ខេត្តបាត់ដំបង ៖ បុរសម្នាក់អះអាងថា ត្រូវជាឪពុកជនរងគ្រោះដែលកូនប្រុសគាត់ម្នាក់បានបាត់បង់ជីវិតនៅក្នុងឧប្បត្តហេតុគ្រោះថ្នាក់ចរាចរណ៍មួយ កាលពីអំឡុងខែធ្នូ២០១៩ កន្លងទៅនេះ ដោយបានស្វះស្វែងជួបជាមួយកោះសន្តិភាព ដើម្បីស្នើសុំឲ្យជួយទម្លុះទម្លាយនូវរឿងដ៏អយុត្តិធម៌បំផុត ដែលមន្ត្រីការិយាល័យចរាចរណ៍ជើងគោកនៃស្នងការខេត្ត បានឃុបឃិតគ្នាធ្វើរបាយការណ៍ភូតកុហក់ថ្នាក់ដឹកនាំ…
ខេត្តបាត់ដំបង ៖ បុរសម្នាក់អះអាងថា ត្រូវជាឪពុកជនរងគ្រោះដែលកូនប្រុសគាត់ម្នាក់បានបាត់បង់ជីវិតនៅក្នុងឧប្បត្តហេតុគ្រោះថ្នាក់ចរាចរណ៍មួយ កាលពីអំឡុងខែធ្នូ២០១៩ កន្លងទៅនេះ ដោយបានស្វះស្វែងជួបជាមួយកោះសន្តិភាព ដើម្បីស្នើសុំឲ្យជួយទម្លុះទម្លាយនូវរឿងដ៏អយុត្តិធម៌បំផុត ដែលមន្ត្រីការិយាល័យចរាចរណ៍ជើងគោកនៃស្នងការខេត្ត បានឃុបឃិតគ្នាធ្វើរបាយការណ៍ភូតកុហក់ថ្នាក់ដឹកនាំ ដើម្បីដោះលែងរថយន្តបង្ក ជាថ្នូរនិងផលប្រយោជន៍ ដោយគ្មានបង់សំណង១សេនដល់គ្រួសារគាត់ ។
បុរសនោះឈ្មោះអ៊ីវ ប៊ុនធឿន អាយុ៥៣ឆ្នាំ រស់នៅភូមិដំណាក់ហ្លូង សង្កាត់វត្តគរ ក្រុងបាត់ដំបង ។ គាត់បានជួបនិងផ្ដល់បទសម្ភាស៍ផ្ទាល់ជាមួយកោះសន្តិភាព កាលពីព្រឹកថ្ងៃទី០៩ មករា ដោយបាននិយាយថា កូនប្រុសគាត់ឈ្មោះអ៊ីវ ប៊ុនថា អាយុ២៤ឆ្នាំ បានបាត់បង់ជីវិតយ៉ាងរន្ធត់ នៅក្នុងឧប្បតិហេតុគ្រោះថ្នាក់ចរាចរណ៍ តែមិនត្រូវបានអង្គភាពការិយាល័យចរាចរណ៍នេះ ផ្ដល់យុត្តិធម៌ដល់កូនប្រុសគាត់ឡើយរហូតដល់ពេលនេះ ។ មិនតែប៉ុណ្ណោះ ក្រោយពីមន្ត្រីចរាចរណ៍ហៅគាត់ ទៅសម្របសម្រួលជាមួយភាគីរថយន្តបង្កចំនួន២លើកមិនត្រូវរ៉ូវគ្នា ដោយសន្យាជួបដោះស្រាយលើកទី៣ទៀត តែមិនទាន់បានជួបលើកទី៣ តាមសន្យាផង ស្រាប់តែផ្នែកដំណោះស្រាយ នៃការិយាល័យ នេះឃុំឃិតគ្នាដោះលេងរថយន្តបង្កនោះទៅបាត់ ដោយមិនផ្ដល់សំណង១សេនដល់គ្រួសារគាត់ឡើយ។
សូមបញ្ជាក់ថា បើតាមគ្រួសារជនរងគ្រោះសំណុំរឿងគ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង៨ និង៥០នាទីយប់ថ្ងៃទី៨ ធ្នូ ២០១៩ កន្លងទៅថ្មីៗនេះ នៅលើកំណាត់ផ្លូវមួយកន្លែង ខាងត្បូងស្ដុបពេទ្យពពីរ ដែលស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង ។ យោងតាមកំណត់ហេតុរបស់សមត្ថកិច្ច គឺជនរងគ្រោះឈ្មោះអ៊ីវ ប៊ុនថា បានជិះម៉ូតូទៅបុកគូទរថយន្តនោះដែលមានដឹកស្រាបៀរ ក្នុងទិសដៅស្របទិសគ្នាពីត្បូងទៅជើង ខណៈដែលរថយន្តនោះកំពុងចតនៅលើចិញ្ចើមថ្នល់ តែមិនបានដាក់ស្លាកសញ្ញា ឬ ចំណាំងផ្លា តដើម្បីឲ្យអ្នកដំណើរមើលឃើញនៅពេលយប់ទេ។ រថយន្តនោះម៉ាក HINO ពាក់ស្លាកលេខភ្នំពេញ 3E-2786 តែគេមិនបានប្រាប់ឈ្មោះអ្នកបើកបរឡើយ។
ប្រភពពីសមត្ថកិច្ចបានប្រាប់ថា រថយន្តនេះទំនងមិនមែនជារថយន្តក្រុមហ៊ុនស្រាបៀរទេ តែអាចត្រូវក្រុមហ៊ុនស្រាបៀរ ជួលឲ្យដឹកយកមកដាក់នៅដេប៉ូធំមួយកន្លែង នៅជិតទីតាំងកើតហេតុនោះ។ ប៉ុន្តែពេលបើកមកដល់នាយប់នោះ រថយន្តនេះមិនបានដឹកចូលទម្លាក់ឲ្យដេប៉ូភ្លាមៗទេ ហើយបានឈប់ចតនៅលើចិញ្ចើមផ្លូវ ដើម្បីរងចាំទម្លាក់នៅព្រឹកថ្ងៃបន្ទាប់ តែអកុសល្យស្រាប់តែរថយន្តនេះបង្កឲ្យមានគ្រោះថ្នាក់រហូតដល់បាត់បង់ជីវិតមនុស្ស ដោយសារការចតនៅលើដងផ្លូវខ្វះការប្រុងប្រយ័ត្ន មិនដាក់ស្លាកសញ្ញាសម្គាល់ ដើម្បីឲ្យអ្នកដំណើរបានមើលឃើញនៅពេលយប់ ។ មន្ត្រីចរាចរណ៍បាននាំយកទាំងរថយន្ត ទាំងម៉ូតូជនរងគ្រោះ ទៅកាន់ស្នងការដើម្បីរងចាំដោះស្រាយតាមផ្លូវច្បាប់។
ពាក់ព័ន្ធនឹងចំណាត់ការរបស់មន្ត្រីច្បាប់ ឪពុកជនរងគ្រោះ លោកអ៊ីវ ប៊ុនធឿន បានរៀបរាប់ថា ក្រោយគ្រួសារលោកធ្វើបុណ្យសពកូនរួច លោកហេង ពិសិដ្ឋ នាយរងការិយាល័យនេះ បានកោះអញ្ជើញលោកឲ្យចូលទៅជួបចរចាសំណងជាមួយភាគីរថយន្តចំនួន២លើកជាបន្តបន្ទាប់ តែមិនត្រូវរ៉ូវគ្នាទេ ។ លោកបានប្រាប់ថា ជួបគ្នាលើកទី១ ភាគីរថយន្តសុំសងចំនួន២.០០០ដុល្លារ ខណៈលោកប្ដឹងទាមទាចំនួន១៥.០០០ដុល្លារ ។ ដោយសារមិនត្រូវគ្នា ទើបប៉ុន្មានថ្ងៃក្រោយ លោកហេង ពិសិដ្ឋ ហៅលោកទៅជួបចរចាគ្នាជាលើកទី២ទៀត ហើយភាគីរថយន្តសុំបង់សំណងចំនួន៣,០០០ដុល្លា ខណៈលោកទាមទាបញ្ចុះមកត្រិមចំនួន៧.៥០០ដុល្លារ តែនៅមិនត្រូវគ្នាដដែល ប៉ុន្តែបានសន្យានឹងជួបចរចាគ្នាលើកទី៣ទៀត ។
លោកហេង ពិសិដ្ឋ នាយរងការិយាល័យទទូលផ្នែកដំណោះស្រាយ បានប្រាប់ភាគីទាំង២ ឲ្យរងចាំជួបចរចាគ្នានៅលើកទី៣ទៀត តែរហូតមកដល់ពេល ការណាត់ជួបលើកទី៣ក៏ស្ងាត់ រីឯរថយន្តបង្កក៏ត្រូវលោកហេង ពិសិដ្ឋ ដោះលែងទៅបាត់ទៀត។ ឪពុកជនរងគ្រោះបាននិយាយទាំងក្ដុកក្ដូលថា «ខ្ញុំមានការឈឺចាប់បំផុត នៅពេលដឹងថា គេដោះលេងរថយន្តបង្ក ដោយមិនទាន់បង់សំណង១សេនដល់គ្រួសារខ្ញុំ ដែលកូនប្រុសខ្ញុំត្រូវបាត់បង់ជីវិតយ៉ាងអាណោចអធ័ម ។ ខ្ញុំបានទៅការិយាល័យចរារចណ៍ សួរនាំអំពីរឿងនេះ តែលោក ឆៃ ច័ន្ទតារា ប្រធានការិយាល័យនេះ បានបដិសេធថា មិនបានដឹង រីឯលោកហេង ពិសិដ្ឋ នាយរងការិយាល័យ ទទូលផ្នែកដោះស្រាយនេះ បែរជាដេញខ្ញុំ ឲ្យទៅសួរលោកព្រះរាជអាជ្ញារង ហេង លុយ ទៅវិញ ? ដោយអះអាងថា លោកហេង លុយ អ្នកចេញដីកាឲ្យដោះលេងរថយន្តនេះ»។
ជាមួយនឹងម្រាមដៃដប់លើកសំពះអង្វរ.ក លោកអ៊ីវ ប៊ុនធឿន បានពោលយ៉ាងដូច្នេះថា «ខ្ញុំហាក់មានអារមណ៍តក់ស្លុត និងឈឺចាប់ខ្លាំងណាស់ នៅពេលដែលមេការិយាល័យនេះ ម្នាក់ៗមិនទទូលខុសត្រូវ ឆ្លើយបដិសេធ និងឆ្លើយដាក់គ្នាបែបនេះ ។ ខ្ញុំសូមអង្វរ.កដ៏ទទូចដល់លោកស្នងការខេត្ត ឬ ថ្នាក់ដឹកនាំគ្រប់ស្ថាប័ន មេត្តាជួយរកយុត្តិធម៏ដល់កូនប្រុសខ្ញុំ និង ក្រុមគ្រួសារខ្ញុំផង។ ព្រោះខ្ញុំយល់ថា សំណុំរឿងនេះ ត្រូវគេឃុំឃិតគ្នាដោះលេងរថយន្តបង្កនោះ វាជារឿងអយុត្តិធម៏ខ្លាំងណាស់សម្រាប់គ្រួសារខ្ញុំ ដែលកូនបាត់បង់ជីវិត ហើយបែរជាមិនបានទទួលសំណង សូម្បីតែ១សេន.. អយុត្តិធម៌បំផុត»។
កោះសន្តិភាពមិនអាចទំនាក់ទំនង សុំការបំភ្លឺពីលោកហេង ពិសិដ្ឋ នាយរងការិយាល័យចរាចរណ៍ដែល
ទទួលបន្ទុកដំណោះស្រាយនេះបានទេ នៅព្រឹកថ្ងៃទី៩ មករា ។ ប៉ុន្តែលោក ឆៃ ច័ន្ទតារា នាយការិយាល័យចរាចរណ៍បានបញ្ជាក់ប្រាប់កោះសន្តិភាបដោយផ្ទាល់ នៅព្រឹកថ្ងៃដដែលយ៉ាងដូច្នេះថា «ខ្ញុំពិតជាមិនបានដឹង ដែលលោកអនុប្រធានខ្ញុំ (ហេង ពិសិដ្ឋ) ដោះលែងរថយន្តបង្កនោះមែន នៅពេលឪពុកជនរងគ្រោះមកសូរនាំ តែខ្ញុំបានរាយការណ៏អំពីករណីនេះ ជូនលោកស្នងការជ្រាបរួចហើយ»។
ពាក់ព័ន្ធនឹងការដោះលែងរថយន្តបង្កគ្រោះថ្នាក់ផ្លោះរំលងនីតិវិធី របស់លោកហេង ពិសិដ្ឋ នេះ បើតាមប្រភពពីមន្ត្រីចរាចរណ៍ដែរ បានបង្ហើបឲ្យដឹងថា មុនពេលដោះលែងរថយន្ត លោកហេង ពិសិដ្ឋ បានរាយការណ៍ប្រាប់លោកស្នងការដែរថា «សំណុំរឿងនេះ ត្រូវបានដោះស្រាយបញ្ចប់ហើយ រវាងភាគីទាំង២ ហើយភាគីរថយន្តសុំដោះស្រាយយករថយន្ត ទើបលោកស្នងការឯកភាព តែជាការភូតកុហក់»។ ប៉ុន្តែក្រោយពីគ្រូសារជនរងគ្រោះដឹង ហើយទៅឡាំប៉ាពេញការិយាល័យ ទើបបែកធ្លាយការឃុបឃិតគ្នាប្រព្រឹត្តអំពើទុច្ចរិតនេះ ដល់លោកស្នងការខេត្តតែម្ដង។
ប្រភពដដែលបានបញ្ជាក់ថា សំណុំរឿងនេះ មិនមែនត្រឹមតែរាយការណ៍ភូតកុហក់លោកស្នងការប៉ុណ្ណោះទេ ទំនងគេរាយការណ៍ភូតកុហក់លោកហេង លុយ ព្រះរាជអាជ្ញារងទៀតផង ដើម្បីធ្វើយ៉ាងណាឲ្យលោកព្រះរាជអាជ្ញារងរូបនេះជឿជាក់ និងចេញដីកាប្រគល់រថយន្តបង្ក ដែលជាវត្ថុតាងឲ្យម្ចាស់ដើមវិញ ជាថ្នូរបានផលប្រយោជន៍មួយចំនួនដល់ពួកគេ (ដល់មន្ត្រីខិលខូច)។ នេះជាល្បិចកលរបស់មន្ត្រីខូច ដែលតែងធ្វើបានកាក់កប នាពេលកន្លងមក។
បើតាមការកត់សម្គាល់ នេះមិនមែនជាលើកទី១ទេ ដែលមន្ត្រីផ្នែកដំណោះស្រាយនៃការិយាល័យចរាចរណ៍នេះ ដោះស្រាយផ្លោះរំលងនីតិវិធី។ ពេលខ្លះ លោកនាយរងការិយាល័យខាងលើ ណាត់ភាគីរងគ្រោះ ឬ ភាគីបង្កទៅជួបដោះស្រាយគ្នាស្ងាត់ៗ នៅខាងក្រៅរបងការិយាល័យក៏មាន។ ប្រភពពីក្នុងអង្គភាពមួយនេះ បានទម្លាយថា កន្លងមកមានរឿងអាស្រូវស្រដៀងៗគ្នានេះជាច្រើន ដែលការិយាល័យចរាចរណ៍មួយនេះ តែងឃុបឃិតគ្នាប្រព្រឹត្តដោយមិនចាំបាច់ឆ្លងកាត់ថ្នាក់ដឹកនាំ ឬតុលាការ។ ពេលខ្លះ ពួកគេប្រើឈ្មោះ«ព្រះរាជអាជ្ញា» យកមកកំញើញភាគីបង្ក ដើម្បីកៀបយកប្រយោជន៍ធំ។ ជាពិសេស ការដោះស្រាយបញ្ចប់រឿង ហើយប្រគល់វត្ថុតាងបទល្មើស(រថយន្តឬម៉ូតូ)ឲ្យទៅភាគីបង្ក ដោយផ្លោះរំលងនីតិវិធី មិនចាំបាច់ឆ្លងយោបល់ថ្នាក់ដឹកនាំ ឬស្នើសុំទៅតំណាងអយ្យការ ។ ព្រោះធ្វើបែបនេះ ជានីតិវិធីស៊ីលុយផុយ។ ប៉ុន្តែពេលខ្លះក៏អាចលេបប៉ះដុំថ្មម្ដងម្កាលដែរ ដូចជាករណីខាងលើនេះជាដើម តែក្រុមមន្ត្រីខូចទាំងនេះមិនរាងចាលទេ នៅតែព្យាយាមរកវិធីស៊ីដាច់បានដដែល។
ទោះយ៉ាងណា ជុំវិញសំណុំរឿងដ៏ក្ដៅគគុកខាងលើនេះ បើតាមលោកឆៃ ច័ន្ទតារា នាយការិយាល័យចរាចរណ៏ខេត្ត បានបញ្ជាក់ប្រាប់កោះសន្តិភាពថា ក្រោយពីលោកបានរាយការណ៍ទៅលោកស្នងការខេត្ត ពេលនេះ លោកស្នងការបានទំនាក់ទំនងទៅលោកព្រះរាជអាជ្ញា ដើម្បីចេញបញ្ជាឲ្យមន្ត្រីជំនាញ តាមចាប់រថយន្តបង្កនោះនាំមកកាន់ស្នងការខេត្ត ដើម្បីចាត់វិធានការតាមផ្លូវច្បាប់ជាថ្មីហើយ។ ប៉ុន្តែយ៉ាងណាក៏ដោយ លោកស្នងការខេត្ត គួរតែមានវិធានការដុះក្អែលមន្ត្រីខិលខូចមួយចំនួន ដែលកំពុងជ្រកបង្កប់នៅក្នុងការិយាល័យមួយនេះ ឬ ួរតែកាត់សាច់ស្អុយចោលខ្លះទៅ ដើម្បីចៀសវាងកុំឲ្យក្លិនដ៏អាសោចន៍នេះ ជះទៅលើមន្ត្រីដទៃទៀត ដែលកំពុងប្រឹងប្រែងបំពេញការងារបានយ៉ាងល្អនៅក្នុងអង្គភាពជាមួយគ្នា ។
ចែករំលែកព័តមាននេះ