ខេត្តព្រះសីហនុ ៖ កាលពីវេលាម៉ោង៨និង៣០នាទីយប់ថ្ងៃទី៦ ខែមករា ឆ្នាំ២០២០ នគរបាលស្នងការដ្ឋានខេត្ត ព្រះសីហនុបានឆ្មក់ចូលបង្ក្រាបទីតាំងភ្នាល់ហ្គេមខុសច្បាប់ជាបន្ដបន្ទាប់ចំនួន៤ទីតាំង និងឃាត់ខ្លួនមនុស្ស៥៦នាក់ ក្នុងនោះជនជាតិចិន៣៦នាក់ ទូហ្គេមបាញ់ត្រីចំនួន១៥ទូ,…
ខេត្តព្រះសីហនុ ៖ កាលពីវេលាម៉ោង៨និង៣០នាទីយប់ថ្ងៃទី៦ ខែមករា ឆ្នាំ២០២០ នគរបាលស្នងការដ្ឋានខេត្ត ព្រះសីហនុបានឆ្មក់ចូលបង្ក្រាបទីតាំងភ្នាល់ហ្គេមខុសច្បាប់ជាបន្ដបន្ទាប់ចំនួន៤ទីតាំង និងឃាត់ខ្លួនមនុស្ស៥៦នាក់ ក្នុងនោះជនជាតិចិន៣៦នាក់ ទូហ្គេមបាញ់ត្រីចំនួន១៥ទូ, ស្លុតម៉ាស៊ីនចំនួន៦០ទូ, លុយ១៨.៩៣៨ដុល្លារ, លុយ២.៨៣០.០០០រៀល និងម៉ូតូចំនួន៣គ្រឿង ។
លោកឧត្តមសេនីយ៍ ទោ ជួន ណារិន្ទ ស្នងការនគរបាលខេត្ត ព្រះសីហនុ បានឲ្យដឹងថា ដោយអនុវត្តតាមតាមសារាចរណែនាំលេខ០៧ ស.រ.ណ.ន ចុះថ្ងៃទី១៨ ខែសីហា ឆ្នាំ២០១៩ របស់រាជរដ្ឋាភិបាលស្តីពីការពង្រឹងការគ្រប់គ្រងបិទអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអុីនធីណេតអនឡាញក្នុងនិងក្រៅប្រទេស តាមពេលវេលាខាងលើ ក្រោមការដឹកនាំផ្ទាល់របស់លោក និងមានការសម្របសម្រួល ផ្នែកច្បាប់ពី លោក លឹម ប៊ុនហេង ព្រះរាជអាជ្ញារង នៃអយ្យការអមសាលាដំបូង ខេត្ដព្រះសីហនុ កម្លាំងជំនាញនៃការិយាល័យនគរបាល ព្រហ្មទណ្ឌកម្រិតធ្ងន់ សហការជាមួយនឹងកម្លាំងជំនាញ នៃអធិការដ្ឋាន នគរបាលក្រុងព្រះសីហនុ ប៉ុស្ដិ៍នគរបាល រដ្ឋបាល សង្កាត់លេខ៣ បានចុះធ្វើការបង្ក្រាបទីតាំងភ្នាល់ហ្គេមខុសច្បាប់ជាបន្ដបន្ទាប់ចំនួន៤ទីតាំង ស្ថិតក្នុងសង្កាត់លេខ៣ ក្រុងព្រះសីហនុ ។
លោកឧត្តមសេនីយ៍ទោស្នងការនគរបាលខេត្តព្រះសីហនុបានបញ្ជាក់ឲ្យដឹងទៀតថា ជនសង្ស័យខាងលើត្រូវបាននាំមកកាន់ការិយាល័យ នគរបាល ព្រហ្មទណ្ឌកម្រិតធ្ងន់ ដើម្បី ធ្វើការសាកសួរតាមនីតិវិធី រីឯទូហ្គេមបាញ់ត្រី និងស្លុតម៉ាស៊ីន លោកព្រះរាជអាជ្ញារងបាន ឯកភាពឲ្យរក្សាទុកក្នុងទីតាំង ដែលបានពិនិត្យជាក់ស្ដែង ដើម្បីមានចំណាត់ការបន្តនៅពេលក្រោយទៀត ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព៕ (កែសម្រួលដោយ ៖ ធីតា)
ចែករំលែកព័តមាននេះ