ខេត្តព្រះសីហនុ៖យាយជី តាជី និងព្រះសង្ឃចំនួន៨០អង្គ/នាក់ បានចូលរួមធ្វើវិបស្សនាធុរៈនៅរមណីយដ្ឋានបែបព្រះពុទ្ឋសាសនាលើកំពូលភ្នំរាម ស្ថិតក្នុងភូមិរាម ឃុំរាម ស្រុកព្រៃនប់ ខេត្តព្រះសីហនុ រយៈពេល១០ថ្ងៃ ។
ព្រះគ្រូសមថកោសល្យសោម សម្បត្តិ ទីប្រឹក្សាផ្ទាល់សម្តេចអគ្គមហាសង្ឃរាជាធិបតី កិត្តិឧទ្ទេសបណ្ឌិតទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា មានសង្ឃដីកាថា ព្រះតេជគុណប្រធានមជ្ឈមណ្ឌលលោកអាចារ្យ គណៈកម្មាធិការមជ្ឈមណ្ឌលវិបស្សនាធុរៈ ដោយមានចូលរួមពីលោកថន វីរៈ និងលោកស្រីឈុន ម៉ៃលីង បានរៀបចំបើកវគ្គធុតង្គ បតិបត្តិរយៈពេល១០ ថ្ងៃសម្រាប់ប្រគេនជូនព្រះសង្ឃ សីលវន្ត សីលវត្តីពុទ្ធបរិស័ទគ្រប់ទិសទី ប្រតិបត្តិផ្នែកសមថកម្មដ្ឋាន និងបំពេញបុណ្យកុសលទៅតាមទំនៀមទម្លាប់ប្រពៃណីព្រះពុទ្ធសាសនា ។
ដើម្បីឆ្លើយតបនូវគុណូបក្ការៈ និងកាយវិការដ៏មហាសប្បុរស ព្រះអង្គបានប្រសិទ្ធជ័យ សិរីមង្គលវិបុលសុខ និងពុទ្ធពរទាំងបួនប្រការប្រគេនសម្តេចព្រះរាជាគណៈឋានានុក្រមគ្រប់មន្ត្រីសង្ឃ លោក លោកស្រីសិក្ខាកាម សមាជិកសមាជិកានៃពិធី ។
លោកថន វីរៈ និងលោកស្រីឈុន ម៉ៃលីង ជាម្ចាស់រមណីយដ្ឋានបែបព្រះពុទ្ឋសាសនារាម បញ្ជាក់ថា មជ្ឈមណ្ឌលវិបស្សនាធុរៈបានដើរតួនាទីដ៏សំខាន់មួយក្នុងការជួយសម្រួលដល់ការលំបាករបស់លោកយាយ លោកតា ព្រះសង្ឃ ក្នុងការស្វែងរកទីកន្លែងស្ងប់ស្ងាត់បំពេញនូវសេចក្តីត្រូវការផ្នែកវិបស្សនាធុរៈ តាមរយៈការសិក្សារៀនសូត្រទ្រឹស្ដី និងអនុវត្តជាក់ស្តែងជាពិសេសជួយដល់ការងារសង្គមជាដើម ។
ពេលនេះបើកវគ្គធុតង្គរយៈពេល១០ថ្ងៃដើម្បីប្រគេននិងជូនសិក្ខាកាម និមន្ត និងអញ្ជើញពីទី ផ្សេងៗជាច្រើនអង្គ/នាក់ គោរពប្រតិបត្តិតាមរយៈ សីលសមាធិ បញ្ញាស្របតាមសង្ឃប្រកាសអនុសំវច្ឆរមហាសន្និបាតមន្ត្រីសង្ឃទូទាំងប្រទេសតាមលំដាប់ឆ្នាំ នីមួយៗ និងសង្ឃប្រកាស អនុសំវច្ឆរៈមហាសន្និបាតមន្ត្រីសង្ឃទូទាំងប្រទេសលើកទី២៣ ឆ្នាំ២០១៤ ត្រង់ចំណុចទី ៥ បានចែងថាមន្ត្រីសង្ឃគ្រប់ចំណាត់ថ្នាក់ត្រូវយកចិត្តទុកដាក់ខ្ពស់លើ វិបស្សនាធុរៈសិក្សាគ្រប់កម្រិតចាប់តាំងពីបឋម មធ្យម រហូតដល់ឧត្តម ឱ្យបានទូទាំងប្រទេស ៕ (កែសម្រួលដោយ ៖ បុប្ផា)
ចែករំលែកព័តមាននេះ