រាជធានីភ្នំពេញ ៖ សង្សារមួយគូ ខណៈពេលកំពុងជិះម៉ូតូឌុបគ្នាធ្វើដំណើរតាមផ្លូវសុខៗ ស្រាប់តែត្រូវរថយន្តទ្រុងដឹកក្រណាត់១គ្រឿងបើកកៀរអ្នកទាំង២ បណ្ដាលឲ្យដួលខ្ទាតយុវជនជាសង្សារចូលក្រោមកង់រថយន្តនោះកិនបែកក្បាលបាត់បង់ជីវិតភ្លាមៗមួយរំពេច ។ ចំណែកឯនារីជាសង្សារបានរងរបួសស្រាល និងយំសោកបោកខ្លួនឱបសង្សារបណ្ដូលចិត្តគួរឲ្យសង្វែគ ក្រោយមកអ្នកបើកបររថយន្តបង្កត្រូវបានអ្នកភូមិដេញតាមចាប់ប្រគល់ឱ្យនគរបាលចាត់ការតាមច្បាប់។
ហេតុការណ៍ខាងលើនេះបានកើតឡើងកាលពីវេលាម៉ោង២និង៣០នាទីរសៀលថ្ងៃទី១១ ខែមករា ឆ្នាំ២០២០ នៅនៅលើកំណាត់ផ្លូវបេតុង ស្ថិតនៅក្នុងភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ។
យុវជនដែលបាត់បង់ជីវិតឈ្មោះ បឺយ សី អាយុ២៣ឆ្នាំ ស្នាក់នៅផ្ទះជួល ក្នុងភូមិកំបូល សង្កាត់កំបូល ខណ្ឌកំបូល និងមានស្រុកកំណើត នៅក្នុងភូមិកណ្តោល ឃុំព្រះដំរី ស្រុកស្ទោង ខេត្តកំពង់ធំ ។ ចំណែកនារីជាសង្សារដែលរងរបួសស្រាលឈ្មោះ លី សុខណាន អាយុ២១ឆ្នាំ មុខរបរកម្មការិនីរោងចក្រកាត់ដេរ ស្នាក់នៅផ្ទះជួលក្នុងភូមិត្រយឹង ឃុំពើក ស្រុកអង្គស្នួល ខេត្តកណ្តាល និងមានស្រុកកំណើតនៅក្នុងភូមិឃុំជាមួយគ្នា ។ អ្នកទាំង២នាក់ជិះម៉ូតូ១គ្រឿងម៉ាកហុងដា ធុនសេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ កំពង់ធំ ១F-៩១០៣ ។
ដោយឡែកភាគីខាងរថយន្តបង្កមួយគ្រឿងម៉ាកហ៊ីយ៉ាន់ដាយ មានឃ្លប់ដឹកក្រណាត់ ពណ៌ ប្រផេះ ពាក់ស្លាកលេខ ភ្នំពេញ ៣B-៣៧៣៩ បើកបរដោយយុវជនម្នាក់ឈ្មោះ ផន ផាណាំង អាយុ១៩ឆ្នាំ មុខរបរបើកបររថយន្តដឹកក្រណាត់ មានទីលំនៅក្នុងភូមិតាយាន ឃុំពាំងល្វា ស្រុកឧដុង្គខេត្តកំពង់ស្ពឺ ត្រូវបានអ្នកភូមិចាប់ខ្លួនបានភ្លាមៗផងដែរ។
តាមប្រភពពីនារីជាសង្សារបាននិយាយឲ្យដឹងថា មុនពេលកើតហេតុ យុវជនជាសង្សារបានជិះម៉ូតូមួយគ្រឿងឌុបនាងចេញពីបន្ទប់ជួលរបស់នាងស្ថិតនៅនៅឯស្រុកអង្គស្នួលទៅយកអត្តសញ្ញាណប័ណ្ណរបស់យុវជនជាសង្សារនៅកន្លែងស្នាក់នៅឯភូមិកំបូល សង្កាត់កំបូល ខណ្ឌកំបូល ដើម្បីយកទៅភ្ជាប់ជាមួយឯកសារចូលធ្វើការងាររោងចក្រ។ លុះពេលជិះម៉ូតូឌុបគ្នា ទៅដល់ត្រង់ចំណុចកើតហេតុ ស្រាប់តែរថយន្តបង្កខាងលើបើកបរក្នុងទិសដៅស្របគ្នាតាមពីក្រោយព្រមទាំងបើកបរក្នុងល្បឿនលឿនថែមទៀតផង ។ លុះពេលទៅដល់ទន្ទឹម ស្រាប់តែរថយន្តខាងលើបានបត់ស្តាំកៀរម៉ូតូរបស់ពួកនាង បណ្ដាលឲ្យដួលខ្ទាតយុវជនជាសង្សារចូលក្រោមកង់រថយន្តកិនចំក្បាលបាត់បង់ជីវិតភ្លាមៗនៅនឹងកន្លែងបែបនេះតែម្តង ។
តាមប្រភពពីអ្នកភូមិបាននិយាយថា នៅមុនពេលកើតហេតុ ពួកគាត់បានឃើញជនរងគ្រោះទាំង២នាក់ជិះម៉ូតូក្នុងល្បឿនធម្មតាមិនលឿននោះទេ ប៉ុន្តែរថយន្តទ្រុងដឹកក្រណាត់នោះវិញបានបើកបរក្នុងល្បឿនលឿនណាស់ បន្ទាប់មកក៏បានបត់ស្ដាំកៀរអ្នកជិះម៉ូតូទាំងកម្រោល និងកិនយុវជនខាងលើចំក្បាលតែម្ដង។
ក្រោយមកអ្នកបើកបររថយន្តនោះបានព្យាយាមរត់គេចខ្លួនដែរ ប៉ុន្តែត្រូវពួកគាត់នាំគ្នាដេញតាមចាប់បាននាំយកទៅប្រគល់ជូននគរបាលដើម្បីសាកសួរនិងកសាងសំណុំរឿងចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ