រាជធានីភ្នំពេញ ៖ សហព័ន្ធសហជីពការងារអាមេរិក និងសភានៃអង្គការឧស្សាហកម្ម (AFL-CIO) បានបង្ហាញឆន្ទៈបន្តកិច្ចសហប្រតិបត្តិការជាមួយកម្ពុជា ក្នុងការជំរុញការធ្វើពាណិជ្ជកម្មផ្សារភ្ជាប់លក្ខខណ្ឌការងាររវាងប្រទេសទាំងពីរឱ្យកាន់តែមានភាពល្អប្រសើរ រួមទាំងការចូលរួមដោះស្រាយបញ្ហាវិវាទការងារដូចជា ការពង្រឹងមន្ត្រីអធិការកិច្ចការធ្វើវិសោធនកម្មច្បាប់ស្ដីពីការងារ និងច្បាប់ស្ដីពីសហជីពជាដើម ។
ការសម្ដែងការពេញចិត្តនេះត្រូវបានធ្វើឡើងក្នុងជំនួបពិភាក្សាការងាររវាងលោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈជាមួយលោកស្រី ខេតធី ហ្វេនហ្គោល (Cathy Feingold) នាយិកាផ្នែកកិច្ចការអន្តរជាតិនៃសហព័ន្ធសហជីពការងារអាមេរិក និងសភានៃអង្គការឧស្សាហកម្ម (AFL-CIO) នារសៀលថ្ងៃទី១៣ ខែមករា ឆ្នាំ២០២០ នៅទីស្ដីការក្រសួង ។
ក្នុងជំនួបនោះលោក អ៊ិត សំហេង បានលើកឡើងពីលទ្ធផលនៃកិច្ចសហប្រតិបត្តិការជួយជ្រោមជ្រែងដល់កម្ពុជាពីសំណាក់សហរដ្ឋអាមេរិក តាំងពីឆ្នាំ១៩៩៧មក ។ លោករដ្ឋមន្ត្រីបានបន្តថា ដើម្បីលើកកម្ពស់ និងសម្រួលដល់ការកសាងសមត្ថភាពរូបវ័ន្ត និងស្ថាប័នក្នុងការបង្កើតសុខដុមរមនានៅកន្លែងការងារ ក្រសួងការងារ និងបណ្តុះបណ្តាលវិជ្ជាជីវៈរួមជាមួយមជ្ឈមណ្ឌលអាមេរិកកាំង សម្រាប់សាមគ្គីភាពការងារអន្តរជាតិ (ACILS) បានចុះអនុស្សរណៈនៃការយោគយល់គ្នា នៅថ្ងៃទី២២ ខែមករា ឆ្នាំ២០១៨ ក្នុងគោលបំណងបង្កើតនូវក្របខណ្ឌសហប្រតិបត្តិការបច្ចេកទេសរវាងក្រសួង និង ACILS ក្នុងគោលដៅចូលរួមចំណែកក្នុងការអនុវត្តគោលនយោបាយពាក់ព័ន្ធនឹងវិស័យការងារទៅតាមតម្រូវការជាក់ស្តែងរបស់ក្រសួង ។
ជាមួយគ្នានោះរដ្ឋមន្ត្រីក៏បានក៏បានថ្លែងអំណរគុណដល់សហជីព AFI-CIO តាមរយៈ ACILS ដែលបានចូលរួមលើកកម្ពស់លក្ខខណ្ឌការងារនៅកម្ពុជា និងជំរុញការអនុវត្តការងាររបស់ ACILS ឱ្យស្របតាមអនុស្សរណៈនៃការយោគយល់គ្នាខាងលើនេះ ។ លោករដ្ឋមន្ត្រីបានជំរុញឱ្យ ACILS អនុវត្តកាតព្វកិច្ចការចុះបញ្ជីឱ្យស្របតាមច្បាប់ជាធរមាន ព្រមទាំងបន្តពង្រឹងកិច្ចសហប្រតិបត្តិការរវាងក្រសួងការងារ និងបណ្តុះបណ្តាលវិជ្ជាជីវៈជាមួយនឹងអង្គការ ACILS តាមរយៈ ការលើកកម្ពស់សមត្ថភាពសហជីពមូលដ្ឋាន ។
ការផ្សព្វផ្សាយច្បាប់ស្តីពីការងារច្បាប់ស្តីពីសហជីព ច្បាប់ស្តីពីប្រាក់ឈ្នួលអប្បបរមា និងច្បាប់ស្តីពីរបបសន្តិសុខសង្គម ។ ការពង្រឹងសមត្ថភាពមន្ត្រីផ្សះផ្សាវិវាទការងារ ។ ការលើកកម្ពស់ភាពសុខដុមរមនាក្នុងទំនាក់ទំនងវិជ្ជាជីវៈ និងការលើកកម្ពស់កិច្ចសន្ទនាសង្គម និងការពង្រឹងនិរន្តរភាពរបស់ក្រុមប្រឹក្សាអាជ្ញាកណ្តាល ។
ចំណែកលោកស្រី ខេតធី ក៏បានបង្ហាញពីការពេញចិត្តចំពោះការធ្វើពាណិជ្ជកម្មផ្សារភ្ជាប់លក្ខខណ្ឌការងារដែលកម្ពុជាបាន និងកំពុងធ្វើជាមួយសហរដ្ឋអាមេរិក និងបានប្ដេជ្ញាបន្តកិច្ចសហប្រតិបត្តិការជាមួយកម្ពុជាបន្តទៀត ដើម្បីឱ្យការធ្វើពាណិជ្ជកម្មផ្សារភ្ជាប់លក្ខខណ្ឌការងារនេះកាន់តែមានភាពល្អប្រសើរថែមទៀត ។
សូមបញ្ជាក់ថា អង្គការ AFL-CIO ជាសហព័ន្ធសហជីពធំជាងគេនៅសហរដ្ឋអាមេរិក ដែលមានទីស្នាក់ការកណ្តាលនៅទីក្រុងវ៉ាស៊ីនតោន ។ ACILS មានវត្តមានដំបូងនៅកម្ពុជានាចុងឆ្នាំ១៩៩៣ ក្រោមឈ្មោះថា Asian American Free Labor Institute (AAFLI) ៕
ចែករំលែកព័តមាននេះ