កូរ៉េខាងជើង-សហរដ្ឋអាមេរិក ៖ អតីតបេសកជននុយក្លេអ៊ែរកូរ៉េខាងជើង លោកKIM KYE GWAN ថ្លែងកាលពីថ្ងៃទី១១មករាថា ការចរចាជាមួយសហរដ្ឋអាមេរិកនឹងអាចធ្វើឡើងវិញ ទាល់តែអាមេរិកព្រមទទួលយកពេញលេញបណ្ដាការទាមទាររបស់ក្រុងព្យុងយ៉ាង។
លោកKIM KYE GWAN បច្ចុប្បន្នជាទីប្រឹក្សានៅក្រសួងការបរទេសកូរ៉េខាងជើងគូសបញ្ជាក់ថា កូរ៉េខាងជើងនឹងមិនចូលរួមដាច់ខាតក្នុងការចរចាស្ដីពីនុយក្លេអ៊ែររបស់ខ្លូន ដោយគ្មានការសម្រាលទណ្ឌកម្មមួយផ្នែកដូចដែលខ្លួនបានស្នើ ក្នុងឱកាសនៃការជួបគ្នាកំពូលដែលទ័លច្រកនៅក្រុងហាណូយ រវាងប្រធានាធិបតីអាមេរិកលោកដូណាល់ត្រាំនិងមេដឹកនាំកូរ៉េខាងជើងលោកគីមជុងអ៊ុន កាលពីខែកុម្ភៈឆ្នាំ២០១៩ឡើយ។
ការអះអាងបែបនេះដែលផ្សាយដោយទីភ្នាក់ងារព័ត៌មានកូរ៉េខាងជើងKCNAធ្វើឡើងបន្ទាប់ពីសារចូលឆ្នាំថ្មីឆ្នាំសកល របស់មេដឹកនាំកូរ៉េខាងជើង ដែលគំរាមធ្វើការសាកល្បងនុយក្លេអ៊ែរនិងមីស៊ីលយុទ្ធសាស្ត្រថ្មី ប្រឈមមុខនឹងការចរចាដែលជាប់គាំងជាមួយសហរដ្ឋអាមេរិក។
លោកKIM KYE GWANបន្តថាគេអាចនិយាយថា ការបើកឡើងវិញនូវការចរចា រវាងកូរ៉េខាងជើងនិងអាមេរិកអាចធ្វើទៅបាន ក្នុងលក្ខខណ្ឌដែលអាមេរិកព្រមព្រៀងលើបណ្ដាសំណើដែលក្រុងព្យុងយ៉ាងលើកឡើង តែយើងដឹងច្បាស់ថា សហរដ្ឋអាមេរិកមិនបានត្រៀមឬអាចធ្វើបានឡើយ។ យើងដឹងច្បាស់ផ្លូវដែលយើងត្រូវដើរ ហើយយើងនឹងដើរតាមផ្លូវរបស់យើង៕ ដកស្រង់ចេញពីវេបសាយ ៖ yna (កែសម្រួលដោយ ៖ បុប្ផា)
ចែករំលែកព័តមាននេះ