លោកមហាសេដ្ឋី យូសាគូ ម៉ាអេហ្សាវ៉ា (Yusaku Maezawa) បានប្រទះឃើញវិធីថ្មីក្នុងការចាយវាយទ្រព្យសម្បត្តិដ៏ស្តុកស្តម្ភរបស់លោកដូចជាទិញរូបគំនូរមួយក្នុងតម្លៃ ៥៧លានដុល្លារ និងកក់សំបុត្រយន្តហោះដំបូងរបស់ SpaceX ទៅកាន់អាវកាសជាដើម ។ បច្ចុប្បន្ននេះលោកបានសន្យាថានឹងផ្តល់ថវិកា ១លានយ៉េន ឬ ៩ពាន់ដុល្លារឲ្យទៅអ្នក Follow លោកលើ Twitter ចំនួនមួយពាន់នាក់ ។
លោកបានបន្តថា លោកធ្វើដូច្នេះដើម្បីធ្វើពិសោធន៍មួយដើម្បីដឹងថាមនុស្សមានសុភមង្គលទេពេលដែលសុខៗបានលុយ ព្រោះលោកមានចម្ងល់ទាក់ទិននឹងប្រព័ន្ធដែលឲ្យលុយមនុស្សព្រោះតែមនុស្សម្នាក់នោះមានជីវិតរស់រាន ។
ទស្សនៈនេះត្រូវបានលើកឡើងដោយបេក្ខជនឈរឈ្មោះធ្វើជាប្រធានាធិបតីនៅសហរដ្ឋអាមេរិក គឺលោក អេនឌ្រូ យ៉ាង (Andrew Yang) ដែលបានសន្យាថានឹងឲ្យថវិកា ១ពាន់ក្នុងមួយខែទៅពលរដ្ឋពេញវ័យគ្រប់រូបដែលមានអាយុ ១៨ឆ្នាំ ។
លោក ម៉ាអេហ្សាវ៉ា បានបន្ថែមថាលោកនឹងតាមដានលទ្ធផលតាមការស្ទង់មតិពីអ្នកដែលទទួលបានលុយរបស់លោក ។ ហើយលោកបានសម្រេចចិត្តចាប់ផ្តើមការសិក្សានេះបន្ទាប់ពីលោកបានលក់អាជីវកម្មសំលៀកបំពាក់របស់ខ្លួនគឺ Zozo Inc ឲ្យទៅ SoftBank ក្នុងតម្លៃ ៩០០លានដុល្លារ ។
យោងទៅតាមការសិក្សាមួយនៅខែមករាឆ្នាំ ២០១៧ ក្នុងប្រទេសហ្វាំងឡង់ បានឲ្យដឹងថា អ្នកដែលទទួលបានប្រាក់ចំណូលប្រចាំខែជាមូលដ្ឋានដូច្នេះពិតជាមានសុភមង្គល និងសុខភាពល្អជាងពលរដ្ឋដែលមិនមានការងារធ្វើដទៃពិតមែន ។
ប៉ុន្តែអ្នករិះគន់មួយចំនួនបាននិយាយថា ការផ្តល់ប្រាក់ចំណូលមូលដ្ឋានដល់ពលរដ្ឋនឹងជំរុញទឹកចិត្តឲ្យមនុស្សមិនចង់រកការងារធ្វើ ។ ខណៈអ្នកដែលគាំទ្រគោលនយោបាយនេះអះអាងថាវាជំរុញឲ្យមនុស្សរកការងារដែលខ្លួនពិតជាស្រលាញ់ចូលចិត្តទៅវិញ ។
សម្រាប់លោក ម៉ាអេហ្សាវ៉ា វិញ លោកគិតថាថវិកាដែលលោកចែកនេះគឺមានគោលបំណងជំរុញដល់ការពិភាក្សាបន្ថែមពីប្រាក់ចំណូលមូលដ្ឋានក្នុងប្រទេសជប៉ុន ។ លោកបានសរសេរលើ Twitter របស់លោកថា «ខ្ញុំគិតថាអ្វីដែលមនុស្សគ្រប់គ្នាចង់បានមិនមែនជាលុយទេ តែជាការសម្រេចក្តីសុបិនរបស់ខ្លួន» ៕
កែសម្រួលដោយ ៖ សំណាង
ចែករំលែកព័តមាននេះ