រាជធានីភ្នំពេញ ៖ «ព្រឹត្តិការណ៍ស្ត្រីនិងកីឡាត្រូវបានដាក់បញ្ចូលក្នុងផែនការមេស៊ីហ្គេម ឆ្នាំ២០២៣» ។ លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈ
កម្មាធិការជាតិអូឡាំពិកកម្ពុជាមានប្រសាសន៍បែបនេះនៅក្នុងសន្និសីទសារព័ត៌មានមួយស្ដីពីទិវារត់ប្រណាំងស្ត្រីចម្ងាយ១០គីឡូម៉ែត្រនៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីព្រឹកថ្ងៃទី១៣ មករា ម្សិលមិញនេះ។
លោក វ៉ាត់ ចំរើន បានឱ្យដឹងទៀតថា ជាមួយនឹងការដាក់បញ្ចូលកម្មវិធីស្ត្រីនៅក្នុងផែនការមេសម្រាប់ការប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះលើកដំបូងនេះ ត្រូវបានកំណត់យុទ្ធសាស្ត្រមួយឱ្យមានស្ត្រីចូលរួមលេងកីឡាឱ្យបានច្រើន ។
ដូច្នេះហើយទើបលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជា បានផ្ដល់ជាយោបល់ដល់លោកស្រី កុល ពិសី រដ្ឋលេខាធិការក្រសួងទេសចរណ៍និងជាប្រធានគណៈកម្មការស្ត្រីនិងកីឡាឱ្យខិតខំប្រឹងប្រែងពង្រឹងនិងពង្រីកការផ្សព្វផ្សាយការយល់ដឹងចលនាស្ត្រីទៅក្នុងសង្គមជាតិរបស់យើង ដើម្បីស្រូបយកទេពកោសល្យស្ត្រីនៅក្នុងវិស័យកីឡាយើងផង ក៏ដូចជាជំរុញឱ្យមានការចូលរួមលើក តម្កើងសមភាពយ៉េនឌ័រនៅក្នុងសង្គមជាតិយើងផង។
លោកស្រី កុល ពិសី មានប្រសាសន៍ក្នុង ឱកាសនោះថា គណៈកម្មាធិការជាតិអូឡាំពិកកម្ពុជាបានឱ្យតម្លៃខ្ពស់ចំពោះស្ត្រី ជាពិសេសក្នុងការរត់ចម្ងាយ៨គីឡូម៉ែត្រនៅក្នុងឱកាសថ្ងៃទិវាបុណ្យសិទ្ធិនារី៨ មីនា ព្រោះវាពិតជាមានសារសំខាន់ខ្លាំងណាស់ ។ ក្នុងនាមលោកស្រីជាប្រធានគណៈកម្មការស្ត្រីនិងកីឡា លោកស្រីថា កីឡាពិតជាសំខាន់ ដូច្នេះលោកស្រីបានខិតខំចលនាឱ្យស្ត្រីចូលរួមកាន់តែច្រើនថែមទៀតព្រោះស្ត្រីជាឆ្អឹងខ្នងរបស់ប្រទេសជាតិ ហើយស្ត្រីជាប្រភពសុភមង្គលនៅក្នុងគ្រួសារនិងសង្គមជាតិ ហើយបើស្ត្រីមិនមានសុខភាពល្អមាំមួនទេនោះវាពិតជាមានបញ្ហានៅក្នុងគ្រួសារនិងសង្គមជាតិមិនខាន ។ ហេតុដូច្នេះហើយបានជាលោកស្រីសូមអំពាវនាវទៅដល់ស្ត្រីគ្រប់រូបចូលរួមលេងកីឡាទាំងអស់គ្នាចាប់ពីពេលនេះតទៅ។
សូមបញ្ជាក់ថា ទិវារត់ប្រណាំនេះ គណៈ កម្មាធិការជាតិអូឡាំពិកម្ពុជាបានស្នើទៅសាលារាជធានីភ្នំពេញដើម្បីសុំទីតាំងចេញដំណើរ នៅបរិវេណមុខវត្តបទុមវតី ។ ទោះបីព្រឹត្តិការណ៍ នេះជាទិវារត់របស់ស្ត្រីតែគណៈកម្មការបានបើកទូលាយពោលគឺបុរសក៏អាចចូលរួមបានដែរ បើបានច្រើនកាន់តែល្អ ។
សម្រាប់វិញ្ញាសារត់ មានចម្ងាយ១០គីឡូម៉ែត្រ និង៤គីឡូម៉ែត្រ និងធ្វើឡើងក្នុងគោលបំណងសំខាន់ទី១លើក កម្ពស់ស្ត្រីក្នុងការចូលរួមលេងកីឡា ។ ទី២គឺលើកកម្ពស់សមភាពយ៉េនឌ័រ និងទី៣ ចូលរួមថែរក្សាបរិស្ថាន កម្ពុជាស្អាត ដែលទាំងអស់នេះ ស្ថិតក្នុងយុទ្ធនាការចម្បងឆ្ពោះទៅការប្រកួតកីឡាស៊ីហ្គេមឆ្នាំ២០២៣ដែលទទួលបានការអនុញ្ញាតពីសម្ដេចតេជោនាយករដ្ឋមន្ត្រីនៃព្រះរាជាណាចក្រកម្ពុជា ៕ (កែសម្រួលដោយ ៖ បុប្ផា)
ចែករំលែកព័តមាននេះ