ខេត្តកំពង់ចាម ៖ លោកអ៊ុន ចាន់ដា អភិបាលខេត្ត បានដឹកនាំកម្លាំងសមត្ថកិច្ចជាច្រើននាក់ចុះបង្ក្រាបសង្វៀនបញ្ជល់មាន់មួយកន្លែងស្ថិតនៅត្រង់ចំណុចតំបន់មុំបីដែលមានព្រំប្រទល់មួយផ្នែកជាប់ស្រុកមុខកំពូល, ស្រុកបាធាយនិងស្រុកកងមាស ដោយដកហូតបានអាវុធវែងកែច្នៃ១ដើម រួមនឹងសម្ភារៈផ្សេងៗ ចំណែកក្រុមអ្នកលេងល្បែងបាននាំគ្នារត់ប្រសាចគេចខ្លួនអស់។…
ខេត្តកំពង់ចាម ៖ លោកអ៊ុន ចាន់ដា អភិបាលខេត្ត បានដឹកនាំកម្លាំងសមត្ថកិច្ចជាច្រើននាក់ចុះបង្ក្រាបសង្វៀនបញ្ជល់មាន់មួយកន្លែងស្ថិតនៅត្រង់ចំណុចតំបន់មុំបីដែលមានព្រំប្រទល់មួយផ្នែកជាប់ស្រុកមុខកំពូល, ស្រុកបាធាយនិងស្រុកកងមាស ដោយដកហូតបានអាវុធវែងកែច្នៃ១ដើម រួមនឹងសម្ភារៈផ្សេងៗ ចំណែកក្រុមអ្នកលេងល្បែងបាននាំគ្នារត់ប្រសាចគេចខ្លួនអស់។
ប្រតិបត្តិការចុះបង្ក្រាបករណីខាងលើនេះបានធ្វើឡើងកាលពីវេលាម៉ោង១០ព្រឹកថ្ងៃទី១០មករា ឆ្នាំ២០២០ នៅក្នុងឃុំព្រែកកុយ ។
លោកមឿន ផា អភិបាលស្រុកកងមាស ប្រាប់ឲ្យដឹងថា ទីតាំងសង្វៀនបញ្ជល់មាន់បើកលួចលាក់ដោយខុសច្បាប់ខាងលើនេះ ត្រូវបានគេបើកលេងទើបតែពេលថ្មីៗនេះទេ ហើយក្រុមអ្នកដែលលេងល្បែងភាគច្រើនគឺមកពីរាជធានីភ្នំពេញ គេបានណាត់គ្នាលេងយ៉ាងច្រើន១ម៉ោងទៅ២ម៉ោងនឹងឈប់លេង ហើយនាំគ្នារុះរើរបស់របរយកត្រឡប់ទៅវិញ។
លោកអភិបាលស្រុកកងមាសបានប្រាប់បន្តថា ដោយទទួលបានព័ត៌មានពីប្រជាពលរដ្ឋទើបលោកអភិបាលខេត្ត គ្រាន់តែបានដឹងថាមានគេបើកលេងល្បែងបញ្ជល់មាន់នៅត្រង់ចំណុចគុហេរ ឃុំព្រែកកុយ ស្រុកកងមាស ក៏បានចេញប្រតិបត្តិការដឹកនាំកម្លាំងសមត្ថកិច្ចជាច្រើននាក់ ចុះមកបង្ក្រាបជាបន្ទាន់។
តាមប្រភពដដែលបានបន្តថា ប៉ុន្តែមិនទាន់ចុះមកដល់ផង ក្រោយពីក្រុមអ្នកលេងល្បែងដែលបានឃើញសមត្ថកិច្ចដាក់កម្លាំងពង្រាយតាមដងផ្លូវ ហើយដឹងថា មានសមត្ថកិច្ចចុះមកបង្ក្រាបនោះ ទើបក្រុមអ្នកលេងល្បែងទាំងនោះក៏បានទូរស័ព្ទប្រាប់ដល់បក្ខពួកឲ្យនាំគ្នារត់គេចខ្លួនអស់ ដើម្បីចៀសវាងកុំឲ្យសមត្ថកិច្ចចាប់ខ្លួន។
តាមប្រភពដដែលបានបន្តថា លុះពេលសមត្ថកិច្ចចុះមកដល់ចំណុចសង្វៀនបញ្ជល់មាន់ ដកហូតបានអាវុធវែងកែច្នៃ១ដើម រួមនឹងវត្ថុតាងមួយចំនួនទៀតសម្រាប់រុំខ្នាយមាន់ ចំណែកម្ចាស់ដីវិញមិនបាននៅទីនេះទេ ដោយបានទៅរស់នៅឯខេត្តស្ទឹងត្រែង។ ក្រោយពីមានការណែនាំពីលោកអភិបាលខេត្ត រូបលោកបានដាក់កម្លាំងឱ្យនៅប្រចាំការឃ្លាំមើលក្រែងមានក្រុមញៀនល្បែងបន្តបើកលេងបញ្ជល់មាន់លួចលាក់ ដោយខុស ច្បាប់បន្តទៀត ជាមួយនោះបានប្រគល់ភារកិច្ចជូនលោកអភិបាលរងស្រុកកងមាសម្នាក់ទទួលខុសត្រូវ។
លោកមឿន ផា អភិបាលស្រុកកង់មាសបញ្ជាក់ថា នៅត្រង់ចំណុចដែលគេលួចលេងល្បែងបញ្ជល់មាន់ខាងលើនេះស្ថិតនៅតំបន់ចំកាត់មាត់ញកដាច់ស្រយាល ប្រសិនបើសមត្ថកិច្ចនៅស្រុកកងមាសចុះទៅបង្ក្រាបទាល់តែជិះទូកកាត់បឹង ទើបអាចទៅដល់បាន។ ទីកន្លែងនេះគឺចុះពីស្ពានបេតុងទី២៣នៅជាប់ផ្លូវជាតិលេខ៦ ហើយក្រុមអ្នកលេងល្បែងទាំងនោះគឺសុទ្ធសឹងតែមកពីរាជធានីភ្នំពេញ ដែលគេបានណាត់យកតំបន់នេះជាកន្លែងបញ្ជល់មាន់។
តាមការណែនាំរបស់អភិបាលខេត្ត គឺមានវិធានការតឹងរឹងនឹងមិនអនុញ្ញាតឲ្យបើកលេងល្បែងបញ្ជល់មាន់នៅក្នុងឃុំព្រែកកុយ និងតាមកន្លែងផ្សេងទៀតនៅក្នុងស្រុកកងមាស ជាដាច់ខាតដើម្បីពង្រឹងគោលនយោបាយភូមិឃុំមានសុវត្ថិភាពរបស់ក្រសួងមហាផ្ទៃ៕ (កែសម្រួលដោយ ៖ ធីតា)
ចែករំលែកព័តមាននេះ