ប្រទេសអ៊ីរ៉ង់-អាមេរិក ៖ ទូរទស្សន៍អាមេរិកCNNរៀបរាប់ថា កងទាហានអាមេរិកដែលកាន់កាប់មូលដ្ឋានអាល់អាសាដនៅអ៊ីរ៉ាក់បានត្រូវគេប្រាប់ឲ្យដឹងមុន ពីការវាយប្រហារដោយមីស៊ីលអ៊ីរ៉ង់កាលពីថ្ងៃទី៨មករា ទើបអាចឲ្យពួកគេរត់ទៅរកលេណដ្ឋាន ២ម៉ោងមុនមីស៊ីលអ៊ីរ៉ង់ធ្លាក់លើទីតាំងនោះ។ CNN មានទាំងបង្ហាញរូបភាពនានានៃជម្រករបស់ពួកគេទៀតផង។
នេះជាលើកទីមួយហើយចាប់តាំងពីការវាយប្រហាររបស់ក្រុងតេហេរ៉ង់លើបណ្ដាទីតាំងអាមេរិក កាលពីយប់ថ្ងៃទី៧ មកទី៨ មករាមក ដែលបណ្ដាអ្នកកាសែតអាចមកកាន់មូលដ្ឋានអាកាសចរណ៍អាល់អាសាដនៅអ៊ីរ៉ាក់។
កាលពីថ្ងៃទី១១ មករា CNNលាតត្រដាងថា ពុំមានមនុស្សណាម្នាក់រងគ្រោះក៏ព្រោះតែកងទាហានត្រូវបានគេប្រាប់ឲ្យដឹងមុនទាន់ពេលវេលា ហើយអាចរត់ទៅរកលេណដ្ឋាននានា មុនពេលគ្រាប់មីស៊ីលអ៊ីរ៉ង់កម្ទេចទីតាំងនោះ។ នាវេលាម៉ោង២៣ ថ្ងៃទី៧ មករា គឺ២ម៉ោងកន្លះមុនការវាយប្រហារ កងទាហានភាគច្រើនដែលកាន់កាប់មូលដ្ឋាននេះ ត្រូវបានជម្លៀសចេញរួចហើយតាមយន្តហោះ ឬរត់ទៅជ្រកក្នុងលេណដ្ឋាននានា។ នេះបើតាម CNN បានដកស្រង់ព័ត៌មាននេះពីបណ្ដានាយទាហានដែលស្ថិតក្នុងមូលដ្ឋាននោះដែរ។
ការបាញ់មីស៊ីលមានរយៈពេលប្រមាណជា២ម៉ោង ហើយសំដៅតែលើបណ្ដាអគាររបស់អាមេរិកដែលតាំងនៅប្រមាណជា១ភាគ៤នៃមូលដ្ឋានអ៊ីរ៉ាក់នេះ។ បណ្ដាសាក្សីនិយាយថា វាជារឿងអស្ចារ្សដែលពុំមានមនុស្សណាម្នាក់រងរបួស ខណៈបណ្ដាគ្រាប់មីស៊ីលធ្លាក់តែប៉ុន្មានម៉ែត្រពីបណ្ដាលេណដ្ឋាន។ ពួកគេដឹងមុនពីការវាយប្រហារតែពុំដឹងពីប្រភេទឬទំហំនៃការវាយប្រហារនេះឡើយ។ ការខូចខាតសម្ភារពិតជាធំធេងដូចដែលឃើញក្នុងបណ្ដារូបភាព។
បណ្ដាគ្រាប់រ៉ុក្កែតត្រូវបានបាញ់ទៀតកាលពីថ្ងៃទី១២មករាលើមូលដ្ឋានយោធាមួយ ដែលមានកងទាហានអាមេរិក នៅភាគខាងជើងអ៊ីរ៉ាក់ បណ្ដាលឲ្យមនុស្ស៤នាក់រងរបួស។ តាមកងទ័ពអ៊ីរ៉ាក់ថា សរុបគ្រាប់រ៉ុក្កែត៨គ្រាប់ត្រូវបានបាញ់ដាក់មូលដ្ឋានបាឡាដស្ថិតនៅចម្ងាយ៨០គីឡូម៉ែត្រខាងជើងក្រុងបាដាដ។ យោងតាមប្រភពយោធាថាអ្នករបួសទាំង៤នាក់សុទ្ធតែទាហានអ៊ីរ៉ាក់។
ម្យ៉ាងទៀតកាលពីថ្ងៃទី១២ មករា ប្រធានាធិបតីអាមេរិកលោកដូណាល់ត្រាំបានព្រមានអ៊ីរ៉ង់ ប្រឆាំងរាល់ការបង្ក្រាបពួកបាតុករតែរដ្ឋមន្ត្រីការពារប្រទេសរបស់លោកអះអាងថា លោកត្រាំត្រៀមពិភាក្សា ជាមួយមេដឹកនាំអ៊ីរ៉ង់ដោយគ្មានលក្ខខណ្ឌជាមុន។ ប៉ូលិសអ៊ីរ៉ង់កាលពីថ្ងៃទី១១មករាបានបំបែកបាតុកម្មរបស់ពួកនិស្សិតក្នុងរដ្ឋធានីអ៊ីរ៉ង់។ បាតុកម្មនោះធ្វើឡើងសម្ដែងការក្ដៅក្រហាយ ក្រោយការបាញ់ច្រឡំត្រូវយន្តហោះដឹកអ្នកដំណើរអ៊ុយក្រែន១គ្រឿងធ្លាក់ បណ្ដាលឲ្យមនុស្សបាត់បង់ជីវិត១៧៦នាក់។
ចំណែកអ៊ីរ៉ង់វិញហាក់ងាកមករកការសម្រាលភាពតានតឹងវិញ កាលពីថ្ងៃទី១២មករា ១០ថ្ងៃក្រោយភាពតានតឹងខ្ពស់ជាមួយអាមេរិកកំណត់តាមរយៈការវាយប្រហារនានា និងការបាញ់ធ្លាក់យន្តហោះស៊ីវិលអ៊ុយក្រែន ដោយសារការបាញ់ច្រឡំរបស់កងទ័ពអ៊ីរ៉ង់។ ព្រះចៅនៃប្រទេសកាតា ពេលយាងមកកាន់ក្រុងតេហេរ៉ង់ បានជួបជាមួយប្រធានាធិបតីអ៊ីរ៉ង់លោកហាសាន់រ៉ូហានីនិងមេដឹកនាំកំពូលប្រទេសនេះ លោកខាមីនី ដោយទ្រង់មានបន្ទូលថា យើងបានព្រមព្រៀងគ្នាថាដំណោះស្រាយវិបត្តិមានតែតាមរយៈការកាត់បន្ថយភាពតានតឹងនិងការចរចាគ្នា៕ ដកស្រង់ចេញពីវេបសាយ ៖ sputniknews (កែសម្រួលដោយ ៖ បុប្ផា)
ចែករំលែកព័តមាននេះ