ខេត្តតាកែវ ៖ អាជីវករជាអ្នកលក់ដូរ នៅរមណីយដ្ឋានភ្នំតាម៉ៅដូចៗគ្នា បានត្អូញត្អែរគ្រប់ៗគ្នាថា បាត់ភ្ញៀវមិនសូវមកកម្សាន្តមួយចំនួនធំនៅក្នុងចុងឆ្នាំ២០១៩កន្លងមក សូម្បីថ្ងៃឆ្លងឆ្នាំសកលក៏មិនសូវមានភ្ញៀវចូលមកកម្សាន្តដូចបណ្តាឆ្នាំកន្លងដែរ ។ ស្ត្រីម្នាក់ដែលជាម្ចាស់ «អាហារដ្ឋាន…
ខេត្តតាកែវ ៖ អាជីវករជាអ្នកលក់ដូរ នៅរមណីយដ្ឋានភ្នំតាម៉ៅដូចៗគ្នា បានត្អូញត្អែរគ្រប់ៗគ្នាថា បាត់ភ្ញៀវមិនសូវមកកម្សាន្តមួយចំនួនធំនៅក្នុងចុងឆ្នាំ២០១៩កន្លងមក សូម្បីថ្ងៃឆ្លងឆ្នាំសកលក៏មិនសូវមានភ្ញៀវចូលមកកម្សាន្តដូចបណ្តាឆ្នាំកន្លងដែរ ។ ស្ត្រីម្នាក់ដែលជាម្ចាស់ «អាហារដ្ឋាន ឡែន សុជាតិ» នៅតំបន់រមណីយដ្ឋានភ្នំតាម៉ៅ បានរៀបរាប់ឲ្យដឹងថា ពិបាករកប្រាក់ចំណូលណាស់សព្វថ្ងៃនេះលោកអើយ…ដោយសារតែបាត់ភ្ញៀវច្រើនមិនសូវមកកម្សាន្តទីនេះ អស់រយៈពេលជាច្រើនខែមកហើយ និយាយពិតទៅនៅចុងឆ្នាំ២០១៩តែម្តង ។ ដោយឡែកនៅថ្ងៃចូលឆ្នាំសកលក៏មិនសូវមានភ្ញៀវមកដែរ ។
អ្នកស្រី សុជាតិ បានបន្តថា រាល់ថ្ងៃបានភ្ញៀវតែ១ម៉ូយឬ២ម៉ូយ ជួនកាលអត់មានភ្ញៀវសោះក៏មានដែរ ម្យ៉ាងវិញទៀតនៅរមណីយដ្ឋានភ្នំតាម៉ៅ ពេលនេះតូបលក់ដូរបានកើនឡើងមិនក្រោម២០០តូបនោះទេ ពេលមានភ្ញៀវមកដល់ម្នាក់ៗរត់បោយដៃ ហៅសឹងជ្រុះដៃទៅហើយ ទម្រាំបានភ្ញៀវមួយៗ ។ ស្ត្រីម្នាក់ឈ្មោះ សុខ សុភារម្យ ម្ចាស់ «អាហារអាហារដ្ឋានភ្នំតាម៉ៅ»បាននិយាយថា៖ ការអត់សូវមានភ្ញៀវចូលនេះ គឺជាលក្ខណៈទ្រង់ទ្រាយទូទៅ មិនមែនអត់មានតែហាងរបស់គាត់ទេ ដោយអ្នកស្រីបានលើកដៃចង្អុលទៅហាងអាហារដ្ឋានផ្សេងៗជាច្រើនទៀត ម្ចាស់មិនមកលក់ដូរទេ ច្រើនតែបិទទ្វារ ។
ហាងរបស់គាត់លក់តែថ្ងៃសៅរ ថ្ងៃអាទិត្យ ឬថ្ងៃបុណ្យទេ ព្រោះគ្មានភ្ញៀវមកកម្សាន្តទេនៅចន្លោះពីច័ន្ទ ដល់ថ្ងៃសុក្រ តែបើថ្ងៃសៅរ៍និងអាទិត្យអាចមានខ្លះប៉ុន្តែមិនច្រើនទេ ។ គាត់ត្អូញត្អែរថា ឥឡូវនេះពិបាករកស៊ីណាស់យ៉ាប់គ្រប់កន្លែង ។ តែទោះបីយ៉ាងណា អ្នកស្រីមិនភ្លេចថ្លែងអំណរអរគុណដល់អ្នកគ្រប់គ្រងរមណីយដ្ឋានភ្នំតាម៉ៅទេ ដែលបានអនុញ្ញាតឲ្យប្រជាពលរដ្ឋរស់នៅក្បែរជាប់រមណីយដ្ឋាន អាចសង់តូបលក់ដូរបាន ដោយមិនយកប្រាក់គ្រាន់តែចូលរួមជួយថែរក្សាអនាម័យនិងបរិស្ថានតែប៉ុណ្ណោះ ។
មន្ត្រីម្នាក់ដែលមានទីស្នាក់ការនៅច្រកចូលភ្នំតាម៉ៅបានប្រាប់ឲ្យដឹងថា បញ្ហាខ្សត់ភ្ញៀវមិនសូវមកកម្សាន្ត នៅរមណីយដ្ឋានភ្នំតាម៉ៅ យើងនេះវាខ្សត់បាត់ភ្ញៀវច្រើនពិតមែនហើយ ។ លោកក៏បានលើកឡើងថា វាមិនមែនមកពីយើងលក់ថ្លៃ ថោកអីនោះទេ គឺវាមានបញ្ហាដូច្នេះទូទៅហើយ សូម្បីតែនៅអង្គរវត្ត ខេត្តសៀមរាប ក៏ខ្សត់ភ្ញៀវដែរ ។
លោកថា បើតាមតែលោកបានដឹងនោះ ប៉ុន្តែលោកមិនហ៊ាននិយាយថា វាបណ្តាលមកពីស្ថានភាពនយោបាយឬដោយសាររមណីយដ្ឋានមិនមានការអភិវឌ្ឍន៍នោះទេ ។ តាមការឱ្យដឹងជាទូទៅ ពីម្ចាស់អាហារដ្ឋានជាច្រើននាក់នៅតំបន់នោះបានបញ្ជាក់ថា នៅរាល់ថ្ងៃបុណ្យទានតូចៗ ឬថ្ងៃសៅរ៍ ថ្ងៃអាទិត្យ មានភ្ញៀវខ្លះៗដែរ ប៉ុន្តែមិនច្រើនដូចពេលមុនៗទេ រាល់ថ្ងៃលក់បានត្រឹមតែបានលុយទិញអង្ករស្ងោរនិងឱ្យកូនទៅរៀនមិនចង់គ្រប់គ្រាន់ផងទេ ។
គួររំលឹកផងដែរថា ឧទ្យានភ្នំតាម៉ៅ ឬរមណីយដ្ឋានសួនសត្វភ្នំតាម៉ៅដំណើរការពីឆ្នាំ២០០០ មានផ្ទៃដីការពារសរុប២៥០០ហិកតា ក្នុងនោះផ្ទៃដី៧០ហិកតា ត្រូវបានគេរៀបចំដាំដើមឈើ និងធ្វើជាសួនសត្វតាមភ្នំចំនួន៥ គឺភ្នំតាម៉ៅ ភ្នំថ្មដុះ ភ្នំផ្តៅពន្ធ ភ្នំឆយ និងភ្នំបាំង មានទីតាំងស្ថិតនៅភូមិ-ឃុំក្រាំងសាប ស្រុកបាទី ខេត្តតាកែវ ចម្ងាយ៤០គីឡូម៉ែត្រ ពីរាជធានីភ្នំពេញ កាត់តាមផ្លូវជាតិលេខ២ បត់ស្តាំ៥គីឡូម៉ែត្រ ។
សត្វដែលគេអភិរក្សនៅទីនេះមាន៤ ប្រភេទធំៗ គឺសត្វល្មូន សត្វជើងបួន សត្វស្លាប និងសត្វទឹក (សត្វកម្រ៦ប្រភេទដែលត្រូវបានគេយកមកអភិរក្សមានដូចជា ពោះថ្លាន់ ក្រពើ ខ្លា តោ ដំរី និងខ្លាឃ្មុំ) ។ រមណីយដ្ឋានចម្រុះមានទីតាំងទស្សនាដូចជា ប្រាង្គប្រាសាទ ព្រៃភ្នំ ធម្មជាតិ សួនសត្វ ។ សួនសត្វភ្នំតាម៉ៅ មានសត្វជាង១០០ប្រភេទរស់នៅ និងមានជាង១ ៣០០ក្បាល ដោយមិនរាប់បញ្ចូលសត្វនៅក្រៅទ្រុង ។ សត្វទាំងអស់នោះមានដូចជា ប្រើស ឈ្លូស ឆ្កែចចក ប្រភេទសត្វស្លាប ល្មូន ពពួកស្វា ទោច និងសត្វដ៏ទៃជាច្រើនប្រភេទ ថែមទៀត ។ សត្វអភិរក្សទីនេះច្រើនបានមកពី ៖
ទី១-ការបង្ក្រាបបានពីឈ្មួញជួញដូរ ។
ទី២-បានមកពីប្រជាពលរដ្ឋដែលចិញ្ចឹម យកមកប្រគល់ឲ្យ ។
ទី៣-បានមកពីការបង្កាត់ពូជ សត្វដែលរស់នៅទីនេះស្រាប់តែម្ដង ។
ទី៤-ការដោះដូរពីសួនសត្វក្រៅប្រទេស ប៉ុន្តែមានមួយចំនួនតិចតួច ។
ក្នុងមួយឆ្នាំៗ ឧទ្យានអាចទាក់ទាញភ្ញៀវជាតិ អន្តរជាតិ និង អាចបង្កើតចំណូលពីការលក់សំបុត្រចូលទស្សនាបានជាង១០ម៉ឺននាក់ ។ ប្រាក់ចំណូលទាំងប៉ុន្មានត្រូវបានគេយកទៅផ្គត់ផ្គង់ដល់ការជួសជុលថែទាំ អភិរក្សឧទ្យាន ផ្តល់ជាចំណី ឬព្យាបាលសត្វព្រៃ និងបើកប្រាក់ខែជូនបុគ្គលិកបម្រើការងារជិត១០០នាក់ (ក្នុងនោះ បុគ្គលិកជាមន្ត្រីរាជការក្របខ័ណ្ឌក្រសួងកសិកម្ម១៣នាក់ មន្ត្រីជាប់កិច្ចសន្យា៥១នាក់ និង បុគ្គលិកអង្គការជាង៥០នាក់) ។ ក្រៅពីទីតាំងសិប្បនិមិត្ត និងធម្មជាតិឧទ្យាននេះមានទីតាំងប្រវត្តិសាស្ត្រគួរជាទីចាប់អារម្មណ៍ចំនួនពីរ ដូចជាប្រាសាទភ្នំតាម៉ៅ និងប្រាសាទភ្នំថ្មដុះ ៕
ចែករំលែកព័តមាននេះ