ខេត្តស្ទឹងត្រែង ៖ រាជរដ្ឋាភិបាលកម្ពុជាបានផ្តល់ការវិនិយោគដីសម្ប ទានសេដ្ឋកិច្ចនូវទំហំផ្ទៃដីចំនួន២.៩៦៥ហិកតាដល់ក្រុមហ៊ុនអង្គរបាណាណាស្ទឹងត្រែងដើម្បីផលិតនូវដំណាំចេកអំបូងលឿងដែលបច្ចុប្ប ន្នក្រុមហ៊ុនមួយនេះកំពុងជោគជ័យលើផលិតផលសម្រេចហើយនាំចេញទៅកាន់ទីផ្សារក្រៅប្រទេសក្នុងមួយថ្ងៃចាប់ពី២០ទៅ៣០សិបតោន ។ នេះបើតាមការអះអាងពីលោកងៀង វ៉ាងយ៉ុង ប្រធានក្រុមវេចខ្ជាប់ផលិផលនាំចេញ។ ជំនួញពាណិជ្ជកម្មដ៏ធំមួយនេះ បានបង្ហាញពីសក្តានុពលក្នុងខេត្តភាគឦសាននៃប្រទេសដែលជោគជ័យលើផ្នែកកសិកម្មខ្នាតយក្សដែលមានគុណភាពទទួលស្គាល់ពីបរទេស។
ក្នុងសកម្មភាពប្រមូលផលចេកអំបូងលឿនរបស់ក្រុមហ៊ុនបាណាណា ស្ថិតនៅឃុំអូរស្វាយ ស្រុកបូរីអូរស្វាយសែនជ័យ លោកងៀង វ៉ាងយ៉ុង ដែលជាប្រធានក្រុមវេចខ្ចប់ផលិផលនាំចេញបានបញ្ជាក់យ៉ាងដូច្នេះថា ក្នុងមួយថ្ងៃកម្មករត្រូវធ្វើការវេចខ្ចប់ចេកបានចាប់ពី២០តោនទៅ៣០តោន ហើយមួយសប្តាហ៍ត្រូវប្រមូលទិន្នផលចន្លោះ២៥០តោនទៅ៣០០តោន សម្រាប់នាំចេញទៅកាន់ទីផ្សារក្រៅប្រទេស។
លោកបន្ថែមថា ការជោគជ័យដ៏ខ្ពស់នេះ ក្រុមហ៊ុនបានសំដែងការដឹងគុណចំពោះប្រមុខរាជរដ្ឋាភិបាលកម្ពុជាដែលបានផ្តល់ការវិនិយោគដីសម្បទានសេដ្ឋកិច្ចឱ្យក្រុមហ៊ុនដាំដំណាំកសិកម្មសម្រេចបានទៅតាមផែនការ ។ លោកបន្តថាតាមរយៈការវិនិយោគនេះដែរក៏បានផ្តល់នូវលទ្ធភាពការងារជូនប្រជាពលរដ្ឋក្នុងស្រុក ដោយមិនបាច់ចាកចេញពីស្រុកកំណើតទៅស៊ីឈ្នួលលក់កម្លាំងពលកម្មនៅក្រៅប្រទេសដែរ។
លោក គង់ លន់ កម្មករមកពីភូមិឃុំកាំងចាម ស្រុកថា ឡាបរិវ៉ាត់បានបញ្ជាក់ថា កន្លងមកលោកធ្លាប់ចំណាកស្រុកទៅធ្វើការនៅឯប្រទេសថៃត្រូវបានថៅកែបោកប្រាស់ បើកប្រាក់ឈ្នួលឱ្យមិនត្រឹមត្រូវទៅតាមកិច្ចសន្យាទេ។ លោកថា មកធ្វើការនៅក្នុងក្រុមហ៊ុនអង្គបាណាណាប្រមូលផលចេកនេះ មានជីវភាពល្អជាងទៅស៊ីឈ្មួលនៅក្រៅប្រទេស ដោយក្នុងមួយខែទទួលបានប្រាក់ចាប់ពី២៥០ទៅ៤០០ដុល្លារទៅតាមការងារដែលយើងខិតខំធ្វើបាន។
សូមបញ្ជាក់ថា ក្រុមហ៊ុនអង្គរបាណាណាស្ទឹងត្រែងក្រៅពីបង្កើនផលិតផលចេកអំបូងលឿងដាំចេកអំបូងលឿង ដែលកំពុងប្រមូលផលនាំចេញក្រុមហ៊ុនមួយនេះក៏បានបន្តការដាំដុះផ្លែស្វាយ ម្នាស់ ខ្នុរ និងក្រូចថ្លុងបន្ថែមទៀត ដើម្បីផ្តល់ការងារជូនបងប្អូនប្រជាពលរដ្ឋនៅទីនោះដែរ ៕ (កែសម្រួលដោយ ៖ ធីតា)
ចែករំលែកព័តមាននេះ