ខេត្តព្រះសីហនុ ៖ ពិធីតែងតាំង ផ្ទេរភារកិច្ច និងបំពាក់ឋានន្តរស័ក្តិដល់មន្ត្រីនគរបាលខាងបង្ក្រាបបទល្មើសព្រហ្មទណ្ឌឧក្រិដ្ឋ ត្រូវបានប្រារព្ធធ្វើឡើងកាលពីព្រឹកថ្ងៃទី៣ ខែមករាកន្លងមក នៅស្នងការដ្ឋាននគរបានខេត្ត ក្រោមអធិបតីភាពលោកឧត្តមសេនីយ៍ទោ ជួន ណារិន្ទ ស្នងការ និងមានការចូលរួមពីស្នងការរងជាច្រើនរូបទៀត ។
ក្នុងពិធីនេះបាន ៖១-ផ្ទេរលោកវរសេនីយ៍ឯក ភុល ភស្តា អត្តលេខ១៥០១៣ ពីអធិការនៃអធិការដ្ឋាននគរបាលក្រុងព្រះសីហនុ ទៅជានាយរងការិយាល័យផ្សព្វផ្សាយអប់រំនៃស្នងការដ្ឋាននគរបាលខេត្ត ។
២-ផ្ទេរលោកវរសេនីយ៍ទោ តី វិសាល អត្តលេខ២៦០៣៦ ពីនាយរងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ ទៅជាអធិការនៃអធិការដ្ឋាននគរ បាលក្រុងព្រះសីហនុ ខេត្តព្រះសីហនុ ។
៣-ផ្ទេរលោកវរសេនីយ៍ទោ ហេង គីមអានអត្តលេខ៦២៤០២ ពីនាយការិយាល័យស៊ើបអង្កេតនិងអនុវត្តនីតិវិធី ទៅជាអធិការនៃអធិការដ្ឋាននគរបាលក្រុងកោះរ៉ុង ខេត្តព្រះសីហនុ ។
៤-ផ្ទេរលោកវរសេនីយ៍ទោ ជួន សុខា អត្តលេខ៥៤១៣៣ ពីនាយរងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ ទៅជានាយរងការិយាល័យគ្រប់គ្រងសន្តិសុខឯកជន ។
សមាសភាពផ្ទេរចេញពីស្នងការដ្ឋាននគរបាលរាជធានីភ្នំពេញ គឺលោក តី វិសាល ទៅកាន់ជាអធិការនគរបាលក្រុងព្រះហនុ ត្រូវបានគេមើលឃើញថា នៅក្រុងព្រះសីហនុពេលនេះនឹងមានអធិការដៃស្អិតខាងបង្ក្រាបបទល្មើសព្រហ្មទណ្ឌ ឧក្រិដ្ឋ ទៅឈរជើងដើម្បីជួយជាកម្លាំងដល់លោកស្នងការខេត្តនៅទីនោះហើយ ។
លោក តី វិសាល ក៏ជាអតីតកូនចៅជំនិតរបស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបច្ចុប្បន្នដែរ ដូច្នេះថ្វីដៃក្នុងការបង្ក្រាបបទល្មើសព្រហ្មទណ្ទ ជឿថាពិតជាដៃស្អិតដូចគ្នា ។ ក្នុងពិធីនោះ លោកស្នងការ ជួន ណារិន្ទបានសំណេះសំណាលជាមួយមន្ត្រីក្រោមឱវាទដោយដាក់បទបញ្ជាយ៉ាងមុឺងម៉ាត់ថា ល្បែងសុីសងទាំងឡាយណាដែលជ្រកក្រោមផ្លាកហ្គេមអនឡាញត្រូវតែបង្ក្រាបឲ្យអស់ ឯអ្នកនៅពី
ក្រោយបទល្មើស ទោះជាអ្នកណាក៏ដោយត្រូវតែចាប់ខ្លួន ។
សន្តិសុខ សុវត្ថិភាព សណ្តាប់ធ្នាប់ក្នុងខេត្តព្រះសីហនុទាំងមូល ជាគន្លឹះនិងបានដើរតួនាទីយ៉ាងសំខាន់ក្នុងការទាក់ទាញ រក្សាកំណើនភ្ញៀវ អ្នកវិនិយោគជាតិ និងអន្តរជាតិចូលមកក្នុងខេត្តនេះ ។ នេះក៏ជាកិច្ចឆ្លើយតបទៅនឹងអនុសាសន៍ដ៏ខ្ពង់ខ្ពស់របស់សមេ្តចតេជោ នាយករដ្ឋមន្ត្រី ហ៊ុន សែន ដែលលើកឡើងថា «អរគុណសន្តិភាព» នោះដែរ ។
លោកស្នងការ បានជំរុញឲ្យកងកម្លាំងសមត្ថ កិច្ចក្រោមឱវាទទាំងអស់ ត្រូវធ្វើអ្វីតាមឋានានុក្រម គោរពច្បាប់ជាគោល ពង្រឹងនីតិវិធីច្បាប់មានសីលធម៌ល្អទន់ភ្លន់តែមុឹងម៉ាត់ ។ ជាពិសេសលោកបានផ្តាំផ្ញើឲ្យកងកម្លាំងទាំងអស់ ដាច់ខាតកុំនៅពីក្រោយខ្នងជនល្មើស ឬបទល្មើសណាមួយឲ្យសោះ ហើយបើមានដាច់ខាតត្រូវតែចាប់ ។ប៉ុស្តិ៍នគរបាលរដ្ឋបាល អធិការដ្ឋានទាំងអស់ ត្រូវបើកទ្វារ២៤ម៉ោងលើ២៤ម៉ោងទទួលបងប្អូនប្រជាពលរដ្ឋដែលមានបញ្ហាណាមួយ ឬដាក់ពាក្យបណ្តឹង ត្រូវការដំណោះស្រាយជាបន្ទាន់ ដើម្បីទប់ស្កាត់ និងបង្ក្រាបឲ្យទាន់ពេលវេលា ស្របពេលឆ្នាំថ្មី ទិសដៅឲ្យកាន់តែថ្មី ៕
ចែករំលែកព័តមាននេះ