ខេត្តកំពង់ធំ ៖ លោកជំទាវ ជា សិរីអគ្គនាយកបច្ចេកទេស ធនាគារនៃជាតិកម្ពុជាបានបញ្ជាក់ថា ៖ ការជួបជុំគ្នាដាំដើមឈើរបស់យើងនៅពេលនេះ គឺជាការរួមគ្នាដើម្បីលើកកម្ពស់ស្មារតីឲ្យចេះស្រឡាញ់ថែរក្សាដើមឈើ និងព្រៃឈើតាមរយៈការដាំដុះថ្មីសំដៅធ្វើឲ្យទីធ្លារសាលារៀនមានសោភ័ណ្ឌភាពកាន់តែស្រស់បំព្រង និងសម្រាប់ផ្ដល់ជាម្លប់ដល់សាលារៀន និងផ្ដល់ជាម្លប់ឲ្យសិស្សជ្រកសម្រាកលេងកម្សាន។
នេះជាការលើកឡើងរបស់លោកជំទាវ ជា សិរី ថ្លែងទៅកាន់សិស្សានុសិស្សវិទ្យាល័យកំពង់ថ្ម ដែលបានមកចូលរួមដាំកូនឈើកាលថ្ងៃទី១១ ខែមករា ឆ្នាំ២០២០កន្លងទៅនេះដែលបានធ្វើឡើងនៅវិទ្យាល័យកំពង់ថ្ម ស្ថិតក្នុងឃុំកំពង់ថ្ម ស្រុកសន្ទុកខេត្តកំពង់ធំ។
លោកជំទាវ អគ្គនាយកបច្ចេកទេស បានបន្តទៅទៀតថា ៖ ដើមឈើមានអត្ថប្រយោជន៍ណាស់សម្រាប់សរីរាង្គមានជីវិតទាំងអស់លើភពផែនដីទាំងមនុស្ស សត្វនិងរុក្ខជាតិ។ ប៉ុន្តែដើម្បីរក្សានិរន្តរភាពព្រៃឈើបាននោះ លុះត្រាណាមនុស្សទាំងអស់ចេះទាញយកផលប្រយោជន៍ពីព្រៃធម្មជាតិទាំងនេះ ដោយការប្រុងប្រយ័ត្ន និងការទទួលខុសត្រូវទើបមិនមានការបាត់បង់ និងគង់វង្សព្រៃឈើ ប្រព័ន្ធអេកូឡូស៊ី និងជីវចម្រុះ។
ហើយតារយៈសកម្មភាពដែលយើងរួមគ្នាធ្វើនាពេលនេះ ក៏បានបង្ហាញពីការចូលរួមចំណែកដល់គោលនយោបាយរបស់រាជរដ្ឋាភិបាលស្តីពីការគ្រប់គ្រង ការពារ អភិរក្ស និងអភិវឌ្ឍព្រៃឈើនៅកម្ពុជាឲ្យបានចីរភាពនោះផងដែរ។
ជាមួយនេះដែរការជួបជុំរបស់យើងនៅថ្ងៃនេះដែរ ក៏ជានិមិត្តរូបនៃការរួបរួមសាមគ្គីគ្នា ឯកភាពគ្នា និងសហការគ្នា ដើម្បីបុព្វហេតុកសាង ការពារ និងអភិវឌ្ឍមាតុភូមិកម្ពុជាឲ្យកាន់តែសម្បូរសប្បាយរុងរឿង ។ ហើយបច្ចុប្បន្ននេះ ត្រូវបានគេមើលឃើញថា មានយុវជនយើងបានចូលរួមយ៉ាងសកម្មក្នុងការងារអភិវឌ្ឍសេដ្ឋកិច្ច និងសង្គមដែលនេះបង្ហាញឲ្យឃើញថា យុវជនយើងមានតួនាទីកាន់តែសំខាន់ក្នុងការកសាងជាតិមាតុភូមិ ប្រកបដោយស្មារតីសាមគ្គី និងទទួលខុសត្រូវខ្ពស់ចំពោះជាតិ។
នៅក្នុងឱកាសនោះដែរ លោកជំទាវ ជា សិរី បានបញ្ជាក់ឲ្យសិស្សានុសិស្សយើងបានដឹងពីផលប្រយោជន៍ព្រៃឈើផងដែរគឺថា នៅក្នុងព្រៃឈើ ១ ហិចតា អាចបញ្ចេញឧស្ម័នអុកស៊ីសែន បានចំនួន ២,៧តោន, កែច្នៃក្រដាសឡើងវិញ១តោន , អាចរក្សាទុកព្រៃឈើបាន១៧ ដើម ស្មើនឹងប្រេង ១.៤០០លីត្រ ដែលស្មើនឹងថាមពលអគ្គីសនី ៤.០០០ វ៉ាត់ និងស្មើនឹងទឹក ២៧.០០០លីត្រ។
តាមរយៈលោកជំទាវ ជា សិរី នៅក្នុងឱកាសនោះធនាគារ CIMBបានឧបត្ថម្ភដល់វិទ្យាល័យកំពង់ថ្មមាន ៖ ម៉ាស៊ីនបូមទឹក១គ្រឿង ម៉ាស៊ីនកាត់ស្មៅ១គ្រឿង និងសម្ភារៈសិក្សាដល់សិស្សថ្នាក់ទី១២ ត្រូវប្រលងចំនួន២១៦នាក់។ ដោយឡែកសម្រាប់លោកជំទាវផ្ទាល់ក៏បានឧបត្ថម្ភប៊ូល១ឈុត ១២គ្រាប់ ដើម្បីលើកកម្ពស់គុណភាពកីឡាប៉េតុងផងដែរ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ