រាជធានីភ្នំពេញ ៖ តំបន់មុខសាកលវិទ្យាល័យភូមិន្ទភ្នំពេញ និងវិទ្យាស្ថានភាសាបរទេសមានបញ្ហាកកស្ទះចរាចរណ៍ស្ទើររាល់ថ្ងៃ ទើបរដ្ឋបាលរាជធានីភ្នំពេញសម្រេចស្ថាបនាផ្លូវក្រោមដីនៅក្រោមមហាវិថីសហព័ន្ធរុស្ស៊ីនៅតំបន់នេះក្នុងពេលឆាប់ៗ ដើម្បីជួយសម្រួលដល់ការធ្វើដំណើររបស់សិស្ស-និស្សិត និងប្រជាពលរដ្ឋ ។
គម្រោងការសងសង់ផ្លូវក្រោមដីនេះ ត្រូវបានធ្វើឡើងក្នុងកិច្ចប្រជុំរបស់រដ្ឋបាល រាជធានីភ្នំពេញ កាលពីរសៀលថ្ងៃទី៩ ខែមករា ឆ្នាំ២០២០ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ និងមន្ត្រីពាក់ព័ន្ធមួយចំនួនទៀត។
លោក ឃួង ស្រេង អភិបាលរាជធានីភ្នំពេញបានអះអាងថា អាជ្ញាធរចាំបាច់ណាស់ត្រូវសាងសង់ផ្លូវក្រោមដីនៅចំណុចសាលាទាំង២នេះ ដើម្បីដោះស្រាយបញ្ហាកកស្ទះចរាចរណ៍ជារយៈពេលវែង ដោយសារតែបច្ចុប្បន្នតំបន់នេះបានជួបបញ្ហាកកស្ទះចរាចរណ៍ជារៀងរាល់ថ្ងៃ ដែលរំខានដល់ការធ្វើដំណើររបស់ប្រជាពលរដ្ឋ សិស្សនិស្សិត និងភ្ញៀវទេសចរ ផងដែរ។
លោក ឃួង ស្រេង បានបញ្ជាក់ថា គម្រោងសាងសង់នេះនឹងទទួលការគាំទ្រយ៉ាងខ្លាំងពីប្រជាពលរដ្ឋ ព្រោះបានបំរើផលប្រយោជន៍ជូនប្រជាពលរដ្ឋយ៉ាងចំគោលដៅ គ្មានការរំខាន ដោយបញ្ហាកកស្ទះចរាចរណ៍ទៀតឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ