រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ ខណៈពេលជិះម៉ូតូធ្វើដំណើរសុខៗ ស្រាប់តែឈប់រួចដួលសន្លប់តាមផ្លូវ បង្កការភ្ញាក់ផ្អើលដល់ប្រជាពលរដ្ឋកាលពីវេលាម៉ោង៩ និង៤០នាទីយប់ថ្ងៃទី១១ ខែមករា ឆ្នាំ២០២០ នៅតាមបណ្ដោយផ្លូវ១០៥ កែងនឹងផ្លូវ២៧៨ ស្ថិតក្នុងសង្កាត់បឹងកេងកងទី២ ខណ្ឌបឹងកេងកង ។
បើតាមប្រភពព័ត៌មានពីសន្តិសុខដែលយាមនៅខារ៉ាអូខេមួយកន្លែងក្បែរកន្លែងកើតហេតុបានប្រាប់ឲ្យដឹងថា មុនពេលកើតហេតុ គេឃើញបុរសរងគ្រោះខាងលើបើកបរម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៦ ពាក់ស្លាកលេខ ភ្នំពេញ ១FY-៩៤៧៤ ធ្វើដំណើរតាមបណ្ដោយផ្លូវ១០៥ ក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើ ស្រាប់តែបុរសរងគ្រោះបានឈប់ រួចដាក់ជន្ទល់ម៉ូតូ ហើយជនរងគ្រោះធ្លាក់ពីលើម៉ូតូដួលសន្លប់តែម្ដង។
តាមប្រភពដដែលបានបន្តថា ពេលឃើញដូច្នេះ ក្រុមសន្តិសុខទាំងអស់ក៏បាននាំគ្នាជួយធ្វើចលនាដើម្បីសង្គ្រោះបឋម និងយកទូរស័ព្ទពីហោប៉ៅរបស់ជនរងគ្រោះខលទៅប្រាប់ក្រុមគ្រួសារ និងហៅរថយន្តសាមុយរបស់មន្ទីរពេទ្យឱ្យមកដឹកជនរងគ្រោះយកទៅសង្គ្រោះនៅមន្ទីរពេទ្យដែរ ប៉ុន្តែដោយសារចាំយូរពេក ទើបពេលក្រុមគ្រួសាររបស់បុរសរងគ្រោះខាងលើដែលមកដល់ ក៏បានដឹកជនរងគ្រោះតាមរថយន្ដផ្ទាល់ខ្លួនយកទៅសង្គ្រោះនៅមន្ទីរពេទ្យភ្លាមៗ ចំណែកម៉ូតូរបស់ជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារយកទៅផ្ទះវិញផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ