រាជធានីភ្នំពេញ ៖ នៅពេលដែលយើងលែងលាដៃសុំលុយឳពុកម្តាយហើយ ចឹងយើងត្រូវដឹងពីរបៀបចាយលុយ របៀបគ្រប់គ្រងលុយ ឬហិរញ្ញវត្ថុឲ្យបានច្បាស់លាស់ បើមិនដូចនេះទេវានឹងធ្វើឱ្យឆាកជីវិតយើងរស់នៅតែលតោល លិចអណ្តែតៗ ។ ហើយប្រសិនជាយើងកំពុងនៅជាយុវវ័យ…
រាជធានីភ្នំពេញ ៖ នៅពេលដែលយើងលែងលាដៃសុំលុយឳពុកម្តាយហើយ ចឹងយើងត្រូវដឹងពីរបៀបចាយលុយ របៀបគ្រប់គ្រងលុយ ឬហិរញ្ញវត្ថុឲ្យបានច្បាស់លាស់ បើមិនដូចនេះទេវានឹងធ្វើឱ្យឆាកជីវិតយើងរស់នៅតែលតោល លិចអណ្តែតៗ ។ ហើយប្រសិនជាយើងកំពុងនៅជាយុវវ័យ ពេញកំលាំងមាំមួន យើងគួរយកពេលវេលាដែលយើងកំពុងតែពេញកំលាំងនឹងទៅរកលុយឱ្យខ្លាំង តែមិនចឹងទេ អ្នកខ្លះបែរជាយកអាកំលាំងដែលកំពុងមាំមួនដើរសប្បាយចាយវាយ ផឹកស៊ី។
យើងគួរណាត្រូវធ្វើឱ្យមានភាពស្មើគ្នា ៥០=៥០ ភាគរយ ប្រសិនជាយើងពិតជាមិនអាចអត់ការសប្បាយបាន ។ ប៉ុន្តែជាទូទៅពេលដែលយើងនៅពេញកំលាំងចេះ គួរណាស់តែយើងត្រូវរកលុយឱ្យបាន ៨០ ភាគរយ និងការដែលចង់សប្បាយនឹងត្រឹមតែ ១០ ទៅ ២០ ភាគរយ អីបានហើយ បើមិនចង់ឱ្យទឹកភ្នែកស្រក់នៅពេលដែលយើងមានវ័យចំណាស់នោះ។
លោក លី ហាវ ស្ថាបនិកសាលា អាយឌាលី អន្តរជាតិ បានលើកឡើងថា «តើអ្នកដឹងទេថាការចាត់ចែងហិរញ្ញវត្ថុ គឺមាន ៤ តំណាក់កាល ដែលយើងគួរដឹង ៖ ដំណាក់កាលទី១)- នៅពេលដែលយើងនៅលីវ ៖ តើនៅពេលយើងនៅលីវ យើងត្រូវចាត់ចែងហិរញ្ញវត្ថុរបស់យ៉ាងដូចម្តេច? ដំណាក់កាលទី២)- នៅពេលយើងមានគ្រួសារ ដំណាក់កាលទី៣) – នៅពេលវេលាដែលយើងក្លាយជាឪពុកម្តាយរបស់គេ និងដំណាក់កាលទី៤) – នៅពេលវេលាដែលយើងមានភាពវ័យចំណាស់ ឬចូលនិវត្តន៍។ អ្នកខ្លះមិនបានខ្វល់អំពីការចាត់ចែងហិរញ្ញវត្ថុនេះ ទើបធ្វើឱ្យគាត់ចាស់ទៅ មិនបានសោយសុខ តែបែរជាសោយទុក្ខ»។
ដូចនេះ ដំណើរនៃការវិវឌ្ឍន៍នៃជីវិតយើង គឺមានដំណាក់កាលទាំងអស់នឹង ហើយ៤ ដំណាក់កាលនឹងវាពាក់ព័ន្ធជាមួយលុយនឹង ពីព្រោះជីវិតរស់នៅសព្វថ្ងៃ គឺជាសម័យបច្ចេកវិទ្យាជឿនលឿននេះ អត់មានលុយពិបាកទៅនិយាយជាមួយគេណាស់។ ហើយលុយនិងគ្រួសារ មិនអាចយកទៅប្រៀបថា មួយណាសំខាន់ជាងមួយណានោះទេ ព្រោះទាំងពីរនឹងគឺសំខាន់ដូចគ្នា។ ប៉ុន្តែសម័យបច្ចេកវិទ្យា គេច្រើនតែគិតគូទៅលើលុយរាងសំខាន់ជាងបន្តិច ពីព្រោះអ្វីដែលគេរកឃើញ ឱ្យតែមានលុយវាងាយនឹងឱ្យមានសុភមង្គលដែល ហើយនៅពេលដែលអត់លុយ វាងាយនឹងធ្វើឱ្យយើងអត់សុភមង្គលដូចគ្នាដែរ។
លោកគ្រូ បានបន្តថា «ខ្ញុំចង់លើកទឹកចិត្តមនុស្សស្រី ប្រសិនជាមានមនុស្សប្រុសចង់ចូលមកស្តីយើង ឬក៏ចង់មកតាមស្រឡាញ់យើង យើងគួរស្វែងយល់ពីម្នាក់ប្រុសនឹងធ្វើសល់លុយអត់។ ហើយប្រសិនជាម្នាក់ប្រុសនឹងធ្វើការ ក្នុងមួយខែៗមិនសល់លុយនោះទេ មិនចាំបាច់ពិចារនោះទេ ពេលដែលខ្ញុំនិយាយបែបនេះ មានគេប្រតិកម្មជាមួយខ្ញុំ ដោយគេសួរខ្ញុំថា ចឹងឱ្យស្រឡាញ់តែអ្នកមានចោះ!។ ត្រង់នេះ ខ្ញុំមិនបានមានន័យថាឱ្យស្រឡាញ់តែអ្នកមាននោះទេ ប៉ុន្តែចង់ប្រាប់ថា បើសិនជាធ្វើការគ្មានសល់លុយ វាស្មើនឹងគ្មានកំណើត។ អត់សល់លុយត្រង់ន័យនេះ មិនបានសំដៅទៅលើការបង់រំលោះដីធ្លីអីផ្សេងៗនោះទេ គឺមានន័យថាអត់សល់លុយហើយចាយមិនគ្រាន់ ឧទាហរណ៍ថា ប្រាក់ចំណូលរកបាន ២០០ដុល្លារអាមេរិក ចាយអស់២៥០ដុល្លារបាត់ទៅហើយ ចាយៗរហូតដល់ទៅចូលដើម»។
លោកបន្តថា មានបងប្អូនយើងខ្លះពិបាកក្នុងការពន្យល់ណាស់ គាត់បានលើកឡើងមកថា ចុះគេរកលុយមកគេបង់ធានាគារ គេមានប្រពន្ធផង គេមានកូនផង បានអ្វីសល់លុយ? ដូចនេះមានន័យថា គាត់មិនបានយល់អំពីអ្វីដែលលោកកំពុងនិយាយ។ ត្រង់នេះ ខ្ញុំចង់និយាយថាមនុស្សដែលធ្វើការបានប្រាក់ចំណូលតិចតែចាយច្រើន មិនមែនសំដៅអ្នកដែលយកលុយទៅបង់ធនាគារឬយកទៅចិញ្ចឹមគ្រួសារនោះទេ។
មានការលើកឡើងបន្តទៀតថា ចុះឱ្យខ្ញុំចាត់ចែងយ៉ាងដូចម្តេច បើលុយខ្ញុំចាយសឹងតែមិនគ្រាន់ផង? នោះហើយជាចំលើយ ចាយមិនគ្រាន់ដោយសារអ្នកមិនចេះចាត់ចែង។ លោកលើកឧទាហរណ៍ដូចនេះថា មានប្រាក់ខែ ២០០ ដុល្លារ តើធ្វើយ៉ាងណាដើម្បីសល់ បើប្រាក់ខែប៉ុណ្ណេះតិចណាស់? ចំលើយខ្ញុំគឺ ខ្ញុំនឹងធ្វើការបែងចែង៤ផ្លូវធំ ក្នុងការចំណាយនៃប្រាក់ខែនោះ ដើម្បីបងប្អូនអាចពិចារណាបាន។
ទី១ យើងត្រូវបែងចែកលើថ្លៃជីវភាព ៖ មានដូចជា អាហារបីពេល អង្ករ ហើយប្រសិនអ្នកជួលផ្ទះត្រូវជួល ថ្លៃទឹកថ្លៃភ្លើង សាំងម៉ូតូ សម្លៀកបំពាក់។ល។ វាចូលទៅក្នុងថ្លៃសម្រាប់ជីវភាព។ ដូចនេះបើប្រាក់ខែ ២០០ ដុល្លារចឹងថ្លៃជីវភាពនេះ គួរតែចាយ ១២០ដុល្លារនោះទេ ហើយប្រសិនយើងជួលផ្ទះត្រូវរក ដៃគូមកនៅជាមួយ ដើម្បីជួយចេញថ្លៃគ្នា។ ហើយសូមគិតផងដែរថា ប្រាក់ខែ ២០០ ដុល្លារកុំលោតឱ្យសោះរឿងទិញអីវ៉ាន់តាមអ៊នឡាញ។
ទី២ ថ្លៃសិក្សាឬក៏ហៅថាថ្លៃសេពគប់ ឬអាចហៅថាការទំនាក់ទំនងសង្គម ៖ ប្រសិនជាយើងមិនសូវមានលុយ ប្អូនៗគួរខំប្រឹងរៀន ធ្វើយ៉ាងណាដាក់សុំអាហារណ៍រូបករណ៍ឱ្យបាន នេះជាការសន្សំបានខ្លាំងណាស់។ មានកូនអ្នកមានខ្លះមិនមានសំណាងទៅរៀននៅក្រៅប្រទេសផង ដូចនេះប្រសិនជាយើងមិនសូវមានលុយកាក់ត្រូវតែរកវិធី នេះដើម្បីការសិក្សាខ្ពស់។ ហើយធ្វើយ៉ាងណាចំណាយលើការចាយវាយក្នុងការសិក្សានេះឱ្យបានកាន់តែតិចកាន់តែប្រសើ ចាយត្រឹមតែ ២០ ដុល្លារបានហើយក្នុងមួយខែ។ ម្យ៉ាងវិញទៀតកុំសេពគប់ដាច់ខាតជាមួយមិត្តភ័ក្តិដែលបបួលតែស៊ីផឹក អ្នកខ្លះឥតប្រយោជន៍។
ទី៣ បែងចែកទៅលើមានការបន្ទាន់ឬគ្រោះថ្នាក់ជាយថាហេតុណាមួយ ៖ ចំណុចនេះ បើទោះបីយើងមិនមានអ្វីកើតឡើង ឬគ្មានជំងឺអ្វីក៏ដោយ ត្រូវដក ១០ ដុល្លារក្នុងមួយខែៗ ចឹងសរុបមក ក្នុងមួយឆ្នាំ មិនឈឺចឹងយើងសល់ ១២០ ដុល្លារ វាអាចនឹងមានប្រយោជន៍នៅពេលណាមួយដែលយើងមានជំងឺមែនទែន។
ទី៤ ថ្លៃវិនិយោគ ៖ សន្សំ៥០ដុល្លារក្នុងមួយខែ ប្រាក់ខែ ២០០ យ៉ាងហោចណាស់ក៏សល់ ៥០ ដុល្លារសម្រាប់ការវិនិយោគនៅថ្ងៃអនាគត។
ទោះបីប្រាក់ខែ ២០០ដុល្លារក៏ដោយ កុំមានលេសច្រើន នៅពេលដែលអ្នកចាប់ផ្តើមឯករាជ លែងចាយលុយឪពុកម្តាយហើយ ពេលនោះអ្នកត្រូវមានលុយទុកសម្រាប់ការវិនិយោគឬគេហៅថាលុយសន្សំ៕
ចែករំលែកព័តមាននេះ