រាជធានីភ្នំពេញ ៖ ព្រឹត្តិការណ៍រត់ប្រណាំង រយៈចម្ងាយឆ្ងាយលើកទី៥នៅតំបន់អង្គរ(5th Angkor Utra Trail 2020)ឆ្នាំនេះ មានភ្ញៀវទេសចរជាតិនិងអន្តរជាតិចុះឈ្មោះចូលរួមប្រកួតកើនឡើងប្រមាណ១០% គឺអាចកើនឡើងរហូតដល់១.៤០០នាក់ ។ នេះបើតាមលោក វ៉ាត់ ចំ
រើន រដ្ឋលេខាធិការក្រសួងទេសចរណ៍ និងជា អគ្គលេខាធិការគណៈកម្មាធិការជាតិអូឡាំពិក កម្ពុជា ថ្លែងនៅក្នុងសន្និសីទកាសែតមួយកាលពី ព្រឹកថ្ងៃព្រហស្បិ៍ទី៩ ខែមករា នៅទីស្នាក់ការគណៈកម្មាធិការជាតិអូឡាំពិកកម្ពុជា ។
លោក វ៉ាត់ ចំរើន មានប្រសាសន៍ថា រហូត មកទល់ពេលនេះ ការចុះឈ្មោះរត់ប្រណាំងនៅមិនទាន់បញ្ចប់នៅឡើយទេ ។ ព្រឹត្តិការណ៍រត់ ប្រណាំងអន្តរជាតិប្រចាំឆ្នាំមួយនេះ ត្រូវបានធ្វើឡើងជារៀងរាល់ឆ្នាំ ហើយនេះជាលើកទី៥ ។
លោកបានបញ្ជាក់ថា កាលពីឆ្នាំ២០១៩កន្លង ទៅ មានភ្ញៀវទេសចរជាតិនិងអន្តរជាតិចុះឈ្មោះ ចូលរួមរត់ប្រណាំងប្រហែល១០០នាក់ប៉ុណ្ណោះ។ ម្យ៉ាងវិញទៀត ព្រឹត្តិការណ៍កីឡាទេសចរណ៍ចម្ងាយឆ្ងាយនេះមានរហូតដល់១២៨គីឡូម៉ែត្រ ដែលមានទាំងអស់៥វិញ្ញាសា គឺមានរត់ចម្ងាយ១២៨គីឡូម៉ែត្រ មាន៦៤គីឡូម៉ែត្រ មាន៤២គីឡូម៉ែត្រ មាន៣២គីឡូម៉ែត្រ និងមាន១៦គីឡូ ម៉ែត្រ ។ ព្រឹត្តិការណ៍រត់ប្រណាំងនេះ ត្រូវបានរាជរដ្ឋាភិបាលសម្រេចនិងអនុម័តតាំងពី៥ឆ្នាំមុនម្ល៉េះ ។
ដោយឡែកនៅក្នុងព្រឹត្តិការណ៍បែបនេះ ត្រូវបានលោក ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជា ដាក់ទិសដៅក្នុងការរៀបចំឱ្យបានច្រើនៅតំបន់អង្គរ ។ លោក វ៉ាត់ ចំរើន បានឱ្យដឹងទៀតថា នៅក្នុងឆ្នាំនេះ មានភ្ញៀវទេសចរបរទេសចូលរួមជាង៧០០នាក់មកពី៤៤ប្រទេស ហើយក្នុងនោះភាគច្រើន បារាំងឈរនៅចំណាត់ថ្នាក់លេខ
១ ខ្មែរលេខ២ អង់គ្លេសលេខ៣ និងកូរ៉េឈរនៅលេខរៀងទី៤ ។
ជាមួយនឹងការខិតខំប្រឹងប្រែងឱ្យមានព្រឹត្តិការណ៍នេះទទួលបានជោគជ័យរហូតមកដល់សព្វថ្ងៃនេះ ក្រសួងទេសចរណ៍និងគណៈកម្មាធិការជាតិអូឡាំពិកកម្ពុជា ទទួលបានការគាំទ្រពីក្រុម
ហ៊ុនទេសចរណ៍បរទេសផងដែរ ។
ព្រឹត្តិការណ៍រត់ប្រណាំងចម្ងាយឆ្ងាយនេះ ធ្វើ ឡើងក្នុងគោលបំណងថែរក្សាបរិស្ថានតំបន់អង្គរ របស់យើងផង ក៏ដូចជាដើម្បីធ្វើការផ្សព្វផ្សាយទាក់ទាញភ្ញៀវបរទេសឱ្យមានការចូលរួមបាន
ច្រើនៅក្នុងតំបន់អង្គររបស់យើង ។ ម្យ៉ាងវិញ ទៀត កីឡានេះចង់បង្ហាញនូវភាពចម្រុះនៃព្រឹត្តិ ការណ៍កីឡាទេសចរណ៍នៅក្នុងតំបន់ទេសចរណ៍នៅប្រទេសកម្ពុជាយើង ៕ (កែសម្រួលដោយ ៖ បុប្ផា)
ចែករំលែកព័តមាននេះ