ខេត្តបន្ទាយមានជ័យ ៖ ពិធីប្រគល់ផ្ទះជូនអតីតយុទ្ធជនចំនួន១២៩ខ្នង ជាលើកទី២ និងពិធីបញ្ចុះបឋមសិលាសាងសង់អគាសិក្សា១ខ្នង មាន៥បន្ទប់ បានប្រព្រឹត្តទៅកាលពីថ្ងៃទី១១ ខែមករា ឆ្នាំ២០២០ នៅចំណុចដីការ៉េពី…
ខេត្តបន្ទាយមានជ័យ ៖ ពិធីប្រគល់ផ្ទះជូនអតីតយុទ្ធជនចំនួន១២៩ខ្នង ជាលើកទី២ និងពិធីបញ្ចុះបឋមសិលាសាងសង់អគាសិក្សា១ខ្នង មាន៥បន្ទប់ បានប្រព្រឹត្តទៅកាលពីថ្ងៃទី១១ ខែមករា ឆ្នាំ២០២០ នៅចំណុចដីការ៉េពី ស្ថិតក្នុងភូមិកូនខ្លែង ឃុំប៉ោយចារ ស្រុកភ្នំស្រុក។
លោក គន់ គីម អនុប្រធានសមាគមអតីតយុទ្ធជនកម្ពុជាបានមានប្រសាសន៍ថា សមាគមអតីតយុទ្ធជនកម្ពុជាបានកសាងផ្ទះចំនួន១២៩ខ្នង និងអគាសិក្សា១ខ្នង៦បន្ទាប់ ព្រមទាំងផ្លូវក្រាសក្រួសក្រហម១ខ្សែប្រវែង៤.៥០០ម៉ែត្រ ជាអំណោយរបស់លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ។
លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យបានមានប្រសាសន៍ថា ជាការយកចិត្តទុកដាក់ ក៏ដូចជាតបស្នងសងគុណចំពោះអតីតយុទ្ធជនកម្ពុជា ដែលបានលះបង់ជីវិត និងកម្លាំងកាយចិត្តការពារបូរណភាពទឹកដីក្នុងបុព្វហេតុការពារជាតិមាតុភូមិបូជាសាច់ស្រស់ឈាមស្រស់ រហូតប្រទេសកម្ពុជាទទួលបានសុខសន្តិភាព។
លោកបានមានប្រសាសន៍ថា ដើម្បីជាការតបស្នងសងគុណចំពោះអតីតយុទ្ធជនកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានកសាងផ្ទះជូន និងចែកដីលំនៅដ្ឋាន និងដីអាស្រ័យផល ដើម្បីលើកកម្ពស់ជីវភាពការរស់នៅរបស់បងប្អូនអតីតយុទ្ធជនកម្ពុជា ហើយបានកសាងផ្លូវ និងអគាសិក្សាជូនដល់សិស្សានុសិស្សជាកូនអតីតយុទ្ធជនកម្ពុជា បានរៀនសូត្រមានចំណេះដឹង និងផ្តល់នូវការអភិវឌ្ឍន៍រីកចម្រើនជូនដល់ប្រជាពលរដ្ឋ។
លោកឧបនាយករដ្ឋមន្ត្រី កែ គឹមយ៉ាន បានមានប្រសាសន៍ថា បងប្អូនប្រជាពលរដ្ឋត្រូវរួមគ្នាថែរក្សានូវសន្តិភាពអោយបានគង់វង្ស និងយូរអង្វែង ដើម្បីទទួលបានសុខសន្តិភាព គ្មានការភ័យខ្លាច សម្បូរសប្បាយ ផ្តល់នូវការអភិវឌ្ឍន៍ និងរីកចម្រើនគ្រប់វិស័យ៕ (កែសម្រួលដោយ ៖ ធីតា)
ចែករំលែកព័តមាននេះ