រាជធានីភ្នំពេញ ៖ ប្តីប្រពន្ធ២នាក់ប្រកបរបរលក់អីវ៉ាន់ចាប់ហួយ និងលក់សាំងតាមចិញ្ចើមផ្លូវ គឺលក់២៤ម៉ោង ខណៈពួកគាត់កំពុងតែដេកលក់ ស្រាប់តែមានជនសង្ស័យចំនួន២នាក់ ជិះម៉ូតូមកដល់ធ្វើជាហៅចាក់សាំង រួចហើយក៏ធ្វើសកម្មភាពយកកាំបិតបុ័ងតោគំរាមប្លន់យកម៉ូតូ តែមិនបានសំរេច ដោយសារជនរងគ្រោះបានដកប៊ូស៊ីម៉ូតូចេញ ធ្វើឱ្យជនសង្ស័យធាក់អត់ឆេះ ហើយក៏ត្រូវជនរងគ្រោះដេញវាយនាំគ្នារត់គេចខ្លួន បាត់ស្រមោល កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៩ ខែមករា ឆ្នាំ២០២០ ចំណុចផ្លូវ៦០ម៉ែត្រកែងនឹង៥០ម៉ែត្រ ស្ថិតក្នុងសង្កាត់ព្រែកហូរ ក្រុងតាខ្មៅ ខេត្តកណ្តាល ។
ជនរងគ្រោះទាំង២នាក់ប្តីប្រពន្ធខាងលើ ដោយស្ត្រីជាប្រពន្ធឈ្មោះ ហេង ស្រី អាយុ៣២ឆ្នាំ មុខរបរលក់ដូរតាមចិញ្ចើមផ្លូវ ស្នាក់នៅសង្កាត់ព្រែកហូរ ក្រុងតាខ្មៅ ខេត្តកណ្តាល មានស្រុកកំណើតនៅភូមិបឹងទូក ស្រុកទឹកឈូរ ខេត្តកំពត ចំណែកបុរសជាប្តីមិនស្គាល់ឈ្មោះនោះទេ ។ រីឯម៉ូតូមួយគ្រឿងដែលត្រូវជនសង្ស័យប្លន់យកទៅមិនបានសំរេចនោះម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ។
តាមសម្ដីស្ត្រីជនរងគ្រោះបានអោយដឹងថា មុនពេលកើតហេតុ ពួកគាត់កំពុងតែ សំរានលង់លក់ជាមួយប្តីនិងកូនប្រុសតូចនៅក្នុងរោងលក់អីវ៉ាន់ចាប់ហួយ និងមានទាំងសាំងទៀតផង ព្រមទាំងបានទុកម៉ូតូមួយគ្រឿងនៅខាងក្រោយរោង ។
តាមប្រភពដដែលបានបន្តថា លុះដល់វេលាម៉ោងកើតហេតុ ស្រាប់តែមានបុរសជាជនសង្ស័យចំនួន២នាក់ជិះម៉ូតូមួយគ្រឿងម៉ាកស៊ុយហ្ស៊ុយគីស្មាស ពណ៌ខ្មៅ មកឈប់ត្រង់ចំណុចរោងលក់អីវ៉ាន់របស់គាត់ ដោយបុរសជាជនសង្ស័យម្នាក់បានដើរទៅហៅគាត់ចាក់សាំងឱ្យ លុះពេលគាត់ចុះដើរមកចាក់សាំងនៅខាងមុខ ស្រាប់តែជនសង្ស័យម្នាក់ក្នុងចំណោមគ្នា២នាក់ បានដើរទៅជិតមុងកូននិងប្តីរបស់គាត់កំពុងតែដេក រួចហើយជនសង្ស័យម្នាក់នោះ ក៏បានយកកាំបិតបុ័ងតោមកគំរាម ភ្ជង់កូនតូចរបស់គាត់ដោយទាមទារយកសោម៉ូតូ ពេលនោះដែរគាត់បានហុចសោឱ្យដែរ តែដោយសារម៉ូតូរបស់គាត់មុននឹងដេក គឺប្តីរបស់គាត់បានដោះក្បាលប៊ូស៊ីចេញ ទើបធ្វើអោយជនសង្ស័យធាក់អត់ឆេះ ។
តាមប្រភពដដែលបានបន្តទៀតថា បន្ទាប់ពីធាក់អត់ឆេះ ហើយភ្លាមៗនោះគាត់ក៏បានប្រទាញប្រទង់ដណ្ដើមយកកូនពីជនសង្ស័យវិញ ហើយស្រែកថា «ចោរៗ» ឱ្យគេជួយ ទើបប្តីរបស់គាត់ និងអ្នកដំណើរតាមផ្លូវចេញមកបានយកដំបងដេញវាយជនសង្ស័យទាំងពីរនាក់ បណ្តាលឲ្យរងរបួសបែកក្បាលទាំងពីរនាក់ ហើយជនសង្ស័យ ក៏បាននាំគ្នាជិះម៉ូតូគេចខ្លួនបាត់អស់ទៅ ។
ក្រោយពេលកើតហេតុ គេឃើញមានកម្លាំងសមត្ថកិច្ចមូលដ្ឋានបានចុះទៅដល់កន្លែងកើតហេតុ ដើម្បីសាកសួរពីហេតុការណ៍ដែលបានកើតឡើង និងណែនាំឱ្យជនរងគ្រោះទៅ ដាក់ពាក្យបណ្ដឹងនៅប៉ុស្តិ៍នគរបាល ព្រែកហូរ ដើម្បីសមត្ថកិច្ចកំណត់មុខសញ្ញា និងតាមចាប់ខ្លួនយកមកផ្តន្ទាទោសតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ