ខេត្តកំពង់ធំ ៖ ទីតាំងលួចលាក់ជួញដូរ និងលក់សត្វព្រៃយ៉ាងដុះស្លែមួយកន្លែងនៅខេត្តកំពង់ធំ ត្រូវបានបង្ក្រាបនៅព្រឹកថ្ងៃទី៩ មករា រឹបអូសបានសត្វព្រៃមានសត្វប្រវឹកជាង៤០០ក្បាល ស្វាក្តាម៥៥ក្បាល ពស់ចាន់តាម៉ម និងសំពោជ…
ខេត្តកំពង់ធំ ៖ ទីតាំងលួចលាក់ជួញដូរ និងលក់សត្វព្រៃយ៉ាងដុះស្លែមួយកន្លែងនៅខេត្តកំពង់ធំ ត្រូវបានបង្ក្រាបនៅព្រឹកថ្ងៃទី៩ មករា រឹបអូសបានសត្វព្រៃមានសត្វប្រវឹកជាង៤០០ក្បាល ស្វាក្តាម៥៥ក្បាល ពស់ចាន់តាម៉ម និងសំពោជ ដោយសមត្ថកិច្ចអង្គការវ៉ាយអេត ដឹកនាំការចុះបង្ក្រាបដោយលោក សាយ វាសនា ព្រះរាជអាជ្ញារងអមសាលាដំបូង និង មានការចូលរួមពីសំណាក់មន្ត្រីរដ្ឋបាលព្រៃឈើ មន្ត្រីកងរាជអាវុធ ហត្ថខេត្ត មន្ត្រីប៉ុស្តិ៍រដ្ឋបាល អាជ្ញាធរមូលដ្ឋានបានចុះឆែកឆេរផ្ទះស្តុកសត្វព្រៃ នៅភូមិម្នាវ សង្កាត់ស្រយ៉ូវ ក្រុងស្ទឹងសែន ។
តាមការអះអាងរបស់មន្ត្រីសមត្ថកិច្ចដែលចុះបង្ក្រាបជំនួញសត្វព្រៃនេះបានបញ្ជាក់ថា មុនពេលឈានដល់ការបង្ក្រាបនេះ គឺបានបើកការស៊ើបអង្កេតជាយូរមកហើយ ។ មុនថ្ងៃបង្ក្រាបសមត្ថកិច្ចបានហ៊ុមព័ទ្ធទីតាំងនេះមួយថ្ងៃ ដោយខ្លាចមានការដឹកជញ្ជូនសត្វព្រៃចេញទើបមានការចុះឆែកឆេរក៏ប្រទះឃើញមាន សត្វព្រៃជាច្រើនប្រភេទ ក្នុងនោះម្ចាស់ផ្ទះនៅតែមានសំណាងល្អជានិច្ចសម្រាប់ឈ្មួញមានលុយបានរត់គេចខ្លួនបាត់ និងបណ្តោយឲ្យសមត្ថកិច្ចឆែកឆេរតាមសប្បាយ ដោយមិនបាច់ខ្លាចក្រែង ដោយសារគ្មានម្ចាស់ណាម្នាក់នៅចាំផ្ទះឡើយ ។ សមត្ថកិច្ចបានព្យាយាមទំនាក់ទំនងម្ចាស់ផ្ទះ តែម្ចាស់ផ្ទះថាយកកូនមកមន្ទីរពេទ្យសៀមរាប ។
លទ្ធផលនៃការឆែកឆេរសមត្ថកិច្ចបានរំដោះសត្វព្រៃជាច្រើនប្រភេទ ។ តាមមហាជនបានរិះគន់ថា ទីតាំងនេះបានប្រកបមុខរបរនេះយូរឆ្នាំមកហើយសុខស្រួលយ៉ាងរំភើយ មិនដែលមានសមត្ថកិច្ចណាបង្ក្រាបនោះទេ ដូចរកស៊ីចូលហ៊ុនគ្នា ។ ទើបតែពេលនេះត្រូវបានអង្គការវ៉ាយអេត សហការជាមួយសមត្ថកិច្ចមូលដ្ឋានឲ្យចូលរួមជាសាក្សីនៃការបង្ក្រាប ក្នុងនោះសមត្ថកិច្ចបានរកឃើញថាម្ចាស់ផ្ទះស្តុកសត្វព្រៃសម្រាប់ការជួញដូរទៅប្រទេសវៀតណាមឈ្មោះ ចេង ថែន ភេទប្រុស អាយុ៣៤ឆ្នាំ ។ សត្វព្រៃដែលបានរឹបអូសមាន សត្វប្រវឹក៤៦៦ក្បាល សត្វស្វា៥៥ក្បាល ពស់ចាន់ល្មម២ក្បាល សំពោជក្រអូប៣ក្បាល ។ សត្វទាំងនេះត្រូវបានដឹកយកទៅភ្នំពេញ ដើម្បីជួយសង្គ្រោះឲ្យរស់នៅតាមបែបធម្មជាតិ ។
មន្ត្រីសមត្ថកិច្ចបានឲ្យដឹងថា ពេលចុះឆែកឆេរនោះសមត្ថកិច្ចពុំឃើញម្ចាស់ផ្ទះ សូម្បីតែម្នាក់នៅចាំផ្ទះនោះឡើយ តែដោយយើងជាសមត្ថកិច្ចចម្រុះ ថែមដឹកនាំដោយលោកព្រះរាជអាជ្ញារងខេត្តកំពង់ធំផង គឺបានត្រឹមតែប្រមូលសត្វព្រៃទាំងអស់ ដាក់លើរថយន្តដឹកចេញ ។ ចំណែកម្ចាស់ផ្ទះឈ្មោះ ចេង ថែន បានរត់គេចខ្លួន ។ ទោះបីជាបែបណាក្តី ត្រូវបានកសាងសំណុំរឿងចោទប្រកាន់ពីបទជួញដូរសត្វព្រៃដោយខុសច្បាប់ទៅតុលាការអត់ឱ្យអ្នកឯងរួចខ្លួនទេ ៕
ចែករំលែកព័តមាននេះ