ខេត្តកំពង់ឆ្នាំង ៖ កាលពីវេលាម៉ោងប្រមាណ៤និង៥០នាទីរសៀលថ្ងៃទី១១ ខែមករា ឆ្នាំ ២០២០ មានក្រុមប្រដាប់អាវុធមួយក្រុមគ្នា៤នាក់ជិះម៉ូតូពីរគ្រឿងបានភ្ជង់កាំភ្លើងបាញ់គំរាមប្លន់យកកាបូបលុយពីអ្នកលក់ស្រាបៀរម្នាក់ ខណៈជនរងគ្រោះកំពុងតែឈប់ដាក់ស្រាបៀរឱ្យម៉ូយនៅចំណុចភូមិច្រករមៀត ឃុំឈូកស ស្រុកកំពង់ត្រឡាច ។
ជនរងគ្រោះម្នាក់ខាងលើឈ្មោះ អឿន ភេទប្រុស អាយុ៣៣ឆ្នាំ ជាអ្នកបើករថយន្តដឹកស្រាបៀរដាក់តាមដេប៉ូ ។
តាមប្រភពព័ត៌មានបានឱ្យដឹងថា មុនពេលកើតហេតុ ជនរងគ្រោះបានឈប់ដាក់ស្រាបៀរនៅចំណុចកើតហេតុខាងលើ ស្រាប់តែមានជនដៃដល់មួយក្រុមបានភ្ជង់កាំភ្លើងគំរាមប្លន់យកកាបូបលុយពីជនរងគ្រោះ ប៉ុន្តែជនរងគ្រោះបានស្ទុះរត់យកទាំងកាបូបលុយ ហើយត្រូវជនសង្ស័យបាញ់ឡើងលើចំនួន២គ្រាប់ ។ ក្នុងហេតុការណ៍នោះមិនមាននរណារងរបួសនោះទេហើយក៏មិនមានបាត់បង់ទ្រព្យសម្បត្តិអ្វីដែរ ។
ក្រោយពេលធ្វើសកម្មភាពមិនបានសម្រេច ជនដៃដល់ក៏បាននាំគ្នាគេចខ្លួនបាត់អស់ ។ ខណៈពេលនេះសមត្ថកិច្ចកំពុងញាប់ដៃញាប់ជើងក្នុងការស្រាវជ្រាវរកក្រុមជនដៃដល់ ដើម្បីយកមកផ្តន្ទាតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ