រាជធានីភ្នំពេញ ៖ ក្រោយពីមានមុខឡើង ប្រកួតក្នុងនាមជាគូអន្តរជាតិនៅសង្វៀនស្ថានីយទូរទស្សន៍ប៉ុស្តិ៍លេខ៥ ហើយទទួលជ័យជម្នះជារឿយៗនោះ ពេលនេះកីឡាករវ័យក្មេង តាញ់ មករា ត្រូវបានគេឲ្យឡើងប្រកួតក្នុងនាមជាគូអន្តរជាតិទៀតហើយ ខណៈដែលការប្រកួតលើក…
រាជធានីភ្នំពេញ ៖ ក្រោយពីមានមុខឡើង ប្រកួតក្នុងនាមជាគូអន្តរជាតិនៅសង្វៀនស្ថានីយទូរទស្សន៍ប៉ុស្តិ៍លេខ៥ ហើយទទួលជ័យជម្នះជារឿយៗនោះ ពេលនេះកីឡាករវ័យក្មេង តាញ់ មករា ត្រូវបានគេឲ្យឡើងប្រកួតក្នុងនាមជាគូអន្តរជាតិទៀតហើយ ខណៈដែលការប្រកួតលើក នេះគឺជាអ្វីដែលកីឡាកររូបនេះ ប្រាប់ថាជាជំ ហានកាន់តែឲ្យមានគេស្គាល់ ។ កីឡាករថៃ ប៉ូវី ត្រូវបានគេដាក់ឲ្យប្រកួតស្ទាបស្ទង់ម្តងទៀត ដើម្បីមើលពីសមត្ថភាពរបស់ តាញ់ មករា ។ អ្នកទាំងពីរនឹងប៉ះគ្នានៅល្ងាចថ្ងៃសៅរ៍ទី១១ ខែមករា នៅក្នុងព្រឹត្តិការណ៍ TV5 Knock out Serie by K-Cement ក្នុងពេលដែលការប្រកួតជើងឯករដូវកាលទី៧ ទើបចាប់ផ្ដើុមចូលសប្ដាហ៍ទី៤ ។
វត្តមានកីឡាករទាំងកម្ពុជានិងថៃ ក្នុងសប្ដាហ៍ នេះ មិនថាការប្រកួតជាលក្ខណៈអន្តរជាតិឬជាលក្ខណៈមិត្តភាពក្នុងស្រុកនោះទេ ពិតជាធ្វើ ឲ្យអ្នកស្នេហាកីឡាប្រដាល់មានការចាប់អារម្មណ៍ ជាពិសេសគឺវត្តមានរបស់ កីឡាករ តាញ់ មករា ធ្វើឲ្យមានការចាប់អារម្មណ៍យ៉ាងខ្លាំង ដោយ
សារតែគេកំពុងឡើងកូដ ។
សមាសភាពគូអន្តរ ជាតិនេះ ត្រូវបានគេអះអាងថាមានការសម្រាំងយ៉ាងពិសេស ដើម្បីឲ្យអ្នកទស្សនាកាន់តែកន្ត្រាក់អារម្មណ៍ ក្នុងពេលដែលសប្ដាហ៍នេះគឺជាសប្ដាហ៍ដែលតម្រូវឲ្យអ្នកមានឈ្មោះក្នុងការប្រកួតជ្រើសរើសជើងឯកទាំង៣២នាក់ ប្រកួតជម្រុះគ្នាយក១៦នាក់ ដើម្បីបន្តយកអ្នកឈ្នះ៨នាក់ទៅប្រកួតយក៤នាក់នៅជុំបន្តបន្ទាប់ ។
លោក សេង កដិកា អ្នករៀបចំការប្រកួតរបស់ស្ថានីយទូរទស្សន៍ប៉ុស្តិ៍លេខ៥ បញ្ជាក់ថា សម្រាប់ការប្រកួតជាមួយកីឡាករថៃ លោកជឿ ជាក់ខ្លាំងលើកីឡាករ តាញ់ មករា ដោយសារគេ គឺជាជើងខ្លាំង ហើយបើទោះជាមិនសូវមានបទ ពិសោធន៍ច្រើននៅក្នុងការប្រកួតជាអន្តរជាតិកន្លងមក ប៉ុន្តែសមត្ថភាពគេល្អ លោកពេញ ចិត្ត ។ ម្យ៉ាង មកពីលោកចង់លើកមុខ តាញ់ មករា ផង ទើបសម្រេចដាក់ឲ្យប្រកួតជាលក្ខណៈអន្តរជាតិឲ្យបានច្រើន ដើម្បីឲ្យកាន់ តែទទួលបានការចាប់អារម្មណ៍នៅក្នុងកីឡាប្រដាល់ ។
លោកប្រកាសថា វត្តមានរបស់កីឡាករថៃ ប៉ូវី គឺលោកចង់ផ្ដល់ឱកាសឲ្យ មករា ដោយសារអ្នកទាំងពីរសុទ្ធតែជាជើងខ្លាំងដូចគ្នា ទើបលោកហ៊ានសម្រេចផ្គូផ្គង បើទោះជាមានអ្នកគាំទ្រភាគ
ច្រើនថាកីឡាករកម្ពុជារូបនេះ អាចនឹងពិបាកទប់កីឡាករថៃ ព្រោះគេជាជើងថ្មី ។ លោកបាន
កំណត់ឲ្យកីឡាករកម្ពុជាហ្វឹកហាត់ជាប់លាប់ មិនតិចជាង១សប្ដាហ៍ផងដែរ មុនពេលផ្គូផ្គង ទើបលោកយល់ថាសមាសភាពរបស់កីឡាករកម្ពុជារូបនេះ គ្រប់គ្រាន់សម្រាប់ស្ថានីយទូរទស្សន៍ ប៉ុស្តិ៍លេខ៥ដាក់ឲ្យប្រកួតជាលក្ខណៈអន្តរជាតិ នៅថ្ងៃសៅរ៍នេះ ។
លោក សេង កដិកា ថ្លែងថា កីឡាករកម្ពុជានិងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងៗខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើន ដោយរំពឹងថានឹងមានអ្នកស្នេហាកីឡាប្រដាល់ជក់ចិត្ត និងចង់ដឹងពីបទពិសោធន៍អ្នកទាំងពីរនៅពេលប៉ះគ្នា ។
លោក សេង កដិកា បន្តថា ជំនួបជាលក្ខណៈអន្តរជាតិដែលបានធ្វើឡើងនៅសង្វៀនស្ថានីយទូរទស្សន៍ប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឲ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២ លោកជឿជាក់ថានឹងកក្រើក ដោយសារកីឡាករថៃលោកស្គាល់ថ្វីដៃច្បាស់ហើយថាមិនធម្មតា ហើយសម្រាប់កីឡាករកម្ពុជាវិញ ក៏ល្អស្ថិតក្នុងទំនុកចិត្តលោកតាំងពីមុនផ្គូផ្គង ៕ (កែសម្រួលដោយ ៖ បុប្ផា)
ចែករំលែកព័តមាននេះ