ខេត្តកណ្ដាល៖ ជីរណា ឬជីស្លឹកវែង បានធ្វើឲ្យជីវភាពកសិករដោះស្រាយជីវភាពបានមួយកម្រិតនៅពេលត្រូវថ្លៃក្នុងរដូវប្រមូល ។ នេះបើតាមសំដីរបស់កសិករម្នាក់កំពុងប្រមូលផលឬកាត់ជីរណា ។
ដោយដៃកំពុងប្រមូលជីដែលកាត់រួចពីកម្មករស៊ីឈ្នួលដែលកំពុងកាត់ក្នុងកសិដ្ឋានលោកលីម ហុង រស់នៅក្នុងភូមិសំប៉ាន់ ឃុំព្រែកអំបិល ស្រុកស្អាង ខេត្តកណ្តាល បានឲ្យដឹងថា ជីរណាដែលគាត់កាត់លក់ឲ្យម៉ូយមានតម្លៃជារៀងរាល់ថ្ងៃ ដោយមានម៉ូយច្រើនមកទិញបន្តិចៗម្នាក់ ខ្លះ២០ឬ៣០គ-ក្រឬលើសពីនេះ ដោយក្នុងមួយគីឡូ៣០០០ទៅ៣៥០០រៀល ។
លោកបន្តថា ដីដែលកំពុងកាត់ជីនេះក្នុងមួយអាបាន២០០គីឡូក្រាមឬលើសទៅតាមការកុម្ម៉ងរបស់ម៉ូយ ។ ជីនេះដាំក្នុងទំហំជាង៣០អា ដោយចំណាយដើមទុនក្នុងការដាំដុះមានទិញដើមឫស្សីសម្រាប់បោះបង្គោល និងស្បៃគ្របសរុបទាំងអស់ប្រមាណ៥ពាន់ដុល្លារ ដោយបង្គោលឬស្សីមួយដើមថ្លៃ៣០០០រៀល ។ ចំណែកស្បៃមួយកីឬមួយដុំតម្លៃ៥០ដុល្លារ ។ លោកក៏បានឲ្យដឹងទៀតថា គ្រាប់ជីដែលទិញមកដាំមួយគីឡូ៣០ម៉ឺនរៀលឬលើសពីនេះក៏មាន ។ ប៉ុន្តែជីដែលគាត់ដាំនេះជាពូជដែលទុកខ្លួនឯង ។ ដូច្នេះមានភាពងាយស្រួលមួយកម្រិតក្នុងការមិនចំណាយទៅលើគ្រាប់ពូជ ។
លោកបានឲ្យដឹងទៀតថា ជីរណាមានរយៈពេលដាំ៣ខែ ឬលើសពីនេះទើបទទួលបានផល ឬអាចកាត់លក់ឲ្យម៉ូយបាន ។ ប៉ុន្តែមុននឹងទទួលបានផលលោកក៏បានចំណាយលើកម្មករដកស្មៅនិងដាក់ជីអ៊ុយរ៉េនិងបាញ់ថ្នាំសម្លាប់សត្វល្អិតផងដែរ ដើម្បីឲ្យឆាប់លូតបានវែងរហូតឈានដល់កាត់ទៅលក់ ។
លោកបានបញ្ជាក់យ៉ាងដូច្នេះថា៖ «ខ្ញុំបានបាចគ្រាប់ពូជដោយដីមួយអាប្រើគ្រាប់មួយមួយគីឡូ តែគេខ្លះមិនដាក់ច្រើនដូចខ្ញុំទេ គឺដាក់លើសកន្លះគីឡូ ឬលើសពីនេះ តិចតួចប៉ុណ្ណោះ ។ ខ្ញុំដាំ បានស្រោចទឹកដាក់ជីស(ជីអ៊ុយរ៉េ ឬជីក្រហម) ដើម្បីឲ្យវាឆាប់លូតបានលឿន ។ ហើយដីដែលខ្ញុំដាំនិងកំពុងកាត់នេះមានជាង៣០អា ដោយបានកាត់លក់ជាបណ្តើរៗហើយ»។
កសិសករដដែលក៏បានលើកឡើងទៀតថាដីដែលគាត់ដាំអាចកាត់សារចុះឡើងរហូតដល់១០សារ ឬ១០ដង នៅពេលកាត់រួចហើយគាត់ស្រោចទឹកនិងដាក់ជីសដើម្បីឲ្យវាឆាប់លូត។ លោកបានប្រើប្រាស់ឈ្នួលមកកាត់ជាច្រើននាក់ក្នុងរយៈពេលមួយថ្ងៃៗក្នុងតម្លៃ២០០០០រៀល ទៅ២៥០០០រៀលក្នុងម្នាក់ៗ ។ ប៉ុន្តែដោយសារតម្រូវការរបស់ម៉ូយមានកម្រិត ស្របពេលជីចុះថ្លៃផងនោះ លោកបានប្រើប្រាស់កម្លាំងពលកម្មតែរយៈពេលមួយព្រឹកទេ ។
ជាមួយគ្នានោះដែរ កសិករដដែលក៏បានឲ្យដឹងថា រយៈពេល៤ឬ៥ខែកន្លងមក ជីរណានេះមានហាងឆេងឬតម្លៃថ្លៃគួរសម ដោយតម្លៃរហូតដល់៧០០០រៀល ប៉ុន្តែឥឡូវធ្លាក់ចុះមកត្រឹមតែ៣០០០រៀល ឬ៣៥០០រៀលប៉ុណ្ណោះ ។ ហើយពេលខ្លះក្នុងការដាំជីរណានេះ តម្លៃក៏ធ្លាក់មកត្រឹម១០០០រៀលក៏មាន ។ លោកក៏បានស្នើឲ្យថ្នាក់ដឹកនាំជួយគិតគូរដល់តម្លៃជីរណានេះផងដែរ ព្រោះថាបើសិនជាធ្លាក់ថ្លៃពេក លោកនឹងពិតជាពិបាកក្នុងការដាំដុះ ពិសេសនោះគួរពិចារណាបិទការនាំចូលរជីរណានេះពីប្រទេសជិតខាងផងដែរ បើនាំចូលវាធ្វើឱ្យជីរណាក្នុងស្រុកធ្លាក់ថ្លៃ ។
ដោយឃើញមានការកាក់កបនឹងការដាំជីរណានេះ លោកលីម ហុង ក៏បានបន្តរៀបចំដីដាំជីនេះនៅកន្លែងផ្សេងទៀតផងដែរ ។ សូមជម្រាបថា បើតាមសិករដដែលបានឲ្យដឹងថា ជីរណានេះដាំម្ដងកាត់រយៈពេល១០ដង ទើបឈប់កាត់ហើយដើមជីត្រូវងាប់ ។
តាមការសង្កេតជាក់ស្តែងឃើញកសិករមួយចំនួនកំពុងតែនាំគ្នាដាំជីរណាឬជីស្លឹកវែងនេះ ជាលក្ខខណៈកសិដ្ឋាន ដោយបានបោះបង្គោល និងចងស្បៃជុំវិញមិនឲ្យជីត្រូវកំដៅខ្លាំងពេក ៕ (កែសម្រួលដោយ ៖ បុប្ផា)
ចែករំលែកព័តមាននេះ