ប្រឈមនឹងបញ្ហាដែលកំពុងផ្ទុះឡើង នូវជំងឺកូវីដ១៩ ក្នុងសហគមន៍ជាលើកដំបូងនៅកម្ពុជា គឺករិណី លោកអគ្គនាយកពន្ធនាគារ ក្រសួងមហាផ្ទៃ ដែលមានមនុស្ស៦នាក់ហើយរកឃើញវិជ្ជមានកូវីដ១៩នោះ លោកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល បានអង្វរដល់សាធារណជនថា នៅក្នុងពេលនេះគេពុំគួរបន្ទោសអ្នកនេះអ្នកនោះ ដែលបណ្តលឲ្យមានករណីនេះកើតឡើងនោះទេ តែអ្វីដែលពលរដ្ឋត្រូវធ្វើ គឺពលរដ្ឋគ្រប់រូបត្រូវអនុវត្តវិធានការការពារធ្វើយ៉ាងណាកុំឲ្យឆ្លងជំងឺនេះ មកលើខ្លួន និងសហគមន៍ខ្លួន។
មន្រ្តីជាន់ខ្ពស់ក្រសួងសុខាភិបាលបាននិយាយថា « ដំណាក់កាលនេះ មិនមែនជាពេលដែលត្រូវរកខុសត្រូវនោះទេ គឺជាពេលវេលាដែលខ្មែរត្រូវរួបរួមគ្នាស្តាប់តាមការណែនាំរបស់សម្តេចតេជោ និងរបស់ក្រសួងសុខាភិបាល ឲ្យបានគ្រប់ៗគ្នា ដើម្បីកម្ពុជាឆ្លងកាត់នូវព្រឹត្តិការណ៌ដ៏ស្មុគស្មាញថ្មីមួយនេះ។ ខ្ញុំសុំលើកដៃអង្វរលោកអ្នកទាំងអស់ សូមមេត្តាកុំរុញឲ្យខ្លោច កុំរោចឲ្យឆៅអី កុំគិតរកកំហុសទម្លាក់ដាក់អ្នកនេះអ្នកនោះអីណា។ អ្វីដែលសំខាន់បំផុតនៅពេលនេះ គឺបុគ្គលគ្រប់រូបចាំបាច់ត្រូវអនុវត្តន៌វិធានការការពារខ្លួនឲ្យបានខ្ជាប់ខ្ជួនមែនទែន ធ្វើយ៉ាងណាកុំឲ្យមានការចម្លងមកខ្លួនឯង កុំឲ្យពីបុគ្គលម្នាក់ចម្លងទៅបុគ្គលម្នាក់ទៀត និងកុំឲ្យចម្លងក្នុងសហគមន៌”។
លោកស្រី ឱ វណ្ណឌីន លើកឡើងថា នៅប្រទេសគេដែលមានធនធានច្រើនជាងកម្ពុជាផង គេនៅតែគ្រប់គ្រងជំងឺនេះមិនបាន។ គឺមាន អ្នកឈឺរាប់សែន រាប់លាននាក់ និងស្លាប់រាប់ពាន់ រាប់សែបនាក់ដែរ។ “ប្រទេសយើងតូច ធនធានតិច ខិតខំទប់ស្កាត់បានជិតមួយឆ្នាំហើយ ដែលមិនមានការចម្លងចូលសហគមន៌ ទៀបតែថ្ងៃនេះទេ ដែលជាថ្ងៃដំបូងនៃការចម្លងក្នុងសហគមន៌ ដែលក្រុមការងារទាំងអស់ និងថ្នាក់ដឹកនាំក្រសួង មិនទាំងបានសម្រាន្ត ធ្វើការទាំងយប់ទាំងថ្ងៃ ដើម្បីទប់ការរាតត្បាតបន្ត និងដើម្បីសុខភាពទាំងអស់គ្នា។ សង្ឃឹមថា ក្នុងស្មារតីសាមគ្គីភាព រួមគ្នាប្រយុទ្ធនឹងជំងឺកូវីដ-១៩ យើងនឹងខិតខំជំនះឧបសគ្គមួយនេះទាំងអស់គ្នា”។
សូមជម្រាបថាចាប់តំាងពីមានវត្តមានជំងឺកូវីដ១៩នៅកម្ពុជា អំឡុងខែកុម្ភៈដើមឆ្នាំមក មានព្រឹត្តិការណ៍ពីរដែលកម្ពុជាមានការប្រឈមខ្លំាង ទីមួយគឺព្រឹត្តិការណ៍៣វច្ឆិកា ដែលជាដំណើរទស្សនកិច្ចរបស់លោករដ្ឋមន្រ្តីការបរទេសហុងគ្រី នៅកម្ពុជា ហើយលោកត្រូវបានរកឃើញថាមានកូវីដ១៩ និងមានមនុស្ស៤នាក់បានឆ្លង។ ចំណែកករណីទី២ គឺព្រឹត្តិការណ៍ដែលកំពុងតែកើនឡើងនេះ គឺករណីលោកអគ្គនាយកពន្ធនាគារក្រសួងមហាផ្ទៃ ដែលមកដល់ពេលនេះ មានមនុស្ស៦នាក់ហើយបានរកឃើញថាវិជ្ជមាន។ ករណីទំាងពីរសុទ្ធសឹងជាប់ពាក់ព័ន្ធមន្រ្តីជាន់ខ្ពស់៕
ចែករំលែកព័តមាននេះ