រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពឆក់ទូរស័ព្ទដៃពីស្ត្រីចំណាស់ម្នាក់មិនបានសម្រេច ហើយបម្រុងរត់គេចខ្លួន ក៏ត្រូវកម្លាំងល្បាតប៉ុស្តិ៍នគរបាលរដ្ឋបាលសង្កាត់ ទន្លេបាសាក់ ប្រទះឃើញក៏ដេញតាមក្របួចជាប់យកមកកាន់ប៉ុស្តិ៍នគរបាលរដ្ឋបាលសង្កាត់ទន្លេបាសាក់តែម្តង ។
ហេតុការណ៏ខាងលើនេះបានកើតឡើងកាលពីវេលាម៉ោង៦និង៣០នាទីយប់ថ្ងៃទី៨ ខែមករា ឆ្នាំ២០២០ នៅមុខផ្ទះលេខ៦១ ផ្លូវ២១ ក្រុម៤៣ ភូមិ៨ សង្កាត់ទន្លេបាសាក់ ខណ្ឌចំការមន។
ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ ផាត់ ហុងសេង ភេទប្រុស អាយុ១៤ឆ្នាំ ភេទប្រុស មុខរបរធ្វើការសំណង់ ស្នាក់នៅភូមិមិត្តភាព សង្កាត់ព្រែកឯង ខណ្ឌច្បារអំពៅ ជាអ្នកបើកម៉ូតូធ្វើសកម្ម ភាពឆក់ និងម្នាក់ទៀតឈ្មោះ ហឿន វិនហួរ ភេទប្រុស អាយុ ១៥ឆ្នាំ ភេទប្រុស ជាសិស្សរៀនថ្នាក់ទី៩ ស្នាក់នៅភូមិចុងព្រែកឯង សង្កាត់ព្រែកឯង ខណ្ឌច្បារអំពៅ ជាម្ចាស់ម៉ូតូ។ ជនសង្ស័យទាំងពីរនាក់ជិះម៉ូតូមួយគ្រឿង ម៉ាកហុងដាឌ្រីម ស៊េរីឆ្នាំ២០១០ ពណ៌ខ្មៅ ពាក់ស្លាកលេខ ព្រៃវែង ១C-១៨១៧ ។ ចំណែកជនរងគ្រោះមានឈ្មោះ ផុង ពៅ ភេទស្រី អាយុ៦៤ឆ្នាំ ស្នាក់នៅភូមិឃុំកន្លែងកើតហេតុខាងលើ ។
តាមប្រភពពីជនរងគ្រោះបានប្រាប់សមត្ថកិច្ចអោយដឹងថា មុនកើតហេតុ គាត់បានដើរចេញពីផ្ទះគោលបំណង ទៅមុខផ្សារទំនើបអ៊ីអន១ ដើម្បីរកទិញអីហូប ខណៈពេលគាត់កំពុងដើរបណ្តើរនិយាយទូរស័ព្ទបណ្តើរ រហូតដល់ចំណុចកន្លែងកើតហេតុ ស្រាប់តែលេចមុខជនសង្ស័យ២នាក់នាក់ខាងលើ ជិះម៉ូតូមួយគ្រឿងឌុបគ្នា ធ្វើដំណើរបញ្ច្រាសទិសគ្នា មកក្បែរគាត់។
តាមប្រភពដដែលបានបន្តថា ភ្លាមៗនោះជនសង្ស័យម្នាក់ដែលអង្គុយខាងក្រោយឈ្មោះ ហឿន វិនហួរ បានធ្វើសកម្មភាពឆក់យកទូរស័ព្ទដៃពីពីគាត់ដែរ តែមិនបានសម្រេចនោះទេ ដោយសារគាត់ដឹងខ្លួនមុន ។ ពេលនោះជនសង្ស័យបានបន្ថែមល្បឿនបើកម៉ូតូគេចខ្លួន ក៏ត្រូវជនរងគ្រោះស្រែកថា «ចោរ» បង្កការភ្ញាក់ផ្អើលដល់សមត្ថកិច្ចប៉ុស្តិ៍នគរបាលរដ្ឋបាលសង្កាត់ទន្លេបាសាក់ដែលកំពុងល្បាតក្បែរនោះ ឃើញក៏ដេញតាមពីក្រោយរហូតដល់ផ្លូវ៣៨០ កែងនឹងផ្លូវព្រះនរោត្តម ក៏ឃាត់ខ្លួនជនសង្ស័យទាំងពីរនាក់បានតែម្តង។
នៅចំពោះមុខសមត្ថកិច្ច ជនសង្ស័យទាំង២នាក់បានឆ្លើយសារភាពថា ពួកខ្លួនពិតជាបានធ្វើសកម្មភាពឆក់ទូរស័ព្ទពីជនរងគ្រោះប្រាកដមែន តែមិនបានសម្រេច ក៏ត្រូវសមត្ថកិច្ចឃាត់ខ្លួនបានតែម្តង។
ក្រោយពេលកើតហេតុ សមត្ថកិច្ចប៉ុស្តិ៍នគរបាលរដ្ឋបាលសង្កាត់ទន្លេបាសាក់ កសាងសំណុំរឿងបញ្ជូនជនសង្ស័យទាំង២នាក់ទៅកាន់អធិការដ្ធានខណ្ឌចំការមនដើម្បីចាត់ការបន្តតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ