ការចាប់ផ្តើមនៃឆ្នាំថ្មីប្រៀបបានជាឱកាសមួយដែលអនុញ្ញាតឲ្យអ្នកវាយតម្លៃលើជីវិតរបស់អ្នកសាជាថ្មីទាំងជីវិតផ្ទាល់ខ្លួន និងការងារ ឬអាជីវកម្មជាដើម ។ ហើយវាក៏អាចជាពេលដែលអ្នកសម្រេចចិត្តថាអ្នកនឹងផ្លាស់ប្តូរផ្នែកផ្សេងៗក្នុងជីវិតដែរដូចជាការងារអ្នកជាដើម ។
ដូច្នេះប្រសិនបើអ្នកស្ថិតក្នុងចំណោមមនុស្សដែលចង់ឈប់ពីការធ្វើការឲ្យអ្នកដទៃនិងធ្វើជាចៅហ្វាយខ្លួនឯងនោះ អ្នកគួរដឹងពីជំហានសំខាន់ៗទាំងបីដែលអ្នកត្រូវដើរដើម្បីសម្រេចគោលដៅខាងលើ ។
១. អ្នកត្រូវតែសកម្ម៖
វាជារឿងទូទៅដែលមនុស្សតែងតែចង់ជៀសវាងការខិតខំ និងភាពមិនប្រាកដប្រជានៃការចាប់ផ្តើមឱកាសថ្មីមួយ ។ ដោយហេតុដូចនេះទើបមានមនុស្សជាច្រើនដែលមានតែគំនិត តែមិនមានភាពក្លាហានក្នុងការធ្វើឲ្យវាក្លាយជាការពិត ។ ប្រសិនបើអ្នកចង់ធ្វើជាអាជីវករមួយរូបនោះ អ្នកមិនអាចរងចាំអ្នកដទៃមកចាប់ផ្តើមអាជីវកម្មឲ្យអ្នកបានទេ។ គឺអ្នកខ្លួនឯងជាអ្នកត្រូវសកម្មដើម្បីសម្រេចវាបាន ។
២. បង្កើតបណ្តាញឲ្យបានឆាប់៖
ពេលដែលអ្នកសម្រេចចិត្តច្បាស់លាស់ហើយថាអ្នកនឹងដើរផ្លូវជាអាជីវករ ជំហានបន្ទាប់ដែលអ្នកត្រូវដើរគឺចូលទូរស័ព្ទរបស់អ្នក និងរកមនុស្សដែលអ្នកអាចទាក់ទងបានដើម្បីសុំយោបល់និងដំបូន្មាន ឬសហការគ្នាជាដើម ។
ប្រាកដណាស់ អ្នកមិនអាចទទួលបានយោបល់ ឬដំបូន្មានល្អៗពីមនុស្សដែលមិនជិតស្និទ្ធឬជឿទុកចិត្តអ្នកឡើយ ។ ដោយហេតុដូចនេះ អ្នកត្រូវតែចាប់ផ្តើមបង្កើតទំនាក់ទំនងជាមួយមនុស្សដែលអ្នកគិតថាអាចជួយអ្នកនៅថ្ងៃអនាគតពីពេលបច្ចុប្បន្ននេះទៅ ។
៣. ពិនិត្យមើលតម្លៃសំខាន់ៗរបស់អ្នកវិញ៖
គោលតម្លៃសំខាន់ៗរបស់អ្នកគឺជាគោលការណ៍ដែលសំខាន់ជាងគេដែលអ្នកតែងតែគោរពតាមមិនថាដោយចេតនា ឬអចេតនាទេ ។ វាជាអ្វីដែលជួយឲ្យអ្នកធ្វើការសម្រេចចិត្តធំៗក្នុងជីវិត ។
ប្រសិនបើអ្នកចង់ចាប់ផ្តើមអាជីវកម្មតែអ្នកនៅមិនទាន់ច្បាស់លាស់ខ្លួនឯងនោះ អ្នកអាចត្រួតពិនិត្យមើលការងាររបស់អ្នកម្តងទៀតថាវាស្របទៅនឹងគោលតម្លៃអ្នក និងចំណុចខ្លាំងរបស់អ្នក ឬទេ? តើអ្នកតែងតែបញ្ចប់សប្តាហ៍អ្នកដោយមានអារម្មណ៍នឿយហត់ និងខឹងមែនទេ? តើអ្នកក្រោកពីដំណេកជារៀងរាល់ថ្ងៃមិនចង់ទៅធ្វើការមែនទេ? គ្មានអ្វីដែលអាចប្រាប់អ្នកច្បាស់ថាអ្នកត្រៀមខ្លួនរួចជាស្រេចសម្រាប់ជីវិតជាអាជីវករឬទេក្នុងឆ្នាំថ្មីនេះ ប៉ុន្តែវាជាពេលល្អមួយដែលអ្នកអាចប្រើដើម្បីវាយតម្លៃលើខ្លួនឯងឡើងវិញ ៕ កែសម្រួលដោយ ៖ សុឃាក់
ចែករំលែកព័តមាននេះ