រាជធាំនីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា យុវជន២នាក់ ខណៈជិះម៉ូតូត្រឡប់មកពីមើលសាច់ញាតិនៅមន្ទីរពេទ្យវិញ ស្រាប់តែត្រូវក្រុមក្មេងស្ទាវប្រដាប់ដោយដំបង ខ្សែក្រវ៉ាត់ប្រមាណជាង១០នាក់ ដេញស្ទាក់វាយប៉ុនប៉ងប្លន់យកម៉ូតូ តែមិនសម្រេច ព្រោះតែម្ចាស់ម៉ូតូភ័យពេកក៏នាំគ្នាដកកូនសោ រួចរត់គេច ហើយក្រុមក្មេងស្ទាវវាយកាច់ស្លាកលេខម៉ូតូខ្ទេច គាប់ជូនត្រូវកម្លាំងប៉ូលិសល្បាតឃើញ ក៏ផ្អើលនាំគ្នារត់គេចបាត់អស់ បង្កឱ្យមានការភ្ញាក់ផ្អើលកាលពីម៉ោង៣និង៣០នាទីទៀបភ្លឺ ថ្ងៃទី១២ ខែមករា ឆ្នាំ២០២០ នៅស្តុបណូគា លើផ្លូវ២៧១ កែងផ្លូវ២០០៤ ក្នុងភូមិត្រពាំងឈូក សង្កាត់អូរបែកក្អម ខណ្ឌសែនសុខ ។
តាមសម្តីយុវជនរងគ្រោះទាំង២នាក់ បានឲ្យដឹងថា មុនកើតហេតុ ពួកគេទាំង២នាក់ វិលត្រឡប់មកពីមើលក្រុមគ្រួសារដែលបានសម្រាកព្យាបាលនៅមន្ទីរពេទ្យរុស្ស៊ី ក្នុងបំណងវិលត្រឡប់ទៅផ្ទះវិញនៅខណ្ឌសែនសុខ ដោយជិះម៉ូតូមួយគ្រឿង ម៉ាកហុងដា សេ១២៥ ស៊េរី២០១៦ ពណ៌ខ្មៅ ពាក់ស្លាកលេខ កំពង់ចាម1O-2527 ជិះឌុបគ្នា តាមផ្លូវ២៧១ ពីត្បូងទៅជើង ។
ប្រភពដដែលបន្តថា លុះដល់ចំណុចខាងលើ ស្រាប់តែលេចមុខក្រុមជនសង្ស័យប្រមាណជាង១០នាក់ ជិះម៉ូតូជាច្រើនគ្រឿង ប្រដាប់ដោយដំបង ខ្សែក្រវ៉ាត់ ដេញតាមពីក្រោយ ស្ទាក់វាយ ដោយពួកគាត់ភ័យពេកក៏ដកសោម៉ូតូរត់គេចខ្លួនតែម្តង ប៉ុន្តែក្រុមជនសង្ស័យនោះ វាយកាច់ស្លាកលេខម៉ូតូខ្ទេច តែគាប់ជួនពេលនោះកម្លាំងល្បាតរបស់ប៉ូលិសបានមកដល់ ក្រុមជនសង្ស័យក៏ផ្អើលនាំគ្នារត់គេចបាត់អស់តែម្តង ។
តាមមតិប្រជាពលរដ្ឋបានឲ្យដឹងថា រូបភាពហិង្សាខាងលើនេះ ជនល្មើសមានគ្នាច្រើន ជាញឹកញាប់មកហើយពេលយប់ស្ងាត់ ដេញវាយអ្នកដំណើរ បើមានឱកាសល្អយកម៉ូតូតែម្តង តែបើសិនជាយកមិនទាន់ទេ គេថា រឿងហឹង្សា ធាតុពិតគោលបំណងរបស់ក្រុមជនល្មើស ប៉ុនប៉ងប្លន់យកទ្រព្យសម្បត្តិតែម្តង ដូចករណីយុវជន២នាក់ខាងលើ កុំបានកម្លាំងប៉ូលិសល្បាតមកទាន់ ធ្វើឲ្យក្រុមជនល្មើសរត់គេចបាត់អស់ ។
ក្រោយកើតហេតុ ម៉ូតូខ្ទេច បាក់អស់ យុវជនរងគ្រោះទាំង២នាក់ មានតែទៅដាក់ពាក្យបណ្តឹងនៅប៉ុស្តិ៍ ដើម្បីឲ្យសមត្ថកិច្ចបន្តស្រាវជ្រាវ ដើម្បីតាមចាប់ក្រុមជនល្មើសមកផ្តន្ទាទោសតាមច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ