តើអ្នកមានដែលអង្គុយរងចាំអ៊ីមែល ឬទូរស័ព្ទពីកន្លែងធ្វើការដែលអ្នកបានទៅសម្ភាសការងារតែមិនទទួលបានដំណឹងទាល់តែសោះទេ? ឬមួយទទួលបានដែរប៉ុន្តែវាបែរជាព័ត៌មានមិនល្អទៅវិញ? ប្រាកដណាស់ មិនមាននរណាដែលពេញចិត្តនឹងស្ថានការនេះទេ ប៉ុន្តែអ្នកមិនគួរបាក់ទឹកចិត្តទាំងស្រុងឡើយព្រោះមានវិធីសាស្ត្រមួយដែលអ្នកអាចធ្វើបានក្នុងស្ថានការនេះដែលជួយបើកផ្លូវឲ្យអ្នកនាពេលអនាគត ។
ជាក់ស្តែងពេលដែលអ្នកដឹងថាអ្នកមិនទទួលបានការងារនោះហើយ អ្នកប្រហែលមានអារម្មណ៍ខឹង ឬស្អប់កន្លែងនោះ ហើយជាលទ្ធផល អ្នកក៏មិនតបទៅនឹងអ៊ីមែលនោះទាំងស្រុង ។ ប៉ុន្តែជម្រើសនេះប្រៀបដូចជាបិទឱកាសខ្លួនឯងទាំងស្រុងទេ ។
អ្វីដែលអ្នកគួរតែគិតគឺ ចុះប្រសិនបើមនុស្សដែលក្រុមហ៊ុននោះជ្រើសរើសបានបដិសេធនឹងការងារនោះ? ឬចុះប្រសិនបើក្រុមហ៊ុនសម្រេចថាពួកគេត្រូវការបុគ្គលិកបន្ថែមទៀត? ប្រសិនបើការឆ្លើយតបរបស់អ្នកគួរឲ្យចាប់អារម្មណ៍ នោះអ្នកអាចជាជម្រើសទីមួយដែលក្រុមហ៊ុនទាក់ទងទៅនៅពេលដែលពួកគេខ្វះមនុស្ស ។ ដូច្នេះក្រៅពីឆ្លើយតបថាអរគុណដែលបានផ្តល់ឱកាសសម្រាប់ការសម្ភាសន៍ហើយ អ្នកអាចបន្ថែមថា៖
«ខ្ញុំយល់ពីការសម្រេចចិត្តរបស់អ្នក និងពិតជាអរគុណសម្រាប់ឱកាសដែលអ្នកបានផ្តល់ឲ្យ ។ សូមអ្នករក្សាខ្ញុំជាជម្រើសមួយសម្រាប់ឱកាសនាថ្ងៃអនាគតបន្តទៅទៀត ព្រោះខ្ញុំពិតជាគោរពស្រលាញ់ក្រុមហ៊ុនរបស់អ្នក និងមានគោលបំណងចង់ចូលរួមជាមួយអ្នកនៅពេលដែលឱកាសមកដល់» ។
មេរៀនសំខាន់ដែលអ្នកត្រូវរៀនពីអត្ថបទនេះ គឺអ្នកត្រូវមើលឃើញការបដិសេធជាឱកាសដែលអ្នកអាចរក្សាទំនាក់ទំនងជាមួយនឹងក្រុមហ៊ុនមួយវិញ ឬជាកន្លែងដែលអ្នកនៅតែចង់ចូលទៅធ្វើការជាមួយ ។ ប៉ុន្តែគន្លឹះសំខាន់ គឺអ្នកត្រូវតែឆ្លើយតបភ្លាមៗ និងបង្ហាញពីជំនឿចិត្តលើខ្លួនឯង ។ ប្រាកដណាស់ អ្នកមិនទទួលបានឱកាសនេះទេ តែជីវិតនៅតែបន្តដើរទៅមុខដដែល ហើយការរក្សាទំនាក់ទំនងជាមួយក្រុមហ៊ុនដទៃអាចជួយបង្កើតឱកាសឲ្យអ្នកនៅថ្ងៃក្រោយបាន ៕
ចែករំលែកព័តមាននេះ