ខេត្តឧត្តរមានជ័យ ៖ កាលពីថ្ងៃទី៣០ កក្កដា ឆ្នាំ២០១១ កន្លងមកនេះ គណៈប្រតិភូមួយក្រុមដឹកនាំដោយលោកច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់…
ខេត្តឧត្តរមានជ័យ ៖ កាលពីថ្ងៃទី៣០ កក្កដា ឆ្នាំ២០១១ កន្លងមកនេះ គណៈប្រតិភូមួយក្រុមដឹកនាំដោយលោកច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះទៅពិនិត្យតំបន់ព្រៃសហគមន៍សង្ឃរុក្ខាវនី ស្ថិតនៅក្នុងឃុំកូនក្រៀល ស្រុកសំរោង ដែលមានផ្ទៃដីចំនួន១៨.២៦១ហិកតា ។ ជាមួយនេះក៏បានចុះសួរសុខទុក្ខ និងសំណេះសំណាលជាមួយសមាជិក សមាជិកាគ្រប់គ្រងព្រៃសហគមន៍ទាំង១៣នៅក្នុងខេត្ត ដោយនាំយកនូវអំណោយមួយចំនួនទៅជួយឧបត្ថម្ភដល់សហគមន៍ រួមមាន អង្ករចំនួន២០០គីឡូក្រាម ត្រីខកំប៉ុងចំនួន១០កេស មីចំនួន១០កេស និងថវិកាចំនួន៦លានរៀល ។
នៅក្នុងឱកាសនោះ ប្រធានសហគមន៍ព្រៃឈើទាំង១៣នៅក្នុងខេត្ត បានរាយការណ៍ ពីសកម្មភាពការងារគ្រប់គ្រងថែរក្សាព្រៃសហគមន៍ និងផលវិបាកផ្សេងៗដែលបានកើតឡើងដូចជា បទល្មើសលួចកាប់បំផ្លាញព្រៃឈើ កង្វះខាតមធ្យោបាយ សម្ភារប្រើប្រាស់ និងថវិកា ដើម្បីផ្គត់ផ្គង់គ្រឿងឧបភោគបរិភោគដល់អ្នកការពារដែលប្រចាំការជាអចិន្ត្រៃយ៍ក្នុងព្រៃសហគមន៍ ។ ទន្ទឹមនឹងនោះក៏នៅមានក្រុមឈ្មួញ និងអ្នកមានអំណាចមួយខ្លះឃុបឃិតគ្នាជួលប្រជាពលរដ្ឋមួយចំនួនលួចកាប់បំផ្លាញព្រៃឈើដោយមានជនប្រដាប់ដោយអាវុធជួយបាញ់ការពារផង ។
ប្រធានសហគមន៍ព្រៃឈើទាំង១៣ បានឱ្យដឹងទៀតថា ជាក់ស្តែង នៅក្នុងតំបន់ព្រៃសហគមន៍រំដួលវាសនា កន្លងមកមានការរំលោភយកដីក្នុងតំបន់ព្រៃសហគមន៍ក្នុងគោលបំណងយកធ្វើជាកម្មសិទ្ធិផ្ទាល់ខ្លួន ព្រមទាំងកាប់បំផ្លាញព្រៃឈើទៀតផង ។ ដើម្បីទប់់ស្កាត់បទល្មើសទាំងអស់នេះ ក្រុមការងារចម្រុះគ្រប់គ្រងព្រៃសហគមន៍បានសហការជាមួយមន្ត្រីជំនាញរដ្ឋបាលព្រៃឈើ កងទ័ពជើងគោក ចុះបង្ក្រាបអំពើល្មើសច្បាប់នេះ តែត្រូវក្រុមជនប្រដាប់អាវុធវាយប្រហារបណ្តាលឱ្យមានរបួសស្រាល និងធ្ងន់ ។ អាស្រ័យដោយសារស្ថានភាពបែបនេះ ចេះតែកើតមានជាប់មិនដាច់ ទើបក្រុមចម្រុះបានដាក់ពាក្យបណ្តឹងទៅសាលាដំបូងខេត្តសៀមរាប ប៉ុន្តែអស់រយៈពេលជិតមួយឆ្នាំមកហើយ ពុំទាន់បានកោះហៅទៅដោះស្រាយនៅឡើយទេ។
លោកជូ ចន្ទតារារិទ្ធ នាយខណ្ឌរដ្ឋបាលព្រៃឈើបានមានប្រសាសន៍ថា កន្លងមក មន្ត្រីជំនាញបានខិតខំយកចិត្តទុកដាក់សហការជាមួយសហគមន៍ទាំង១៣ ដើម្បីដោះស្រាយបញ្ហាដែលកើតមានឡើងទាំងអស់នេះ ។ លោកច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្រោយពីបានស្តាប់របាយការណ៍របស់សហគមន៍ព្រៃឈើនីមួយៗរួចមក ក៏បានផ្តាំផ្ញើដល់ក្រុមការងារឱ្យយកចិត្តទុកដាក់បន្ថែមទៀត ដើម្បីថែរក្សាការពារព្រៃឈើដែលជាធនធានធម្មជាតិយា៉ងសំខាន់សម្រាប់ផលប្រយោជន៍ប្រទេសជាតិ ក៏ដូចជាផលប្រយោជន៍របស់ពិភពលោកផងដែរ៕
ចែករំលែកព័តមាននេះ