ខេត្តសៀមរាប ៖ កម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្តសៀមរាប បានធ្វើការស្រាវជ្រាវនិងល្បាតរហូតឈានដល់ឃាត់ខ្លួនជនសង្ស័យម្នាក់ ខណៈកំពុងធ្វើសកម្មភាពកាច់សោកម៉ូតូនៅកន្លែងហាត់ប្រាណនៅជិតមាត់ស្ទឹងសៀមរាប កាលពីវេលាម៉ោង៦និង១៥នាទីយប់ថ្ងៃទី១០ ខែមករា ឆ្នាំ២០២០ នៅក្រុងសៀមរាប។
ជនសង្ស័យម្នាក់ខាងលើឈ្មោះ ឈុន ឧត្តម ហៅអាខ្មៅ ភេទប្រុស អាយុ៣៨ឆ្នាំ មានស្រុកកំណើតក្នុងភូមិចំបក់ ឃុំអូរចំបក់ ស្រុកតាកែវ ខេត្តតាកែវ ទីលំនៅបច្ចុប្បន្នក្នុងសង្កាត់ចោមចៅ ខណ្ឌដង្កោ រាជធានីភ្នំពេញ ។
បើតាមប្រភពពីប៉ូលិសជំនាញខេត្តបានឲ្យដឹងថា ដោយមានការយកចិត្តទុកដាក់ពីលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប នឹងបានការចង្អុលបង្ហាញពីលោកឧត្តម សេនីយ៍ ត្រី ភឹង ចិន្តារ៉េត ស្នងការរង ទទួលផែនការងារនគរបាលព្រហ្មទណ្ឌ ដឹកនាំកម្លាំងដោយលោកវរសេនីយ៍ឯក ហង្ស សូផាតភីរម្យ នាយ ការិយាល័យនគរបាលព្រហ្មទណ្ឌកម្រិតស្រាល បានដាក់កម្លាំងល្បាតពួនស្ទាក់ចូលទៅកន្លែងហាត់ប្រាណក្បែរស្នាក់ការប៉ូលិសចរាចរណ៍មាត់ស្ទឹង។
តាមប្រភពដដែលបានបន្តថា នៅមុនពេលកើតហេតុ កម្លាំងនគរបាលព្រហ្មទណ្ឌកម្រិតស្រាលកំពុងធ្វើការដើរល្បាតពួនស្ទាក់បង្កប់ក្នុងចំណោមប្រជាពលរដ្ឋដែលកំពុងហាត់ ប្រាណនៅក្បែរស្នាក់ការប៉ូលិសចរាចរណ៍មាត់ស្ទឹង ស្រាប់តែមានជនសង្ស័យម្នាក់ពាក់អាវក្រណាត់ដៃខ្លីពណ៌ទឹកប៊ិច ស្លៀក ខោក្រណាត់ជើងវែង ពណ៌ប្រផេះ បានធ្វើសកម្មភាពលួចកាច់សោកម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០២០ ពណ៌ខ្មៅ គ្មានស្លាកលេខ ដែលទុកនៅចំណុចខាងក្រោយហាងកាហ្វេអ៊ីនថានិន ទល់មុខបន្ទប់ទឹក ស្ថិតនៅភូមិមណ្ឌល ២ សង្កាត់ស្វាយដង្គំ ក្រុងសៀមរាប។
តាមប្រភពដដែលបានបន្តថា ពេលដែលធ្វើសកម្មភាពកាច់សោ.កម៉ូតូរួច ជនសង្ស័យបានបណ្តើរម៉ូតូចេញហើយរុញទៅទិសខាងជើងក្រោយមន្ទីរទេសចរណ៍ចាស់ ដោយមានការសង្ស័យ ទើបកម្លាំងជំនាញបានកាក់បំរុងសួរនាំដែរ តែជនសង្ស័យបានផ្តួលម៉ូតូ ហើយព្យាយាមរត់គេចខ្លួន តែត្រូវសមត្ថកិច្ចដេញប៉ផាប់ចាប់ពភីងបាននៅចំណុចសួន ច្បារបឹងហ្កាឡូ មុខមហាសណ្ឋាគារអង្គរ ស្ថិតនៅភូមិមណ្ឌល២ សង្កាត់ស្វាយដង្គំ ក្រុងសៀមរាប។
បន្ទាប់ឃាត់ខ្លួនជនសង្ស័យម្នាក់ខាងលើ សមត្ថកិច្ចឆែកឆេរក្នុងខ្លួនរកឃើញសោអក្សរតេ(T) ចំនួន២គ្រាប់ ដងកាច់សម្រាប់សោម៉ូតូចំនួន និងគ្រាប់ឆក់សំរាប់បើកគំរបសោសុវត្ថិភាពចំនួនបីគ្រាប់។
ក្រោយពេលសួរនាំ ជនសង្ស័យ បានឆ្លើយសារភាពថា ខ្លួនពិតជាបានធ្វើសកម្មភាពលួចកាច់សោ.កម៉ូតូមួយគ្រឿងខាងលើប្រាកដមែន ដោយមានបក្ខពួកជាអ្នកចាំមើល និងបោះដៃឲ្យពាក់អាវក្រណាត់ដៃវែង ពណ៌ស និងពាក់មួកសុវត្ថិភាពជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពុំចាំស្លាកលេខ បានរត់គេចខ្លួនបាត់។
លោកវរសេនីយ៍ឯក ហង្ស សូផាតភីរម្យ នាយការិយាល័យព្រហ្មទណ្ឌកម្រិតស្រាលនៃស្នងការដ្ឋានខេត្តសៀមរាប បានឲ្យដឹងថា ករណីជនសង្ស័យខាងលើនេះត្រូវបានកម្លាំងនគរបាលជំនាញកំពុងរៀបចំកសាងសំណុំរឿងបញ្ជូនទៅតុលាការនារសៀលថ្ងៃទី១១ ខែមករា ឆ្នាំ២០២០នេះ ដើម្បីឲ្យតុលាការចាត់ការបន្តតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ