ខេត្តសៀមរាប ៖ សមត្ថកិច្ចនគរបាលព្រហ្មទណ្ឌខេត្តសៀមរាប កាលពីម្សិលមិញបានបើកប្រតិបត្តិការឆ្មក់ចូលបង្ក្រាបទីតាំងចាក់ភ្នាល់បាល់តាមប្រព័ន្ធអ៊ិនធើរណេត ដ៏ធំមួយកន្លែងដែលមានយីហោ «ឡាក់គីឆាយ៉ា» របស់ថៅកែជនជាតិម៉ាឡេស៊ី ស្ថិតនៅជាប់ផ្សារកណ្តាលក្នុងសង្កាត់ស្វាយដង្គំ ក្រុងទេសចរណ៍សៀមរាប ដោយបានរឹបអូសវត្ថុតាងប្រព្រឹត្តបទល្មើសមួយចំនួន និងឃាត់ខ្លួនមនុស្សស្រី ប្រុសចំនួន៨នាក់ផងដែរ ។ លោកវរសេនីយ៍ ភឹង ចន្តារ៉េត នាយការិយាល័យប៉ូលិសព្រហ្មទណ្ឌកំរិតស្រាលខេត្តសៀមរាប ដែលបានដឹកនាំកំលាំងផ្ទាល់ចុះបង្ក្រាបទៅលើទីតាំងចាក់ភ្នាល់បាល់ «ឡាក់គីឆាយ៉ា» នោះបានថ្លែងប្រាប់ថា រាល់ការលេងល្បែងស៊ីសង គ្រប់រូបភាពនៅក្នុងខេត្តសៀមរាប មិនត្រូវបានអនុញ្ញាតជាដាច់ខាត ជាពិសេសល្បែងចាក់ភ្នាល់បាល់ ដែលប្រមុខរាជរដ្ឋាភិបាលបានហាមប្រាម ។ ក៏ប៉ុន្តែកន្លងមកក្រុមអ្នកឆ្មក់លេងគេមានល្បិចខ្ពស់ដែរ ពិបាកនឹងតាមដាន ។
លោកបានបន្តទៀតថា ការបង្ក្រាបទៅលើទីតាំងចាក់ភ្នាល់បាល់ខុសច្បាប់យីហោ«ឡាក់គីឆាយ៉ា» នេះធ្វើឡើងបន្ទាប់ពីបានដាក់បណ្តាញយ៉ាងល្អិតល្អន់ឱ្យចូលទៅចាក់បាល់នៅក្នុងហាងនោះ ដើម្បីយកវិក្កយបត្រចាក់បាល់ទុកជាភស្តុតាងត្រឹមត្រូវ ។ ជាមួយគ្នានោះដែរបុរសម្នាក់ឈ្មោះស៊យ ឧត្តម ដែលត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបនោះបាននិយាយថា គាត់ពុំបានចាក់បាល់នៅក្នុងហាងនោះទេ គឺគាត់មកហាងនេះឆែកមើលលទ្ធផលបាល់ទាត់ប៉ុណ្ណោះ ព្រោះគាត់បានចាក់នៅកន្លែងផ្សេង ។ ប៉ុន្តែគាត់បដិសេធមិនប្រាប់ឈ្មោះកន្លែងដែលគាត់ចាក់បាល់នោះទេ ។ ដោយឡែកនារីម្នាក់ទៀតឈ្មោះស៊ិន សោភ័ណ្ឌ ជាបុគ្គលិកបំរើការរបស់ហាងអ៊ិនធើរណេត «ឡាក់គីឆាយ៉ា» ដែលត្រូវបានបង្ក្រាបនោះ បានបញ្ជាក់ប្រាប់ថា វាពិតជាមានការចាក់ភ្នាល់បាល់នៅទីនេះអ៊ឺចឹងមែន ប៉ុន្តែរូបនាងពុំយល់អំពីបច្ចេកទេសនៃការលេងល្បែងនោះទេ ដោយសារតែរូបនាងទើបតែមកធ្វើការបានតែជាង២០ថ្ងៃប៉ុណ្ណោះ ។
យោងទៅតាមរបាយការណ៍បង្ក្រាបរបស់សមត្ថកិច្ចបានឱ្យដឹងថា ក្នុងប្រតិបត្តិការនោះគេបានធ្វើការឃាត់ខ្លួនមនុស្សចំនួន៨នាក់ ក្នុងនោះស្រី្ត៣នាក់ជាបុគ្គលិកបំរើការ និងប្រុស៥នាក់ជាអ្នកចាក់បាល់ ។ ក្រៅពីនោះក៏បានរឹបអូសវត្ថុតាងប្រព្រឹត្តបទល្មើសមួយចំនួន ក្នុងនោះប្រាក់ចំនួន៩៨២ដុល្លារ ម៉ូតូចំនួន៤គ្រឿង កុំព្យូទ័រចំនួន១១គ្រឿង និងកាមេរ៉ាសន្តិសុខចំនួន៤គ្រឿង រួមទាំងវត្ថុតាងផ្សេងៗដែលបំពាក់នៅក្នុងហាងនោះ ។ សូម្បីតែជំនាងផ្ទះទៀនធូប និងចានឆ្នាំងក៏រឹបអូសយកដែរ ។ ព្រះរាជអាជ្ញារងសាលាដំបូងខេត្តសៀមរាប-ឧត្តរមានជ័យ លោកហេង ផេង ដែលបានចុះដឹកនាំប្រតិបត្តិការបង្ក្រាបនាពេលនោះបានមានប្រសាសន៍ថា ទីតាំងបំរើសេវាអ៊ិនធើរណេត យីហោ «ឡាក់គីឆាយ៉ា» នេះវាពិតជាទីកន្លែងភ្នាល់បាល់ដ៏ធំមែន នេះបើយោងទៅលើវត្ថុតាងមួយចំនួនដែលឆែកឆេរចាប់បាននៅនឹងកន្លែង ក្នុងនោះរួមមានវិក្កយបត្ររួមនិងគណនីចាក់ភ្នាល់បាល់ផងដែរ ។
លោកក៏បានបញ្ជាក់ផងដែរថា យ៉ាងហោចណាស់អ្នកចាក់បាល់ត្រូវមានទោសពី៧ថ្ងៃទៅ៣០ថ្ងៃ ។ ដោយឡែកអ្នកជាប់ពាក់ព័ន្ធដូចជាអ្នកស៊ីសង និងថៅកែត្រូវមានទោសចាប់ពី១ឆ្នាំទៅ៣ឆ្នាំ ឬបង់ពិន័យជាប្រាក់ពី៥លានទៅ២០លានរៀល ។ សូមបញ្ជាក់ផងដែរថា ទីតាំងចាក់ភ្នាល់បាល់តាមប្រព័ន្ធអ៊ិនធើរណេតដ៏ធំដែលមានយីហោ «ឡាក់គីឆាយ៉ា» របស់ថៅកែជនជាតិម៉ាឡេស៊ី ដែលត្រូវបានសមត្ថកិច្ចធ្វើការបង្ក្រាបខាងលើនោះ ប៉ូលិសក្រុងសៀមរាប និងប៉ុស្តិ៍រដ្ឋបាលសង្កាត់ស្វាយដង្គំ បានធ្វើការឆែកឆេរម្តងរួចមកហើយ គឺនៅថ្ងៃទី១៦ សីហា ឆ្នាំ២០១០ ដោយបានទាំងធ្វើកិច្ចសន្យាផ្អាកអាជីវកម្មជាបណ្តោះអាសន្ន តែមិនដឹងយ៉ាងម៉េចមិនបានប៉ុន្មានថ្ងៃផង ក៏មានការបើកលេងវិញយ៉ាងគគ្រឹកគគ្រេងដូច្នេះ ៕
ចែករំលែកព័តមាននេះ