រាជធានីភ្នំពេញ ៖ លោក កឹម សុខា បានបន្តអះអាងនឹងចូលរួមក្នុងសវនាការតាមការកោះហៅរបស់តុលាការសាលាដំបូងរាជធានីភ្នំពេញ នៅថ្ងៃទី១៥ ខែមករា ខាងមុខនេះ ។ នេះបើតាមលោក មុត ចន្ថា ។ លោកមុត ចន្ថា មនុស្សជំនិតលោក កឹម សុខា បានឲ្យដឹងក្រោយជំនួបពិភាក្សារវាងលោកស្រី Asa Eriksson សមាជិកសភានៃគណបក្សសង្គមប្រជាធិបតេយ្យដែលជាគណបក្សកាន់អំណាចធំជាងគេនៅរាជាចក្រស៊ុយអែដ កាលពីល្ងាចថ្ងៃទី៧មករា ឆ្នាំ២០២០ យ៉ាងដូច្នេះ ថា៖«លោកកឹម សុខាគឺជាអ្នកអនុវត្តច្បាប់ ដូចអ្វីដែលចៅក្រមស៊ើប អង្កេតបានទទួល ស្គាល់ ថាលោក កឹម សុខា គឺជាអនុវត្តច្បាប់ និងបទបញ្ជាតាមយ៉ាងពេញលេញ ដូច្នេះលោកកឹម សុខា នឹងចួលរួមសវនាការ»។
លោកមុត ចន្ថា ក៏បានឲ្យដឹងថា តំណាងស្ថានទូតស៊ុយអ៊ែត នៅកម្ពុជានឹងចូលរួមតាមដានសវនាការរបស់លោកកឹម សុខា នៅថ្ងៃទី១៥ ខែមករា ឆ្នាំ២០២០ខាងមុខផងដែរ ។ ទាក់ទិននឹងជំនួបវិញលោកមុត ចន្ថាបានឲ្យដឹងថា លោកស្រី Asa Eriksson មានបំណងជួបសម្តែងការគួរសមសួរសុខទុក្ខ និងសំណេះសំណាល ខណៈដែលលោក កឹម សុខា ធ្លាប់ត្រូវបានរាជរដ្ឋាភិបាលស៊ុយអែដអញ្ជើញទៅធ្វើទស្សនកិច្ចនៅប្រទេសស៊ុយអែត នៅឆ្នាំ១៩៩៤ ក្នុងនាមលោកជាសមាជិកសភា និងជាប្រធានគណៈកម្មការសិទ្ធិមនុស្សរបស់រដ្ឋសភា ដើម្បីសិក្សាស្រាវជ្រាវអំពីការអនុវត្តសិទ្ធិមនុស្ស និងលទ្ធិប្រជាធិបតេយ្យ ។
លោក មុត ចន្ថា បានអះអាងថា ទង្វើររបស់លោក កឹម សុខា បន្តកិច្ចខិតខំប្រឹងប្រែងក្នុងការពង្រឹង និងពង្រីកទំនាក់ទំនងល្អជាមួយបណ្តាប្រទេសនានា ដើម្បីបម្រើការពារកសាងនូវអ្វីដែលជាផលប្រយោជន៍របស់ប្រទេស និងប្រជាពលរដ្ឋខ្មែរទាំងអស់គ្នា ។
សូមជម្រាបថា សាលាដំបូងរាជធានីភ្នំពេញបានសម្រេចកំណត់ថ្ងៃទី១៥ ខែមករា ឆ្នាំ២០២០ ដើម្បីបើសវនាការសំណុំរឿង «សន្និដ្ឋភាពជាមួយបរទេស» របស់លោក កឹម សុខា តាមមាត្រា៤៤៣នៃក្រហ្មទណ្ឌ ។ ក្រោយពីជាប់ពន្ធនាគាអស់រយៈពេលជាង១ឆ្នាំ នៅពន្ធនាគារត្រពាំងថ្លុង ។ ប៉ុន្តែកាលពីថ្ងៃទី១០ ខែវិច្ឆិកា ឆ្នាំ២០១៩ សាលាដំបូងរាជធានីភ្នំពេញសម្រេចឲ្យលោ កឹម សុខា នៅគេហដ្ឋានរបស់លោកវិញ ប៉ុន្តែមិនឲ្យធ្វើសកម្មភាពទាក់ទង និងនយោបាយ ។
តុលាការបានអះអាងថា សម្រេចឲ្យនៅគេហដ្ឋានវិញ ដោយសារតែលោកកឹម សុខា បានគោរពត្រឹមត្រូវតាមកាតព្វកិច្ចនៃការដាក់ឱ្យស្ថិតក្រោមការត្រួតពិនិត្យតាមផ្លូវតុលាការ និងមានកិច្ចសហការល្អក្នុងដំណើរការនីតិវិធីរបស់តុលាការ ។ កាតព្វកិច្ចនៃការត្រួតពិនិត្យតាមផ្លូវតុលាការថ្មីដែលលោក កឹម សុខា ត្រូវអនុវត្តចាប់ពីពេលនេះមានបីចំណុច គឺទី១.មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា ទី២.មិនត្រូវធ្វើសកម្មភាពនយោបាយ និងទី៣.ត្រូវឆ្លើយតបនឹងការកោះហៅពីគ្រប់សមត្ថកិច្ច ៕ កែសម្រួលដោយ ៖ សុឃាក់
ចែករំលែកព័តមាននេះ