ប្រទេសអ៊ីរ៉ង់ ៖ មេបញ្ជាការកងទ័ពអាកាសនៃកងកម្លាំងឆ្នាំបដិវត្តន៍អ៊ីរ៉ង់ កាលពីថ្ងៃទី១១ ខែមករា ឆ្នាំ២០២០ បានប្រកាសទទួលខុសត្រូវទាំងស្រុង ចំពោះគ្រោះមហន្តរាយនៃការបាញ់ធ្លាក់យន្តហោះដឹកអ្នកដំណើរអ៊ុយក្រែន១គ្រឿង កាលពីថ្ងៃទី៨ ខែមករា ក្រោយហោះឡើងបន្តិចចេញពីព្រលានយន្តហោះក្រុងតេហេរ៉ង់ ដោយមីស៊ីលអ៊ីរ៉ង់១គ្រាប់ដែលបាញ់ច្រឡំ។
សោកនាដកម្មនោះបណ្ដាលឲ្យមនុស្ស១៧៦នាក់បានបាត់បង់ជីវិត ដែលភាគច្រើនជាជនជាតិអ៊ីរ៉ង់ និងជនជាតិកាណាដា។ ក្រៅពីនេះ ក៏មានជនជាតិអាហ្វហ្គានីស្ថាន អង់គ្លេស ស៊ុយអែត និងអ៊ុយក្រែន។
ឧត្ដមសេនីយទោ អាម៉ារ៉ាលីហា ហ្សុីហ្សាដេហ៍ ក្នុងសេចក្ដីថ្លែងការណ៍ជាង១០នាទីមួយ តាមទូរទស្សន៍រដ្ឋថ្លែងថា ខ្ញុំបានដឹងពីសោកនាដកម្មនោះ ខណៈខ្ញុំស្ថិតនៅភាគខាងលិចប្រទេសបន្ទាប់ពីអ៊ីរ៉ង់បាញ់មីស៊ីល ប្រឆាំងបណ្ដាមូលដ្ឋានយោធាដែលមានកងទាហានអាមេរិកនៅអ៊ីរ៉ាក់។ ការបាញ់របស់អ៊ីរ៉ង់នេះជាការសងសឹកចំពោះការផ្តាច់យកជីវិត ឧត្ដមសេនីយអ៊ីរ៉ង់ កាសេមសូឡីម៉ានី តាមរយៈការវាយប្រហារតាមអាកាសមួយរបស់អាមេរិកនៅក្រុងបាដាដ។ ខ្ញុំសូមទទួលខុសត្រូវទាំងស្រុង ចំពោះគ្រោះមហន្តរាយនេះ ហើយខ្ញុំសុខចិត្តធ្វើតាមរាល់សេចក្ដីសម្រេច។ ខ្ញុំសុខចិត្តស្លាប់ជាជាងឃើញគ្រោះថ្នាក់បែបនេះ។
ឧត្ដមសេនីយរូបនោះបន្តថា នាយប់មានគ្រោះថ្នាក់ប្រទេសស្ថិតក្នុងស្ថានភាពប្រកាសអាសន្នកម្រិតសង្គ្រាម។ យប់នោះយើងត្រៀមសម្រាប់ជម្លោះទាំងស្រុងមួយ ដោយសារការគំរាមនានារបស់អាមេរិក។ ពេលនោះខ្ញុំចាត់ទុកថា សង្គ្រាមកើតមាន មកពីវត្តមានរបស់យន្តហោះជាច្រើននៅលើអាកាសតំបន់មជ្ឈឹមបូព៌ា មានទាំងបណ្ដាយន្តហោះសង្គ្រាមនិងយន្តហោះទម្លាក់គ្រាប់បែកមួយចំនួនផង ដែលបញ្ជូនមកបន្ថែមកម្លាំង។ នោះជាផលវិបាកនៃអំពើអាក្រក់របស់អាមេរិក គឺភាពតានតឹងដែលគេបង្កើតឡើងក្នុងតំបន់និងបណ្ដាសកម្មភាពរបស់គេ។
ឧត្ដមសេនីយរូបនេះបន្តថា មានច្រើនពេលដែលប្រព័ន្ធការពារអាកាសរាយការណ៍ថា បណ្ដាមីស៊ីលបណ្ដែតត្រូវបានបាញ់សំដៅប្រទេសយើង រួចពេលនោះយើងត្រៀមបាញ់ដោយម្រាមដៃស្ថិតលើប៊ូតុងរួចស្រេច។ មានការផ្ដល់ព័ត៌មាននានាប្រាប់លោកថា មានការបាញ់មីស៊ីលបណ្ដែតហើយប្រតិបត្តិករប្រព័ន្ធមីស៊ីលបានបាញ់ធ្លាក់យន្តហោះ ព្រោះយល់ថាជាមីស៊ីលបណ្ដែតមួយ។
មានការច្រឡំរបស់ប្រតិបត្តិករ តែប្រព័ន្ធគមនាគមន៍ហាក់ត្រូវគេអុកឡុករំខាន ជាផលវិបាកមិនអាចឲ្យគេអាចទាក់ទងនរណាបាន។ គេមានពេលតែ១០វិនាទីដើម្បីធ្វើការសម្រេចចិត្ត ថាតើត្រូវបាញ់ឬមិនបាញ់។ គួរឲ្យសោកស្ដាយគោលដៅពុំមែនជាមីស៊ីលបណ្ដែតតែជាយន្តហោះដឹកអ្នកដំណើរទៅវិញ។ មនុស្សរបស់យើងម្នាក់បានច្រឡំ ហើយរូបគេស្ថិតក្រោមបញ្ជារបស់យើងដូច្នេះការទទួលខុសត្រូវធ្លាក់លើយើង។ វាជាការសម្រេចប្រញាប់ប្រញាល់ពេករបស់មនុស្សម្នាក់ ទើបមានគ្រោះមហន្តរាយដ៏ធំនេះ។
អ៊ីរ៉ង់កាលពីថ្ងៃទី១១មករាបានសុំទោសចំពោះការបាញ់ធ្លាក់យន្តហោះនេះ។ ចំណែកប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គី ទាមទារឲ្យមានការដាក់ទោសបណ្ដាពិរុទ្ធជនហើយចេញសងការខូចខាត។ រីឯនាយករដ្ឋមន្ត្រីកាណាដា លោកJUSTIN TRUDEAU ទាមទារតម្លាភាពនិងឲ្យមានការស៊ើបអង្កេតដ៏ស៊ីជម្រៅមួយ និងវែកមុខបណ្ដាអ្នកទទួលខុសត្រូវ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ