យគេតែប៉ុណ្ណោះ គឺពុំមានអ្វីនោះលើសពីនេះទៀតទេ ៕ (កែសម្រួលដោយ ៖ ធីតា)
ចែករំលែកព័តមាននេះ