ខេត្តប៉ៃលិន ៖ មុខរបរអ្វីក៏ល្អដែរឱ្យតែជាមុខរបរសុចរិត មិនលួចឆក់ប្លន់កេងប្រវ័ញ្ចកម្លាំងញើសឈាមអ្នកដទៃ ។ ប៉ុន្តែក៏មានមុខរបរខ្លះងាយស្រួលក្នុងការរកប្រាក់សម្រាប់ចិញ្ចឹមជីវិតគ្រួសារ ហើយមុខរបរមួយចំនួនទៀត ក៏ពិបាកដែរទម្រាំនឹងបានប្រាក់ទិញអង្ករដាំបាយ ត្រូវចាកចេញពីផ្ទះសម្បែងរយ:ពេលយូរថ្ងៃ លុះលក់ដាច់ល្មមគ្រប់គ្រាន់ហើយ…
ខេត្តប៉ៃលិន ៖ មុខរបរអ្វីក៏ល្អដែរឱ្យតែជាមុខរបរសុចរិត មិនលួចឆក់ប្លន់កេងប្រវ័ញ្ចកម្លាំងញើសឈាមអ្នកដទៃ ។ ប៉ុន្តែក៏មានមុខរបរខ្លះងាយស្រួលក្នុងការរកប្រាក់សម្រាប់ចិញ្ចឹមជីវិតគ្រួសារ ហើយមុខរបរមួយចំនួនទៀត ក៏ពិបាកដែរទម្រាំនឹងបានប្រាក់ទិញអង្ករដាំបាយ ត្រូវចាកចេញពីផ្ទះសម្បែងរយ:ពេលយូរថ្ងៃ លុះលក់ដាច់ល្មមគ្រប់គ្រាន់ហើយ ទើបត្រឡប់ទៅផ្ទះវិញ ។
ជាក់ស្តែង កាលពីវេលាម៉ោង៧និង៣០នាទីព្រឹកថ្ងៃទី០៣ ខែធ្នូ ឆ្នាំ២០២០ ស្ថិតនៅក្នុងបរិវេណ វត្តពោធិមារាម ហៅវត្តប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន មានបុរសចំនួន៣នាក់ មានម៉ូតូរ៉ឺម៉កវែងម្នាក់មួយគ្រឿងចេញដំណើររួមគ្នាបានដឹកដើមផ្កាគ្រប់ប្រភេទពេញម៉ូតូរ៉ឺម៉ក មកពីខេត្តផ្សេងៗ ចូលស្នាក់នៅ ដើម្បីបន្តលក់ដូរនៅតាមភូមិក្នុងក្រុងប៉ៃលិន ។
បើតាមសម្តីរបស់បុរស ឈ្មោះ ឆេង ថា អាយុ៣០ឆ្នាំ ឈ្មោះ សុំ ឆាយ អាយុ៣០ឆ្នាំ និងឈ្មោះ សុខ លីន អាយុ៣៥ឆ្នាំ រស់នៅភូមិរកា ឃុំរកា ស្រុកពារាំង ខេត្តព្រៃវែង បានរៀបរាប់ទាំងការត្អូញត្អែរឱ្យដឹងថា ពួកគេមានគ្នា៣នាក់ បានទិញដំណាំផ្កាដាំតាមផើងជាច្រើនប្រភេទដូចជាផ្កាកុលាប ផ្កាចំប៉ាចំប៉ី ប្រទាល ស្លឹកតយ ឬតើយ ដើមជ្រៃក្រឹម ផ្កាក្រដាស ផ្កាអ័រគីដេ ផ្កាក្រវ៉ាន់ ផ្ការំដួលជាដើម ដោយធ្វើដំណើរលក់ដូរនៅតាមបណ្តាខេត្តទូទាំងប្រទេសតាមរយៈម៉ូតូរ៉ឺម៉កវែងម្នាក់មួយគ្រឿង ។
ការធ្វើដំណើរលក់ដូរផ្កាចល័តផ្សងព្រេងនេះ ពិតជាមានការលំបាកខ្លាំង ដោយយប់ត្រង់ណាដេកត្រង់នឹង ហើយជួនកាលក្នុង១ថ្ងៃ លក់អត់ដាច់សូម្បីតែ១ដើមក្តី ប៉ុន្តែទោះបីជាយ៉ាងណា ក៏ពួកគេនៅតែខិតខំប្រឹងប្រែងតស៊ូលក់បន្តទៀត ដើម្បីជីវភាពគ្រួសារ ដោយព្យាយាមចល័តលក់រហូតដល់អ្នកភូមិទិញផ្កាទាំងនោះ អស់បីរ៉ឺម៉កម៉ូតូទើបនាំគ្នាត្រឡប់ចូលផ្ទះវិញ ។
ប្រភពបន្តទៀតថា ពួកគេគ្មានដីស្រែចម្ការដាំដុះនឹងគេនោះទេ មានតែរបរមួយនេះ ដែលជាមុខរបរសុចរិត ។ ពួកគេរៀបរាប់ថា បន្ទាប់ពីមកដល់ខេត្តប៉ៃលិន ក៏បានសុំបរិវេណវត្តព្រះសង្ឃចតសម្រាកនាំគ្នាដាំបាយហូប រហូតដល់ព្រឹក ទើបនាំគ្នាធ្វើដំណើរបន្តលក់ដូរតាមដងផ្លូវក្រែងមានអ្នកទិញយកទៅដាំលំអមុខផ្ទះ ឬមុខផ្ទះសំណាក់ សណ្ឋាគារជាដើម ។
ផ្កាគ្រប់ប្រភេទដែលពួកគេលក់ដូរមានតម្លៃចាប់ពី៨០០០រៀល រហូតដល់១០ម៉ឺនរៀល តាមខ្នាតតូចឬធំ ព្រោះទិញពីគេមកក៏មានតម្លៃខ្ពស់ដែរ ។ បើលក់ដូរទាបជាងនេះ មិនរួចខ្លួននោះទេ ។ ពួកគេបញ្ជាក់ថា ការធ្វើដំណើរផ្លូវឆ្ងាយបែបនេះ ពិតជាមានការព្រួយបារម្ភពីសុវត្ថិភាព និងបារម្ភពីការស្វែងរកប្រាក់ តាមរយ:ការលក់ផ្កា ព្រោះពួកគេធ្លាប់ប្រកបរបរនេះអស់រយ:ពេលជាច្រើនឆ្នាំមកហើយ ដោយនៅកន្លែងខ្លះពេលធ្វើដំណើរទៅដល់ ម្ចាស់ហាងលក់ដូរផ្កាគេទិញច្រើន យកទៅទុកលក់ដូរបន្ត លុះដាច់អស់ក៏ត្រឡប់ទៅផ្ទះជួបជុំក្រុមគ្រួសារម្តង ។
លុះពេលក្រោយមកក៏ចាប់ផ្តើមទិញដឹកយកទៅលក់ដូរ តាមបណ្តាខេត្តនានាដូចជា ខេត្តកណ្តាល កំពង់ឆ្នាំង កំពង់ស្ពឺ ពោធិ៍សាត់ រហូតដល់ខេត្តបាត់ដំបង ខេត្តប៉ៃលិន ។ តែការធ្វើដំណើរលក់ដូរផ្កា គ្មានបញ្ហារឿងក្មេងទំនើង មករករឿងពេលយប់ព្រលប់នោះទេ គឺមានភាពសុខសាន្តជាបន្តបន្ទាប់តែម្តង ហើយយប់ទីណា សុំគេស្នាក់នៅទីនោះ ។ ពួកគេក៏សំណូមពរឱ្យប្រជាពលរដ្ឋរស់នៅតាមភូមិឃុំទាំងអស់ ចូលរួមទិញផ្ការបស់ពួកគេយកទៅដាំដើម្បីលម្អគេហដ្ឋានក៏ដូចជាជួយសង្គ្រោះពួកគេ ដែលប្រកបរបរសុចរិតមួយនេះមានជីវភាពធូរធាផងដែរ ៕
ចែករំលែកព័តមាននេះ