អ៊ីតាលី៖តាមប្រភពព័ត៌មាន Reuters បានឱ្យដឹងថា រដ្ឋមន្ត្រីក្រសួងសុខាភិបាលរបស់ប្រទេសអ៊ីតាលី លោក Roberto Speranza បាននិយាយកាលពីថ្ងៃអាទិត្យថា ប្រទេសអ៊ីតាលីកំពុងរៀបចំការរឹតត្បិតទូទាំងប្រទេសរួមទាំងភាគីឯកជនផងដែរ ដើម្បីឆ្លើយតបទៅនឹងការកើនឡើងនូវករណីឆ្លងកូវីដ។
លោក Speranza បាននិយាយថា ប្រទេសអ៊ីតាលីចាំបាច់ត្រូវបន្ថែមការរឹតត្បិត បន្ទាប់ពីបានបន្ធូរបន្ថយអស់រយៈពេលជាច្រើនសប្តាហ៍ ដោយសារតែវាមានគោលបំណងដើម្បីជៀសវាងការជាប់គាំងជាតិថ្មី។ លោកបាននិយាយនៅក្នុងបទសម្ភាសន៍ជាមួយស្ថានីយទូរទស្សន៍ជាតិ RAI ថា៖ “ឥឡូវនេះយើងត្រូវការការផ្លាស់ប្តូរល្បឿននិងធ្វើអន្តរាគមន៍ជាមួយវិធានការណ៍នានា ដែលមិនអាចប្រៀបធៀបទៅនឹងច្បាប់ដែលបានអនុម័តកាលពីមុន ដែលអាចឱ្យយើងទប់ស្កាត់ការរីករាលដាលបាន។”
ប្រទេសអ៊ីតាលីនៅថ្ងៃសុក្រនេះបានឈានដល់ចំនួន ៥០០០ករណីថ្មី ជាលើកដំបូងចាប់តាំងពីខែមីនា។ លោក Speranza បាននិយាយថា លោកបានស្នើឱ្យមានការហាមប្រាមលើពិធីជប់លៀងឯកជន ដែលមានទាំងកុមារនិងមនុស្សពេញវ័យស្របពេលដែលទីក្រុងរ៉ូម ក៏នឹងកំណត់ពេលវេលាសម្រាប់បារនិងភោជនីយដ្ឋាន ដើម្បីកាត់បន្ថយហានិភ័យនៃការឆ្លងរាលដាលរបស់ប្រជាជន។
លោក Speranza បាននិយាយថា ការរឹតត្បិតថ្មីនឹងត្រូវពិភាក្សាជាមួយតំបន់នានានៅថ្ងៃច័ន្ទ ហើយនឹងត្រូវបញ្ចូលក្នុងក្រឹត្យមួយ ដែលលោកនាយករដ្ឋមន្ត្រី Giuseppe Conte អាចចុះហត្ថលេខានៅល្ងាចថ្ងៃច័ន្ទ៕
ចែករំលែកព័តមាននេះ