រាជធានីភ្នំពេញ ៖ នៅក្នុងសង្គមគ្រួសាររបស់លោក លាន អាព្រីលគីនីន និងភរិយា អតីតតារាសម្តែង កែវ វលក្ខ័ ផ្ទុះរឿងអាស្រូវស្នេហាលួចលាក់ក្រៅផ្ទះរបស់លោកគីនីន ។ ថ្មីៗកន្លងមកនេះ មានការចាប់អារម្មណ៍ និងភ្ញាក់ផ្អើលខ្លាំង ក្រោយពេលភរិយារបស់លោក លាន អាព្រីលគីនីន បានចេញសារ និងបង្ហោះ រូបភាពមួយចំនួនរបស់តារាចម្រៀងប៉ាត់ សុធា រ៉ា ដោយចោទថាលួចទាក់ទងស្នេហាជាមួយប្ដីរបស់ខ្លួន ។
កែវ វលក្ខ័ ជាអតីតតារាសម្តែង និង ជាបងស្រីរបស់តារាសម្តែងកែវ ស្រីនាង បាន ព្រមានប៉ាត់ សុធារ៉ា ថា បើឃើញនៅជាមួយប្តីនាងទៀតនឹងវ៉ៃ ព្រមទាំងចាប់កោរត្រងោលមិនខាន ។ ការព្រមានរបស់កែវ វលក្ខ័ បានធ្វើឱ្យមានការភ្ញាក់ផ្អើលជាខ្លាំង ។
កែវ វលក្ខ័ បានបង្ហោះ សារថា «សួស្តី បងប្អូន ជួបគ្នាម្តងទៀត ជា លើកទីបីហើយ រឿងនាង ប៉ាត់ សុធារ៉ា សុីប្តី គេមិនលែង ។ ខ្ញុំចង់ប្រាប់បងប្អូនថា វា មិនរាង ហើយក៏មិនព្រមលែងដែរ តាំងពីខ្ញុំផុសលើកទី១ វាមិនដែលញញើតយើងសូម្បីតែមួយថ្ងៃ ខ្ញុំ ព្យាយាមរក្សាសុខដាក់ខ្លួន មិនចង់ឃើញ មិន ចង់ឮ តែវាវិញព្យាយាមឱ្យខ្ញុំដឹង ឱ្យខ្ញុំឃើញ ផ្ញើរូបភាពមករហូត ពេលដែលវានៅជាមួយគ្នា។ បងប្អូន ជាស្រី ដូចគ្នា ទ្រាំបានអត់ ?
អ៊ីចឹង ចង់ប្រកាសប្រាប់បងប្អូនឱ្យហើយ និងនាង ប៉ាត់ សុធារ៉ា ឱ្យដឹងមុនថា ចាប់ពីពេលនេះ ម៉ោងនេះ វេលានេះទៅ បើអញឃើញ នាង ប៉ាត់ សុធារ៉ា ឯង នៅជាមួយប្តីអញ សុំវ៉ៃ កោរត្រងោល ឈប់អនុគ្រោះហើយ ព្រោះនាងបោក អញច្រើនដង ហើយក៏ចង់ផ្តាំទៅម្តាយនាងផង សាកល្បង អូសក្បាលប៉ាត់ សុធា រ៉ា ទៅប្រដៅមួយសាទៀត ឈប់ឱ្យបំផ្លាញគ្រួសារ គេទៀតទៅ »។
ទាក់ទិនរឿងនេះមិនទាន់អាចរកការបញ្ជាក់ពីប៉ាត សុធារ៉ា បានទេ ឯការចោទរបស់ភរិយាលាន អាព្រីលគីនីន ក៏មិនប្រាកដថាពិត ឬយ៉ាងណាដែរ ។
កែវ វលក្ខ័ ធ្លាប់ជាតារាសម្តែង មានឈ្មោះបោះសំឡេងម្នាក់ តែក្រោយពីនាងភ្ជាប់ស្នេហ៍ ជាមួយ លោកលាន អាព្រីលគីនីន នាងក៏បាន បញ្ចប់អាជីពនេះ ។ កាលពីប៉ុន្មានខែមុននេះ នាងបានធ្វើពិធីភ្ជាប់ពាក្យកូនប្រុស ។
ចំណែកប៉ាត់ សុធារ៉ា ជាអ្នកចម្រៀងយូរឆ្នាំមកហើយ ភាគច្រើននៅផលិតកម្មរៃមាសតោមាស និងបុប្ឋា ជាផលិតកម្មក្រៅប្រទេស។ នាងតែងតែមានឱកាសបានចេញសម្តែងជាញឹកញាប់នៅក្រៅប្រទេសផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ