ទារករាករូសមិនទាក់ទងនឹងការទទួលទានអាហាររបស់ស្ត្រីជាម្តាយនោះទេ តែវាបណ្តាលមកពីការខ្វះអនាម័យក្នុងការថែទាំទៅវិញ ។ ការថែទាំទារក គឺជារឿងដ៏សំខាន់ ដែលមាតាគ្រប់រូបគួរតែយកចិត្តទុកដាក់បំផុត ជាពិសេសនៅពេលដែលកូនលោកអ្នកមានបញ្ហារាករូស ។
ទារករាករូសមិនទាក់ទងនឹងការទទួលទានអាហាររបស់ស្ត្រីជាម្តាយនោះទេ តែវាបណ្តាលមកពីការខ្វះអនាម័យក្នុងការថែទាំទៅវិញ ។ ការថែទាំទារក គឺជារឿងដ៏សំខាន់ ដែលមាតាគ្រប់រូបគួរតែយកចិត្តទុកដាក់បំផុត ជាពិសេសនៅពេលដែលកូនលោកអ្នកមានបញ្ហារាករូស ។
ជួបជាមួយលោកវេជ្ជបណ្ឌិត ហុង សុខឃាង អ្នកឯកទេសផ្នែកជំងឺកុមារនៃមន្ទីរពេទ្យកុមារជាតិ បានប្រាប់កោះសន្តិភាពឱ្យដឹងថា ការរាកធ្វើឱ្យទារកបាត់បង់ជាតិទឹកច្រើន បើមិនបានបង្គ្រប់ទឹកវិញទេ អាចបណ្តាលឱ្យទារកកាន់តែមានអាការៈធ្ងន់ធ្ងរ ។ ទារកមិនអាចញ៉ាំទឹកបានច្រើនដូចកុមារនោះទេ វិធីដែលល្អ គឺការបំបៅដោះកូនឱ្យបានញឹកញាប់ ។ ទឹកដោះម្តាយជាអាហារបំប៉ន និងភេសជ្ជៈដ៏សំខាន់បំផុត ដែលទារកត្រូវការចាំបាច់នៅអាយុ៦ខែដំបូង មិនតែប៉ុណ្ណោះទឹកដោះម្តាយ គឺជាឱសថដែលអាចព្យាបាលអាការៈផ្សេងរបស់ទារកបានទៀតផង ។ បើសិនជាទារកនៅតែមានសភាពមិនធម្មតា បន្ទាប់ពីបំបៅដោះម្តាយហើយនោះ លោកអ្នកគប្បីយកគេទៅពិគ្រោះជាមួយវេជ្ជបណ្ឌិត ។ ជាពិសេសបើសិនជាទារកមានជំងឺផ្សេង ហើយមានបញ្ហារាករូសទៀតនោះ សញ្ញាដែលត្រូវយកចិត្តទុកដាក់ គឺនៅពេលទារកក្អួតខ្លាំង មានសភាពហត់ខ្លាំង ក្តៅខ្លាំង លាមកមានឈាម ឬសំបោរ ឈឺពោះខ្លាំង ឬយំនៅពេលនោម គឺត្រូវតែបញ្ជូនទារកទៅគ្រូពេទ្យជំនាញ ដើម្បីព្យាបាលឱ្យបានទាន់ពេលវេលា ។
ទារកដែលមានបញ្ហារាករូសបណ្តាលមកពីបាក់តេរី និងបណ្តាលមកពីពពួកបារ៉ាស៊ីត ប៉ុន្តែបញ្ហាដែលជួបប្រទះជាញឹកញាប់ជាងគេនោះ គឺបណ្តាលមកពីវីរុស ។ វីរុសទាំងនោះគឺអាចចម្លងទៅទារកយ៉ាងងាយ តាមរយៈការកាន់ចាប់ផ្ទាល់ជាមួយនឹងរបស់របរមិនស្អាត ហើយទៅប៉ះពាល់ទារកដោយខ្វះអនាម័យ មិនបានលាងសម្អាតដៃមុន ដូចជាពេលបំបៅដោះ ឬពេលឆុងទឹកដោះគោដាក់ដបឱ្យទារកបៅជាដើម ។ កត្តាទាំងនេះងាយធ្វើឱ្យវីរុសឆ្លងទៅទារកយ៉ាងងាយបំផុត ។ ដូច្នេះដើម្បីចៀសវាងបញ្ហានេះ លោកអ្នកគប្បីមានអនាម័យឱ្យល្អនៅពេលថែទាំទារក ៕
ចែករំលែកព័តមាននេះ