ខេត្តកំពង់ឆ្នាំង៖ មន្ទីរវប្បធម៌ និងវិចិត្រសិល្បៈខេត្ត និងមន្ទីរទេសចរណ៍ខេត្តកំពង់ឆ្នាំង កាលពីព្រឹកថ្ងៃទី១០ ខែមករា ឆ្នាំ ២០២០បានសហការជាមួយអាជ្ញាធរស្រុកកំពង់លែង មន្ត្រីសូរិយោដី មន្ត្រីនគរបាលការពារបេតិកភណ្ឌ…
ខេត្តកំពង់ឆ្នាំង៖ មន្ទីរវប្បធម៌ និងវិចិត្រសិល្បៈខេត្ត និងមន្ទីរទេសចរណ៍ខេត្តកំពង់ឆ្នាំង កាលពីព្រឹកថ្ងៃទី១០ ខែមករា ឆ្នាំ ២០២០បានសហការជាមួយអាជ្ញាធរស្រុកកំពង់លែង មន្ត្រីសូរិយោដី មន្ត្រីនគរបាលការពារបេតិកភណ្ឌ ព្រមទាំងអាជ្ញាធរមូលដ្ឋាន និងប្រជាពលរដ្ឋផង បានវាស់វែង និងឈូសកំណត់ព្រំដីទួលប្រាសាទសក្ល ហៅប្រាសាទប្រុស ស្ថិតក្នុងភូមិកង្កែប ឃុំច្រណូក ស្រុកកំពង់លែង ។
លោកសំ ចាន់ថន អភិបាលស្រុកឲ្យដឹងថា ដោយសារជើងទីទួលប្រាសាទមានផ្ទៃរាបស្មើ ប្រជាពលរដ្ឋតែងតែធ្វើស្រែជាប់ជើងទីទួលប្រាសាទជារៀងរាល់ឆ្នាំ ។
លោកសុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បញ្ជាក់ថា ជុំវិញទីទួលប្រាសាទសក្ល មិនអនុញ្ញាតឲ្យមានការបំពានឡើយ ។ កន្លងមកប្រជាពលរដ្ឋធ្លាប់បានធ្វើកិច្ចសន្យា ហើយខាងមន្ទីរធ្លាប់បោះព្រំដីដែរ ប៉ុន្តែពួកគាត់មិនយល់នៅតែចូលធ្វើស្រែជាប់ជើងទួលប្រាសាទដដែល ។ ដើម្បីឲ្យប្រជាពលរដ្ឋដែលមានដីស្រែនៅជាប់ជើងទួលប្រាសាទ កាន់តែច្បាស់ អាជ្ញាធរស្រុកបានយកត្រាក់ទ័រឈូសលើកភ្លឺព័ទ្ធជុំវិញជើងទួលប្រាសាទដើម្បីជាកំណត់សម្គាល់ ឲ្យបញ្ឈប់ការធ្វើស្រែតទៅទៀត ។
លោកសេង សាលី ប្រធានមន្ទីរទេសចរណ៍ខេត្តកំពង់ឆ្នាំងបញ្ជាក់ថា ប្រាសាទសក្ល គឺជាប្រាសាទមួយក្នុងចំណោមប្រាសាទជាច្រើន ដែលរាប់បញ្ចូលជាទីតាំងសម្រាប់ភ្ញៀវទេសចរទៅលេងកម្សាន្ត ប៉ុន្តែមិនសូវមានភ្ញៀវទេសចរ ទៅកម្សាន្តទេ ។ លោកគាំទ្រការលើកភ្លឺព័ទ្ធជុំវិញទីទួលប្រាសាទដើម្បីកំណត់ព្រំឲ្យកាន់តែច្បាស់ កុំឲ្យប្រជាពលរដ្ឋរំលោភបំពាន ។
នៅព្រឹកនោះប្រជាពលរដ្ឋជាម្ចាស់ស្រែជុំវិញទីទួលប្រាសាទ ត្រូវអាជ្ញាធរឃុំស្រុកអញ្ជើញទៅមើលការលើកភ្លឺសម្គាល់ព្រំរវាងដីទីទួលប្រាសាទ និងដីស្រែរបស់ពួកគាត់ ។ អាជ្ញាធរបានណែនាំឲ្យពួកគាត់ឈប់ធ្វើស្រែចូលក្នុងជើងទីទួលប្រាសាទទៀត ។
លោកសំ ចាន់ថន អភិបាលស្រុកកំពង់លែង ឲ្យដឹងថានៅដើមឆ្នាំ២០២០ នេះរដ្ឋបាលសាលាស្រុកកំពង់លែង បានដាក់ប្រាក់មួយចំនួនដើម្បីធ្វើផ្លូវថ្មី ចូលទៅកាន់ទីទួលប្រាសាទ ប៉ុន្តែជំហានដំបូងធ្វើបានតែជាង១០០ម៉ែត្រប៉ុណ្ណោះហើយនឹងធ្វើជាបន្តបន្ទាប់ទៀតរហូតដល់មានផ្លូវធំអាចមានរថយន្តបើកចេញចូល ទៅប្រាសាទបុរាណសក្ល ដែលកសាងឡើងក្នុងចន្លោះសតវត្សទី៧ និងទី៨ តាមរចនាបថកំពង់ព្រះ ៕ (កែសម្រួលដោយ ៖ បុប្ផា)
ចែករំលែកព័តមាននេះ