Lamborghini គឺជាក្រុមហ៊ុនរថយន្តដែលទើបតែដាក់ឱ្យមាននូវបច្ចេកវិទ្យាជំនួយការសម្លេង Amazon Alexa នៅលើរថយន្តរបស់ខ្លួន។ ពោលគឺរថយន្តស្ព័រ Lamborghini Huracan Evo ម៉ូដែលឆ្នាំ២០២០។ កន្លងមកគេធ្លាប់តែឃើញមាននៅម៉ូដែលរថយន្តធម្មតាៗដូចជារថយន្ត Toyota, Audi និង Ford។ តែសម្រាប់រថយន្តស្ព័រល្បីៗមិនទាន់មាននៅឡើយទេ។ នេះគឺអាចធ្វើឱ្យ Ferrari មិនច្រណែនមិនបាន។
វីដេអូមួយដែលចេញផ្សាយដោយ Lamborghini បង្ហាញពីរបៀប ដែលបច្ចេកវិទ្យា Amazon Alexa ធ្វើការនៅក្នុងរថយន្ត។ គេអាចបញ្ជាមុខងារនៅក្នុងរថយន្តបានជាច្រើនប្រភេទ ដោយគ្រាន់តែនិយាយប្រាប់តែប៉ុណ្ណោះ។ ការបញ្ជាដូចជា ការផ្លាស់ប្តូរពណ៌ភ្លើងខាងក្នុងរថយន្ត បញ្ជាម៉ាស៊ីនត្រជាក់ ពិនិត្យមើលព័ត៌មានបូមកង់ ព័ត៌មានប៉ុងកង់ និង ការចាក់ភ្លេងជាដើម។ មិនត្រឹមតែប៉ុណ្ណោះ វាអាចបញ្ជាបើកទ្វារផ្ទះដាក់ឡាន ពេលដែលរថយន្តមកដល់ខាងមុខផ្ទះ។ តែនៅពេលនេះ គេនៅមិនទាន់ដឹងច្បាស់ថា តើ Amazon Alexa នឹងមាននៅលើគ្រប់ម៉ូដែល Huracan Evo ឆ្នាំ២០២០ ទាំងអស់ ឬក៏ ត្រូវបន្ថែម Option ឬអត់នោះទេ។
នាយកក្រុមហ៊ុន Lamborghini លោក Stefano Domenicali បានប្រាប់ថា ៖ «Lamborghini គឺជារថយន្តឆ្ពោះទៅកាន់អនាគតកាល ហើយនេះគឺជាលើកទីមួយដែលក្រុមហ៊ុនរថយន្តបានដាក់ឱ្យមានការបញ្ជានៅក្នុងកាប៊ីនរថយន្តតាមរយៈ Amazon Alexa។ ចក្ខុវិស័យរបស់យើងសម្រាប់ Alexa គឺធ្វើឱ្យវាទៅជាការបញ្ជាបែបធម្មជាតិ ហើយ Lamborghini អាចសម្រេចទៅបានដោយដាក់វាឱ្យមាននៅលើអេក្រង់បង្ហាញព័ត៌មាន»។
លោកបានបន្តថា៖ «បច្ចេកវិទ្យានេះនឹងជួយឱ្យម្ចាស់រថយន្ត Lamborghini ទទួលបានភាពងាយស្រួលដោយគ្រាន់តែបញ្ជាដោយសម្លេង ខណៈដែលកំពុងផ្តោតអារម្មណ៍លើការបើកបរ។ ពួកយើងរំពឹងថា វានឹងផ្លាស់ប្តូរបទពិសោធន៍របស់អ្នកបើកបរនៅពេលយើងដឹកជញ្ជូនអតិថិជននៅឆ្នាំនេះ»។
នេះមិនមែនគ្រាន់តែជាការធ្វើអោយប្រសើរឡើងនូវ Lamborghini Huracan Evo នោះទេ។ កាលពីពេលថ្មីៗនេះក្រុមហ៊ុន Lamborghini បានណែនាំនូវបច្ចេកវិទ្យាប៉ុងក្រោយ (Rear-Wheel-Drive) នៅលើរថយន្តស្ព័រ សម្រាប់អ្នកស្រឡាញ់រថយន្តស្ព័រ។ បច្ចេកវិទ្យានេះអាចបញ្ជូនកម្លាំងដល់ទៅ ៦១០សេះ ទៅកាន់កង់ក្រោយឱ្យវិលទៅមុខ៕
ចែករំលែកព័តមាននេះ